မဲခေါင်၊ ဖေဖော်ဝါရီ ၁၄
တစ်နိုင်ငံလုံးအပစ်အခတ်ရပ်စဲရေး NCA လက်မှတ်ထိုးတားတဲ့ မွန်ပြည်သစ်ပါတီဟာ ဒီကနေ့မှာ တော်လှန်ရေးအင်အားစုနဲ့ပူးပေါင်းပြီး အာဏာသိမ်းစစ်ကောင်စီကို တိုက်ခိုက်မယ်လို့ ဒီနေ့ ဖေဖော်ဝါရီ ၁၄ မှာ ကြေညာပါတယ်။
မွန်ပြည်သစ်ပါတီ အထွေထွေအတွင်းရေးမှူး နိုင်ဇေယျ၊ ဒုစစ်ဦးစီးချုပ် ဗိုလ်မှူးချုပ် စလွန်းထောတို့ပါတဲ့ ယုံကြည်ချက်တူ ပုဂ္ဂိုလ်တွေ စုစည်းထားတဲ့ မွန်ပြည်သစ်ပါတီ(စစ်အာဏာရှင်တိုက်ဖျက်ရေး)က ကြေညာတာပါ။
ယင်းထုတ်ပြန်ချက်မှာ ၂၀၂၁ ခုနှစ်၊ ဖေဖော်ဝါရီ ၁၂ ရက်ကစပြီး နိုင်ငံရေးပြဿနာကို နိုင်ငံရေးနည်းနဲ့ ၃ ကြိမ်တိုင်တိုင် အာဏာသိမ်းစစ် ကောင်စီနဲ့ တွေ့ဆုံဆွေးနွေးခဲ့ပေမယ့် မျှော်မှန်းတဲ့ ရလဒ်တွေ မရဘူးလို့ ဆိုပါတယ်။
စစ်ကောင်စီဟာ ပြည်သူလူထုအပေါ် လူမဆန်စွာ ဖမ်းဆီးညှဉ်းဆဲ အကျဉ်းချသတ်ဖြတ်မှုတွေ ကျူးလွန်နေတာမှာ မွန်ပြည်နယ် ကျိုက်တို၊ သထုံ၊ ဘီးလင်း၊ ကျိုက်မရော၊ သံဖြူဇရပ်နဲ့ ရေးမြို့နယ်တွေမှာ ဖမ်းဆီးသတ်ဖြတ်မှုတွေ၊ လက်နက်ကြီးနဲ့ပစ်ခတ်တာ၊ လေကြောင်းက တိုက်ခိုက်မှုတွေ၊ နေအိမ်တွေ မီးရှို့လာနေတာတွေ ပိုမိုပြုလုပ်လာနေတဲ့ စစ်ကောင်စီနဲ့ နိုင်ငံရေးအရ ဆက်လက်တွေ့ဆုံအဖြေရှာလို့ မဖြစ်နိုင်တော့ဘူးလို့ ဆိုပါတယ်။
အဲ့ဒါကြောင့် စစ်ကောင်စီနဲ့ဆက်ဆံရေးကိုလည်း လုံး၀ လက်မခံနိုင်တော့လို့ ခုလို တော်လှန်ရေးအင်အားစုတွေနဲ့လက်တွပြီး စစ်အာဏာရှင်ကို အမြစ်ပြတ်တိုက်ခိုက်သွားမယ်လို့ မွန်ပြည်သစ်က ထုတ်ပြန်ကြေညာတာပါ။
အပစ်ရပ်စာချုပ် (NCA) လက်မှတ်ရေးထိုးထားတဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ Peace Process Steering Team(PPST) မှာ မြန်မာနိုင်ငံလုံးဆိုင်ရာကျောင်သားများတပ်မတော် ABSDF ၊ မွန်ပြည်သစ်ပါတီ(NMSP)၊ ပအို၀်းအမျိုးသား လွတ်မြောက်ရေးအဖွဲ့ (PNLO/PNLA)၊ လားဟူဒီမိုကရက်တစ်အစည်းအရုံးLDU ၊ ဒီမိုကရေစီအကျိုးပြုကရင်တပ်မတော် DKBA ၊ ရှမ်းပြည်ပြန်လည်ထူထောင်ရေးကောင်စီ RCSS ၊ ရခိုင်ပြည်လွတ် မြောက်ရေးပါတီ ALP/ALA ၊ ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ KNU/KNLA(PC) တို့ပါ၀င်ပါတယ်။
PPST အဖွဲ့မှ PNLA က စစ်ကောင်စီကို ပြန်လည်တိုက်ခိုက်ပြီးနောက် ယခု မွန်ပြည်သစ်ပါတီ (စစ်အာဏာရှင်တိုက်ဖျက်ရေး)က ဒုတိယမြောက်အဖြစ် ပြန်လည်တိုက်ခိုက်ဖို့ ကြေညာခဲ့တာ ဖြစ်ပါတယ်။
PPST အဖွဲ့မှာ မွန်ပြည်သစ်ပါတီက ဒုတိယအင်အားအကြီးဆုံးဖြစ်ပြီး RCSS က အင်အားအများဆုံးနဲ့ ပါ၀င်နေပါတယ်။
MK-012
