မဲခေါင် ဇူလိုင် ၃
ရှမ်းပြည်တောင်ပိုင်း၊ လဲချားမြို့နယ် ဝမ်စိန်းကျေးရွာအနီးမှာ ဇူလိုင် ၁ ရက်နေ့ နေ့လယ်ပိုင်းက ရှမ်းတပ်နှစ်တပ် တိုက်ပွဲဖြစ်ပွားခဲ့တယ်လို့ သိရပါတယ်။
တိုက်ပွဲအတွင်း RCSS တပ်ဖွဲ့ဝင်တစ်ဦးရဲ့ အလောင်းနဲ့အတူ လက်နက်သိမ်းဆည်းရမိတယ်လို့ SSPP ရဲ့ထုတ်ပြန်ချက်အရ သိရပါတယ်။
“ ကိုယ့်လူမျိုးချင်းသတ်နေရတာကိုပဲ ကျေနပ်နေကြတာ၊ ဆက်ကြေးကောက်တာနဲ့ ကိုယ့်ပြည်သူကိုယ်ပြန်ဒုက္ခပေးနေတာပဲ ရှိတယ် လူထုက ဘယ်အဖွဲ့မှ မကာကွယ်ပေးကြဘူး” လို့ ရှမ်းအရပ်ဖက်အဖွဲ့အစည်းတစ်ခုရဲ့ ဦးဆောင်သံဃာ တစ်ပါးက မဲခေါင်ကို ပြောပါတယ်။
တိုက်ပွဲမှာ RCSS တပ်ဖွဲ့ဝင် တစ်ဦးကို M-16 ၁ လက် ၊ ကျည်အိမ် ၅ ခု၊ ကျည်ဆံ ၇၀ နဲ့အတူ ရရှိခဲ့တယ်လို့သိရပါတယ်။
မိုင်းနောင်မြို့နယ်အတွင်းက ဝမ်ပန်နဲ့နမ့်ဟူးရွာတွေအကြားမှာလဲ ရှမ်းတပ်ဖွဲ့တွေ ထောင်ထားတဲ့မိုင်းကို ဆိုင်ကယ်စီးလာတဲ့ ပေါက်ကျောင်း ရပ်ကွက်နေ လုံးယာကု၊ ၄၀ နှစ် ဟာ နင်းမိလို့ လက်မောင်းနဲ့ပေါင်မှာ ဒဏ်ရာတွေရခဲ့တယ်သိရပါတယ်။
ရှမ်းလက်နက်ကိုင် ၂ ဖွဲ့ဟာ ပြီးခဲ့တဲ့ ၂၀၂၃ ခုနှစ် ၊ နိုဝင်ဘာ ၂၉ ရက်နေ့က နှစ်ဖက်သဘောတူ အပစ်အခတ်ရပ်စဲထားပြီးနောက် ယခုတစ်ဖန်ပြန်လည် တိုက်ခိုက်နေကြတာဖြစ်ပြီး မြန်မာတစ်ပြည်လုံး စစ်အာဏာရှင်ကို တော်လှန်နေတဲ့ တိုင်းရင်းသားတပ်ဖွဲ့တွေ တိုက်ခိုက်နေတဲ့ စစ်ပွဲမှာ ဘယ်နေရာကမှ ပါဝင်တာမရှိဘဲ အချင်းချင်းသာ တိုက်ခိုက်နေကြလို့ ရှမ်းပြည်လူထုတစ်ရပ်လုံး စိတ်ပျက်နေကြတယ်လို့သိရပါတယ်။
MK-012