မဲခေါင် ၊ ဇန်နဝါရီ ၁၉
တအာင်းတပ်မတော် – TNLA တပ်မဟာ ၃ ဒေသ မိုးမိတ်မြို့နယ်မှာ ဇန်နဝါရီ ၁၉ ရက် တစ်ရက်တည်းအတွင်း စစ်ကောင်စီက လေယာဉ်နဲ့ ၁၆ ကြိမ်ထက်မနည်း ဗုံးကြဲပစ်ခတ်တိုက်ခိုက်ခဲ့တယ်လို့ TNLAက မနေ့ညမှာ သတင်းထုတ်ပြန်ပါတယ်။
ဇန်နဝါရီ ၁၈ ရက် မနက် ၉နာရီခန့်ကနေ နေ့လည် ၁၂ နာရီကျော်အထိ မိုးမိတ်မြို့ ၊ အုန်းကျော် နဲ့ ရွှေဆာလီရွာအနီးတဝိုက်ကို စစ်ကောင်စီက ဂျက်ဖိုက်တာလေယာဉ်နဲ့ ၈ ကြိမ် ၊ ATR – 72လေယာဉ် နဲ့ ၃ ကြိမ် ၊ Y12လေယာဉ် နဲ့ ၅ ကြိမ် လာရောက်ဗုံးကြဲပစ်ခတ်တိုက်ခိုက်ခဲ့တာဖြစ်တယ်လို့ TNLA ကဆိုပါတယ်။
စစ်ကောင်စီရဲ့ အခုလုပ်ရပ်ဟာ အပစ်ခတ်ရပ်စဲရေးလက်မှတ်ကို အကြိမ်ကြိမ်ပေါ်တင် ချိုးဖောက်တာဖြစ်တယ်လို့လည်း TNLAက ဆိုပါတယ်။
ပြီးခဲ့တဲ့ ဇန်နဝါရီလ ၁၁ ရက်နေ့မှာ စစ်ကောင်စီနဲ့ ညီနောင်မဟာမိတ်အဖွဲ့အကြား အပစ်ခတ်ရပ်စဲရေးလက်မှတ်ထိုးခဲ့ပေမယ့် စစ်ကောင်စီတပ်ဟာ မိုးမိတ် ၊ ကျောက်မဲ ၊ မိုးကုတ် ၊ လားရှိုးမြို့နယ်တွေကို ဒီကနေ့အထိ လက်နက်ကြီး လေကြောင်းတိုက်ခိုက်မှု နေ့စဉ်ပြုလုပ်လျက်ရှိတယ်လို့ TNLA က ထုတ်ပြန်ချက်မှာဖော်ပြထားပါတယ်။
မိုးမိတ်မြို့နယ်မှာ စစ်ကောင်စီ နဲ့ ကချင်လွတ်လပ်ရေးတပ်မတော် – KIA ပူးပေါင်းတပ်တို့လည်း တိုက်ပွဲဖြစ်ပွားနေပြီး စစ်ကောင်စီရဲ့ မိုးမိတ်မြို့မရဲစခန်းက အလံဖြူထောင်ပြီး လက်နက်ချခဲ့ပါတယ်။
တိုက်ပွဲအတွင်း စစ်ကောင်စီဘက်က ဗုံးကြဲတိုက်ခိုက်မှုကြောင့် မိုးမိတ် ဒေသခံ ၆ ဦးထက်မနည်း ထိခိုက်ဒဏ်ရာရပြီး ၁ ဦး သေဆုံးခဲ့ရပါတယ်။
CJ002
#MeKongNews
#မိုးမိတ်
#စစ်ကောင်စီ
#လေကြောင်း
#တိုက်ခိုက်
#တအာင်း