မဲခေါင် ၊ ဇန်နဝါရီ ၁၈
အပစ်ခတ်ရပ်စဲရေး သဘောတူညီမှုအချို့ ရရှိပြီးတဲ့နောက် ရှမ်းမြောက်ရှိ ကိုးကန့်နဲ့တအာင်းဒေသမှာ နှစ်ဖက်ထိတွေ့တိုက်ခိုက်မှု သိသာစွာလျော့နည်းသွားပေမယ့် စစ်ကောင်စီဟာ အရပ်သားပြည်သူတွေကို လေကြောင်း လက်နက်ကြီးတွေနဲ့ ဆက်လက်ပစ်ခတ်တိုက်ခိုက်ဆဲဖြစ်တယ်လို့ ညီနောင်မဟာမိတ် ၃ ဖွဲ့ ကပြောပါတယ်။
မနေ့ညက ထုတ်ပြန်တဲ့ ၁၀၂၇ စစ်ဆင်ရေး ၈၃ ရက်မြောက်အခြေအနေမှာ ညီနောင်မဟာမိတ် ၃ ဖွဲ့က အဲ့ဒီထို ထည့်သွင်းအသိပေးထားပါတယ်။
“ဟိုင်ဂင်ဆွေးနွေးပွဲတတိယအကြိမ် အပြီးတွင် နှစ်ဖက်သဘောတူညီမှုအချို့ ရရှိခဲ့ပြီးနောက် ရှမ်းမြောက်ရှိ ကိုးကန့်နှင့် တအာင်းဒေသအချို့တွင် နှစ်ဖက်တိုက်ပွဲများ သိသာစွာလျော့ကျသွားခဲ့သည်မှာ အမှန်ပင်ဖြစ်သော်လည်း စစ်ကောင်စီဘက်မှ အရပ်သား၊ ရပ်ရွာများအား လေကြောင်း၊ လက်နက်ကြီးများဖြင့် ပစ်ခတ်တိုက်ခိုက်မှုများမှာ ဆက်၍ရှိနေဆဲဖြစ်သည်။” လို့ ညီနောင်မဟာမိတ် ၃ ဖွဲ့က ပြောပါတယ်။
ရှမ်းမြောက်ဒေသအတွင်းရှိ တအာင်းတပ်မတော် (TNLA) ရဲ့ တပ်မဟာ (၂) စစ်ဒေသ၊ ဖြူရောင် ကျေးရွာမှာ စခန်းချတပ်စွဲထားတဲ့ စစ်ကောင်စီတပ်ဟာ အထက်ညောင်ကုန်းကျေးရွာကို ဇန်နဝါရီ ၁၇ ရက်နေ့မှာ လက်နက်ကြီးနဲ့ ၁ ကြိမ်ပစ်ခတ်တိုက်ခိုက်ခဲ့ပါတယ်။
ဒါ့အပြင် ၁၀၂၇ စစ်ဆင်ရေးဟာ ညီနောင်မဟာမိတ် ၃ ဖွဲ့မှ ရှမ်းမြောက်ဒေသမှာ စတင်ခဲ့ပေမယ့် စစ်ဆင်ရေးအရှိန်အဟုန်ဟာ အခြားတော်လှန်ရေးနယ်မြေတွေကို ကူးစက်ခဲ့ပြီးဖြစ်တယ်လို့ ဆိုပါတယ်။
ရှမ်းမြောက်ဒေသမှာ အပစ်ခတ်ရပ်စဲမှု သဘောတူညီချက်ကြောင့် ထိတွေ့တိုက်ပွဲလျော့နည်းလာပေမယ့် မြေပြင်မှာ တိုက်ပွဲတွေနေ့စဉ်ဖြစ်ပွားနေဆဲဖြစ်တယ်လို့လည်း ရှမ်းမြောက်မှ ဒေသခံသတင်းရင်းမြစ်တွေကပြောပါတယ်။
“ရှမ်းမြောက်မှာ ညီနောင် ၃ ဖွဲ့နဲ့ စစ်ကောင်စီတွေ တိုက်ခိုက်တာ ရပ်ထားပေမယ့် နမ့်ဖက်ကာမှာတေ့ာ နေ့တိုင်းတိုက်ပွဲဖြစ်ပွားနေတုန်းပဲ ကချင်တပ်မတော် KIA ရဲ့ ထိုးစစ်ကို စစ်ကောင်စီတပ်တွေ အပြင်းအထန်ခုခံနေရတုန်းပဲ” လို့ ရှမ်းမြောက်ဒေသခံသတင်းရင်းမြစ်တစ်ဦးကပြောပါတယ်။
ရှမ်းမြောက်မှာ ညီနောင်မဟာမိတ် ၃ ဖွဲ့နဲ့ စစ်ကောင်စီတို့ကြား ထိတွေ့တိုက်ပွဲတွေ ထိုးစစ်တွေ လျော့နည်းသွားပေမယ့် ညီနောင် ၃ ဖွဲ့ထဲက တဖွဲ့ဖြစ်တဲ့ AA တပ်ဖွဲ့ရဲ့ ရခိုင်ပြည်နယ်ဘက်မှာတော့ စစ်ရေးတွေပြင်းထန်လျက်ရှိနေတယ်လို့ ညီနောင်မဟာမိတ် ၃ ဖွဲ့က ပြောပါတယ်။
ရခိုင်ပြည်နယ်ဘက်မှာ ရခိုင်တပ်တော် AA က စစ်ကောင်စီရဲ့ စခန်းတွေကို တခုပြီး တခု သိမ်းယူနေတဲ့အချိန်မှာ ရခိုင်တပ်တော်ရဲ့ ဗျူဟာမြောက်ထိုးစစ်၊ ဝိုင်းဝန်းပိတ်ဆို့မှုဒဏ်ကို အလူးအလဲခံနေရတဲ့ စစ်ကောင်စီကတော့ မြို့၊ ရပ်ရွာတွေကို ဦးတည်တိုက်ခိုက်ခြင်း နဲ့ မီးရှို့ဖျက်ဆီးခြင်းအလုပ်ကိုသာ အောက်တန်းကျစွာ ပြုလုပ်နေတယ်လို့ ညီနောင်မဟာမိတ်အဖွဲ့ကပြောပါတယ်။
ဒါ့အပြင် ရှမ်းမြောက်မှာ လေကြောင်းတိုက်ခိုက်မှု လျော့နည်းသွားတဲ့အချိန် စစ်ကောင်စီဟာ ရခိုင်ပြည်နယ်ကို လေကြောင်းတိုက်ခိုက်မှု ပိုလုပ်လာတာကြောင့် အရပ်သားပြည်သူများစွာ ထိခိုက်ဒဏ်ရာရ၊ သေဆုံးမှုများရှိခဲ့တယ်လို့ ညီနောင်မဟာမိတ် ၃ ဖွဲ့က ဆိုပါတယ်။
CJ-002
#MeKongNews
#ရှမ်းမြောက်
#စစ်ကောင်စီ
#အပစ်ရပ်