မဲခေါင်၊ ဇူလိုင် ၃
ရှမ်းမြောက်၊ လားရှိုးမြို့အပြင် အနီးတစ်ဝိုက်မှာ တိုက်ပွဲတွေဖြစ်ပွားနေပြီး MNDAA ကိုးကန့်တပ်တွေက နမ့်ပေါင်တံတားထိ ထိန်းချုပ်လိုက်နိုင်နေပြီလို့ မြေပြင်သတင်းတွေအရ သိရပါတယ်။
လားရှိုး-မိုင်းရယ်သွားလမ်းပေါ်က နမ့်ပေါင်တံတားက စစ်ကောင်စီတပ် ခလရ-၂၉၁ နဲ့ MNDAA တို့ ထိတွေ့ တိုက်ပွဲဖြစ်ပွားရာမှာ ယနေ့ ဇူလိုင် ၃ ရက်နေ့ မနက်ပိုင်းမှာ MNDAA ကိုးကန့်တပ်တွေက ထိန်းချုပ်ထားတာပါ။
မန်ဆန်ရေကျကျေးရွာမှာတော့ နေ့လည် ၁ နာရီခန့်မှာ အိမ်တအိမ်ပေါ် ဗုံးကျကွဲလို့ လူ ၁ ယောက် မျက်နှာနဲ့ခြေထောက်ဒဏ်ရာပြင်းထန်ရခဲ့တယ်လို့ သိရပါတယ်။
လားရှိုး အရှေ့မြောက်တိုင်းစစ်ဌာနချုပ်ထဲကို ကိုးကန့်တပ်တွေက ဒရုန်းနဲ့ဗုံးကြဲနေသလို လားရှိုးက ၁၆ မိုင်အကွာ နောင်မွန်မှာ တပ်စွဲထားတဲ့ ခမရ-၅၀၅(နမ့်လန်)ကို ကိုးကန့်တပ်တွေက တိုက်ထုတ်နိုင်ခဲ့တယ်လို့ သိရပြီး တိုင်းစစ်ဌာနချုပ်ထဲကနေ လက်နက်ကြီးနဲ့ မြို့ပြင်ပတ်ပတ်လည်ကို ပစ်ခတ်နေတယ်လို့ သိရပါတယ်။
ဂေါက်ကွင်းထဲကို ရှော့တိုက်ဒုံး ၁ လုံးကျရောက်ပေါက်ကွဲပေမယ့် လူအထိအခိုက်မရှိဘူးလို့ သိရပြီး မန်ဆူကားဂိတ်နားက သီလရှင်ကျောင်းနဲ့ စစ်တိုင်းရုံးသွားတဲ့လမ်း၊ ရပ်ကွက်-၁၁ နမ္မတူလမ်းခွဲ တောရကျောင်းနား၊ ကြေးအိုးဆိုင်နားတွေ လက်နက်ကြီး ဒရုန်းတွေကျပေမယ့် လူအထိအခိုက်ရှိ/မရှိ သီးခြားအတည်ပြုချက်မရသေးပါဘူး။
“ တချို့က ဘာမှမပြောနိုင်ကြတော့ဘူး၊ ကြောက်နေကြပြီလေ၊ ထွက်ဖို့က အခြေအနေမပေး၊ လက်နက်ကြီးက မိုးပေါ်က ဘယ်အချိန်ကျလာမယ်မသိ၊ သေမင်းကနီးနီးလေးဖြစ်နေတော့ လူတွေလဲ စားဖို့အနိုင်နိုင်ကို ဝယ်ခြမ်းနေကြရတာ၊ မြို့ထဲတော့ တိုက်ပွဲမဖြစ်သေးဘူး၊ ဖြစ်ရင်ကျည်ဆံအသေးတွေနဲ့ ပစ်ခတ်ခံရမှာ” လို့ ရပ်ကွက်-၇ က ဒေသသူ ၁ ဦးက မဲခေါင်သတင်းဌာနကို ပြောပါတယ်။
မနက်ပိုင်းက သာယာလမ်း ဗုံးကျလို့ သေသူ ၄ ဦးလို့ပဲသိခဲ့ရပေမယ့် ကလေး ၂ ဦးအပါ မိသားစု ၆ ဦးလုံး သေဆုံးရတာဖြစ်ပြီး နမ့်ပေါင်မှာ သေဆုံးတဲ့ ၃၉ နှစ်အရွယ်အမျိုးသမီးနဲ့ဆို လားရှိုးမှာ ဇူလိုင်လ ၃ ရက် တိုက်ပွဲအတွင်း လက်နက်ကြီးကြောင့် အရပ်သားပြည်သူ သေဆုံးသူ ၇ ဦးရှိပြီလို့ သိရပါတယ်။
ဒဏ်ရာရသူ တွေအနေနဲ့ ၃ ဦးရှိပြီး နမ့်ပေါင်က ၄၅ နှစ်အရွယ်အမျိုးသားနဲ့ သူ့သား ၁၂ အရွယ်ကလေး၊ မန်ဆန်ရေကျက ၂၅ နှစ်အရွယ် ဖြစ်ကာ အခြား သေဆုံးဒဏ်ရာရတွေ ရှိနေနိုင်တယ်လို့ သိရပါတယ်။
စစ်ကောင်စီက လားရှိုးမြို့နယ် နမ့်တွန်းရွာ၊ ၁၃ မိုင်ကုန်း၊ နမ့်ဟူးအမက တွေမှာ တိုက်ပွဲတွေဖြစ်နေပြီး စဉ့်အင်ဘက်က MNDAA အင်အားထောင်ကျော် လားရှိုးမြို့ကို သီပေါဘက်ကနေတိုက်နေတယ်လို့ သိရပါတယ်။
လက်ရှိမှာ လားရှိုးလေဆိပ်ကို ပိတ်လိုက်သလို မြို့ပတ်လည်က အီနိုင်း၊ မိုင်းတင်၊ မန်အိုင်၊ ကုန်းညောင်ဈ ရှန်ခိုက် စတဲ့ ကျေးရွာတွေမှာတိုက်ပွဲတွေ ဆက်တိုက်ဖြစ်နေတယ်လို့သိရပါတယ်။
MK-012
