မဲခေါင်၊ ဒီဇင်ဘာ ၂
ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသ၊ ကုန်းကြမ်း အခြေစိုက် ခလရ (၁၂၅) တပ်ရင်းမှ တပ်ရင်းမှူး ဦးဆောင်ပြီး နို၀င်ဘာ ၂၈ ရက်နေ့က အလံဖြူထောင် လက်နက်ချခဲ့ရာ အဲဒီ တပ်စခန်းက အမြောက်၊ သေနတ်၊ ကျည် အပါအ၀င် လက်နက်ခဲယမ်း အပုံလိုက် သိမ်းဆည်း ရရှိခဲ့တယ်လို့ သတင်းရင်းမြစ်က ပြောပါတယ်။
ကုန်းကြမ်းစခန်းနဲ့ စခန်းငယ်တွေကို နိုဝင်ဘာ ၂၄ ရက်ကစပြီး ညီနောင်တပ်ဖွဲ့တွေ စတင် တိုက်ခိုက်ခဲ့ရာ ၂၇ ရက်မှာ စကခ (၁၆) တပ်ရင်းမှူးနဲ့ တပ်ဖွဲ့ဝင် ၁၀၀ ခန့် ထွက်ပြေးသွားတယ်လို့ ဆိုပါတယ်။
နိုဝင်ဘာ ၂၈ ရက်မှာတော့ ခလရ (၁၂၅) တပ်ရင်းမှူး ကိုယ်တိုင် လက်နက်ချ အညံ့ခံဖို့ လာရောက် ဆွေးနွေးခဲ့ပြီးနောက် ခလရ (၁၂၅) တပ်ဖွဲ့ဝင် ၉၃ ဦး၊ စကခ (၁၆) တပ်ဖွဲ့ဝင် ၃၆ ဦး၊ စကခ (၁၂) တပ်ဖွဲ့ဝင် ၁၄ ဦး၊ ကော်မျိုးနွယ် ပြည်သူ့စစ်တပ်ဖွဲ့ဝင် ဗမာလူမျိူး ၂၇ ဦး၊ စစ်တပ် မိသားစု ၈၆ ဦး၊ စစ်ဆင်ရေး အကြံပေး သူ ၅ ဦးနဲ့ ရဲတပ်ဖွဲ့ဝင် ၁၁ ဦး စုစုပေါင်း ၂၇၂ ဦး လက်နက်ချ အလင်းဝင်ခဲ့တယ်လို့ MNDAA က ထုတ်ပြန်ထားပါတယ်။
ကုန်းကြမ်းဒေသမှာ နှစ်ပေါင်း ၃၀ နီးပါး တပ်စွဲ ထိန်းချုပ်ထားတဲ့ အဆိုပါ စခန်းကို သိမ်းပိုက်နိုင်ခဲ့တာ ကိုးကန့် တပ်ဖွဲ့ အတွက် သမိုင်းဝင် အောင်မြင်မှု ဖြစ်တယ်လို့ MNDAA ပြောရေးဆိုခွင့်သူ လီကျားဝင်း က မဲခေါင်သတင်းဌာနကို ပြောဆိုထားပါတယ်။
၁၉၆၅ ခုနှစ်မှာ ကုန်းကြမ်းဒေသကို စစ်တပ်က ထိုးဖောက် ဝင်ရောက်ခဲ့ပြီး တပ်စွဲခဲ့ရာ ၁၉၆၈ ခုနှစ်၊ နိုဝင်ဘာလ ၁၀ ရက်နဲ့ ၁၉၆၉ ခုနှစ်၊ ဖေဖော်ဝါရီလ ၁၆ ရက်မှာ ဗကပ အမှတ် (၄၀၄) တပ်ဖွဲ့မှ ကုန်းကြမ်းတပ်စခန်းကို ၂ ကြိမ် ထိုးစစ်ဆင် တိုက်ခိုက်ခဲ့ရာ ဒုတိယ အကြိမ်မှာ ကုန်းကြမ်း စခန်းကို ရရှိခဲ့ပါတယ်။
ဒါပေမဲ့ ၁၉၉၅ ခုနှစ်၊ နိုဝင်ဘာလ ၂၃ ရက်မှာ ကိုးကန့် ရန်မောက်လျှံရဲ့ ညီ ဖောက်ပြန်မှုကြောင့် ကုန်းကြမ်းဒေသ အပါအဝင် ချင်းရွှေဟော်၊ ရှီယွင်ကြည် (ပါစင်းကျော်)၊ မီရှင့်ကုတ်၊ လောက်ကိုင်၊ ရှင်းကိုင်း၊ တာရွှေထန်၊ ရန်ခန့်၊ မော်ထိုက်ဒေသတွေကို စစ်တပ်က နှစ်ပေါင်း ၂၈ နှစ်ကျော်ကြာ ထိန်းချုပ်ခဲ့တယ်လို့ သိရပါတယ်။
MK-007
#MeKongNews
#ကုန်းကြမ်း
#ခလရ(၁၂၅)
#MNDAA
