မဲခေါင်၊ ဇွန် ၂၇
ရှမ်းမြောက်မှာ ဖြစ်ပွားနေတဲ့ ၁၀၂၇ စစ်ဆင်ရေးအဆက် ၃ရက်မြောက်နေ့ ဖြစ်တဲ့ ယနေ့ ဇွန်လ ၂၇ ရက် မနက်ပိုင်းမှာပဲ နောင်ချိုက ဒုံးတပ် ၆၀၆ ကို သိမ်းပိုက်လိုက်နိုင်ပြီလို့ TNLA က ပြောပါတယ်။
ဒုံးတပ် ၆၀၆ တပ်ရင်းကို TNLA နဲ့ MDY-PDF ပူးပေါင်းတပ်ဖွဲ့တွေက မနက် ၁၁ နာရီဝန်းကျင်မှာ တိုက်ခိုက်သိမ်းပိုက်ခဲ့တာကြောင့် စစ်ကောင်စီက Y-12 နဲ့ လာရောက်ဗုံးကြဲခဲ့တယ်လို့ ဆိုပါတယ်။
သီပေါမြို့မှာတော့ ညနေပိုင်းအထိ နှစ်ဖက် လက်နက်ကြီးလုံးရေ ၃၀ ခန့် အပြန်အလှန်ပစ်ခတ်ခဲ့ပြီး ငြိမ်သက်နေကာ ည ၂ နာရီကတည်းက မိုးသည်းထန်စွာရွာသွန်းနေတယ်လို့ သိရပါတယ်။
“ ညက မိုးတအားရွာတာ ခုထိပဲ၊ ညကလည်း ဘာသံမှမကြားရတာ ခုမှ တစ်လုံးစအသံကြားတယ်၊ ပုန်းကျင်းထဲဝင်နေရတယ်” လို့ ကျောက်မဲက Non CDM ဝန်ထမ်း တစ်ဦးက မဲခေါင်သတင်းဌာနကို ပြောပါတယ်။
သီပေါမြို့မှာ လျှပ်စစ်မီးလုံဝပြတ်နေတာ ၂ ရက်ရှိနေပြီး လူသွားလူလာမရှိသလောက်ဖြစ်နေတယ်လို့ သိရပါတယ်။ သီပေါမြို့ ပတ်လည်မှာ TNLA တွေ တပ်ဖြန့်ထားပြီး မြို့ကို ၀ိုင်းရံထားသလို စစ်ကောင်စီတပ်တွေကလည်း အဝင်အထွက်လမ်းကြောင်းနဲ့ သီပေါတံတားမှာ အခိုင်အမာ ခံစစ်ပြင်ထားတယ်လို့သိရပါတယ်။
MK-012
