မဲခေါင်၊ နိုဝင်ဘာ ၃
ရှမ်းမြောက်ဒေသက ၁၀၂၇ စစ်ဆင်ရေးမှာ ကရင်နီ အမျိုးသား ကာကွယ်ရေးတပ်ဖွဲ့ဝင်တွေ ပါဝင် တိုက်ခိုက် နေတယ်လို့ KNDF က ဒီကနေ့ နိုဝင်ဘာ ၃ ရက်မှာ အသိပေး ပြောဆိုလိုက်ပါတယ်။
ညီနောင် မဟာမိတ် ၃ ဖွဲ့ဖြစ်တဲ့ ကိုးကန့် (MNT JP/MNDAA)၊ တအောင်း (PSLF / TNLA)၊ ရက္ခိုင် (ULA/ AA) တို့ ဦးဆောင် တိုက်ခိုက်နေတဲ့ ၁၀၂၇ စစ်ဆင်ရေးမှာ KNDF တပ်ရင်း (၆၀၆) က စခန်းသိမ်း တိုက်ပွဲတွေမှာ ပါဝင် တိုက်ခိုက် နေတယ်လို့ ဆိုပါတယ်။
KNDF အနေနဲ့ ညီနောင် မဟာမိတ်တပ်တွေနဲ့ ပူးပေါင်းပြီး စစ်ရေးရည်မှန်းချက်တွေ အောင်မြင်တဲ့ထိ ပူးပေါင်း တိုက်ပွဲဝင်သွားမှာ ဖြစ်တယ်လို့လည်း ဖော်ပြထားပါတယ်။
အောက်တိုဘာ ၂၇ ရက်မှာ စတင်တဲ့ ၁၀၂၇ စစ်ဆင်ရေးအတွင်း ရှမ်းမြောက်ဒေသ ချင်းရွှေဟော်၊ ဖောင်းဆိုင်၊ ကြူကုတ်၊ သိန္နီ၊ ကွမ်းလုံမြို့တွေ အပါအဝင် စစ်ကောင်စီတပ်စခန်းပေါင်း ၁၀၀ နီးပါးထိ သိမ်းပိုက်ထားနိုင်ပြီလို့ ညီနောင် မဟာမိတ်တပ်ဖွဲ့က ပြောပါတယ်။
ဒီကနေ့ နမ့်ခမ်းမှာ မြို့တွင်း တိုက်ပွဲတွေ ပြင်းထန်နေပြီး ညီနောင် မဟာမိတ်တပ်ဖွဲ့တွေ မြို့ကို ထိန်းချုပ်နိုင်ဖို့ ကြိုးစားနေတယ်လို့ သိရပါတယ်။
MK-007
#MekongNews
#ရှမ်းမြောက်
#KNDF
#၁၀၂၇_စစ်ဆင်ရေး