မဲခေါင်၊ ဇူလိုင် ၁
ရှမ်းပြည်မြောက်ပိုင်း၊ မိုးမိတ်မြို့ရဲ့ လူနေအိမ်တွေမှာ စစ်ကောင်စီတပ်က အခိုင်အမာတပ်စွဲထားပြီး ဖြတ်သွားဖြတ်လာမြို့ခံတွေနဲ့ လူနေအိမ်တွေကို ချောင်းမြောင်း ပစ်ခတ်နေတယ်လို့ ဒေသခံတွေဆီက သိရပါတယ်။
စစ်ကောင်စီတပ်ဟာ ပြီးခဲ့တဲ့ ၂ ရက်လောက်ကစပြီး အထိုင်စခန်းမချတော့ဘဲ လက်ခုတ်သံရပ်ကွက်၊ ပလောင်ကုန်း၊ နမ့်မိတ်တံတား တစ်ဝိုက်က ၃ ထပ်တိုက်အိမ်တွေနဲ့ အ.ထ.က ၃ ကျောင်းတို့မှာ တပ်စွဲထားပြီး လက်နက်ကြီးနဲ့ ချောင်းမြောင်း ပစ်ခတ်နေတာပဲ ဖြစ်ပါတယ်။
“ သူတို့ ပစ်ချင်တဲ့အချိန် ထထပစ်တယ်။ ဘယ်ချိန်ပစ်မလဲ ဘယ်လိုမှ ခန့်မှန်းလို့မရဘူး။ အဲဘက်တွေဆို ဘယ်သူမှ ဖြတ်မလျှောက်ရဲဘူး။ ၃ ထပ်တိုက်ဘေး မှန်သမျှ ဖြတ်မသွားတာ အကောင်းဆုံးပဲ” လို့ မြို့တွင်း ကျန်ရှိနေဆဲဖြစ်သူ တစ်ဦးက ပြောပါတယ်။
လတ်တလော အနီးတစ်ဝိုက်က မိုးကုတ်မြို့မှာ တိုက်ပွဲပြင်းထန်နေပြီး မိုးမိတ်မြို့မှာတော့ တိုက်ပွဲမဖြစ်သေးပေမယ့် ၁၀၂၇ စစ်ဆင်ရေး ဒုတိယပိုင်း စတင်တဲ့ ဇွန်လ ၂၅ ရက်နေ့ကတည်းက မြို့ခံအများစုဟာ တိမ်းရှောင်သွားကြပြီလို့ သိရပါတယ်။
“ သူတို့ အိမ်တွေကို ဝင်လာပြီး တပ်စွဲရင် အိမ်သားတွေကို ဘာမှမလုပ်ဘူး။ တခြားနေရာကိုပဲ ချောင်းပစ်တာ။ ဒါပေမယ့် သူတို့ဝင်နေတဲ့ အိမ်တွေအကုန်လုံး ကြောက်ပြီး ထွက်ပြေးကြပြီ” လို့ မြို့တွင်း ကျန်ရှိနေဆဲဖြစ်သူ တစ်ဦးက ဆက်ပြောပါတယ်။
လတ်တလောမှာ မန္တလေး – မိုးကုတ် လမ်းပေါ်က မတ္တရာ၊ စဉ့်ကူးနဲ့ သပိတ်ကျဉ်းတွေမှာ တိုက်ပွဲပြင်းထန်နေတာကြောင့် မြို့ခံအများစုဟာ ဝေးလံတဲ့ နေရာတွေကို သွားလာရခက်ခဲနေပြီး နီးစပ်ရာတောတွင်းနေရာတွေမှာပဲ တိမ်းရှောင်နေကြတယ်လို့ ဆိုပါတယ်။
မနေ့ (ဇွန် ၃၀)ကလည်း မိုင်းမိတ်မြို့နယ်မှာရှိတဲ့ စစ်ကောင်စီရဲ့ ကင်းချောင်းစခန်းကို တအာင်းအမျိုးသား လွတ်မြောက်ရေးတပ်မတော် (TNLA)က အပြီးသတ် သိမ်းယူနိုင်ခဲ့ပြီး မကြာမီရက်ပိုင်းအတွင်းမှာ မြို့သိမ်းတိုက်ပွဲ ဖော်ဆောင်သွားနိုင်တယ်လို့ မြေပြင်သတင်းအရင်းအမြစ်တွေဆီက သိရပါတယ်။
MK-015
