မဲခေါင်၊ ဒီဇင်ဘာ ၁၆
ရှမ်းပြည်မြောက်ပိုင်း၊ နမ့်ခမ်းမြို့နဲ့ ၁ မိုင်ခန့်အကွာက စခန်းသစ်ကုန်း စစ်ကောင်စီစခန်းဆီ ရဟတ်ယာဉ်နဲ့ စစ်ကူပို့လိုက်တဲ့ စစ်ကောင်စီတပ်ကို TNLA က ကြားဖြတ်တိုက်ခိုက်ပြီး ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေထဲက ဗိုလ်မှူး ၁ ဦးနဲ့ တပ်သား ၂ ဦးကို သုံ့ပန်းအဖြစ် ဖမ်းမိခဲ့တယ်လို့ သိရပါတယ်။
စစ်ကောင်စီတပ်က စခန်းသစ်ကုန်း မကျစေရေးအတွက် ဒီဇင်ဘာ ၁၂ ရက်နေ့မှာ စစ်ကူ ၁၀၀ ခန့်ကို ရဟတ်ယာဉ်နဲ့ ၃ ကြိမ်ပို့ဆောင်ခဲ့တာကို TNLA က ကြားဖြတ်တိုက်ခိုက်ခဲ့တာကြောင့် အများအပြားသေဆုံးခဲ့ကာ ထွက်ပြေးသွားသူတွေလည်း ရှိကြပါတယ်။
ထွက်ပြေးသွားသူတွေကို TNLA က လိုက်လံရှင်းလင်းခဲ့ပြီး ဗိုလ်မှူး ၁ ယောက်၊ တပ်ကြပ်ကြီး ၁ ယောက်နဲ့ တပ်သား ၁ ယောက်ကို လက်နက်တွေနဲ့ ဒီဇင်ဘာ ၁၅ ရက်နေ့မှာ သုံ့ပန်းအဖြစ်ဖမ်းမိခဲ့တယ်လို့ ဒီနေ့မှာထုတ်ပြန်ပါတယ်။
စစ်ကောင်စီဟာ စခန်းသစ်ကုန်း မကျရေးအတွက် လေကြောင်းပစ်ကူ၊ လက်နက်ကြီးပစ်ကူတွေအပြင် စစ်ကူပို့ပြီး ခုခံနေတာပါ။ အဲ့ဒီစခန်းကို TNLA တိုက်ခိုက်တာ ၁ လခန့် ကြာမြင့်နေပါပြီ။
TNLA ထိန်းချုပ်ထားတဲ့ နမ့်ခမ်းမြို့ကိုလည်း စစ်ကောင်စီက လေကြောင်းက ဗုံးကြဲနေတာကြောင့် မြို့နေပြည်သူတွေ စစ်ဘေးရှောင် ထွက်ပြေးနေရပါတယ်။
တအာင်း(ပလောင်)ဒေသတွင်းမှာ စစ်ကောင်စီစခန်း ၆၀ ခန့်ကို TNLA က သိမ်းပိုက်ထားတာကြောင့် စစ်ကောင်စီကလည်း လေကြောင်းက ဗုံးကြဲတိုက်ခိုက်မှုတွေနဲ့ တုံ့ပြန်နေပါတယ်။
#MeKongNews
#နမ့်ခမ်း
#TNLA
#တအာင်း
#ပလောင်