မဲခေါင်၊ ဇူလိုင် ၂
မန္တလေးတိုင်း၊ မတ္တရာမြို့နယ်အတွင်းမှာရှိတဲ့ စစ်ကောင်စီရဲ့ လေကြောင်းရန်ကာကွယ်ရေးတပ် (၁၀၁၄) အပါအဝင် တပ်စခန်း ၈ ခုကို သိမ်းပိုက်နိုင်ခဲ့ပြီလို့ မန္တလေး PDF က ဒီနေ့ ဇူလိုင် ၂ ရက်မှာ ထုတ်ပြန်လာပါတယ်။
စစ်ကောင်စီရဲ့ (၁၀၁၄) လေကြောင်းရန်ကာကွယ်ရေး အင်ကြင်းမြိုင်တပ်စခန်း၊ ဆည်တော်တပ်စခန်း၊ ပန်းသလဲတောင် တပ်စခန်း၊ ရေစိုတောင် တပ်စခန်း၊ နေကျော်တောင် တပ်စခန်း၊ ရွှေပုထိုး တပ်စခန်း၊ ကျောက်ခလုတ် တပ်စခန်းနဲ့ Alpha ဘိလပ်မြေစက်ရုံရဲ့ စိုးမိုးကုန်းဖြစ်တဲ့ မြေနီတောင် တပ်စခန်းတွေကို သိမ်းပိုက်နိုင်ခဲ့တာပဲ ဖြစ်ပါတယ်။
တိုက်ပွဲအတွင်း စစ်သုံ့ပန်းနဲ့ လက်နက်ချအညံ့ခံတဲ့ စစ်ကောင်စီတပ်ဖွဲ့ဝင် ၆၄ ဦးကို အရှင်ဖမ်းမိခဲ့ပြီး လက်နက်မျိုးစုံ (၁၂၅) လက်နဲ့ ဆက်စပ်ခဲယမ်းအများအပြားကိုလည်း သိမ်းဆည်းထားနိုင်ခဲ့တယ်လို့ မှတ်တမ်းဓာတ်ပုံတွေနဲ့တကွ ဖော်ပြထားပါတယ်။
ဖမ်းဆီးရမိတဲ့ စစ်သုံ့ပန်းတွေကို လူ့အခွင့်အရေးနဲ့အညီ ထိန်းသိမ်းထားပြီး စစ်တပ်မိသားစုဝင်တွေဖြစ်တဲ့ အမျိုးသမီး၊ သက်ကြီးရွယ်အိုနဲ့ ကလေးသူငယ်များ စုစုပေါင်း (၁၁၇) ဦးခန့်ကိုလည်း စားဝတ်နေရေး စီစဥ်ပေးထားတယ်လို့ ထုတ်ပြန်ချက်အရ သိရပါတယ်။
မတ္တရာမြို့နယ်အတွင်းမှာရှိတဲ့ စစ်ဆင်ရေးတွေမှာ မန္တလေး PDF နဲ့အတူ ဒေသခံအဖွဲ့အစည်းဖြစ်တဲ့ မတ္တရာမျိုးမှန်တပ်ဖွဲ့လည်း ပူးပေါင်းပါဝင်တိုက်ခိုက်နေပြီး သတ်မှတ်ထားတဲ့ စစ်ရေးပစ်မှတ်တွေကို ဆက်လက်ထိုးစစ်ဆင် တိုက်ခိုက်နေတယ်လို့ ဆိုပါတယ်။
မန္တလေး PDF က ၁၀၂၇ စစ်ဆင်ရေး ဒုတိယပိုင်း ၈ရက်မြောက်နေ့အဖြစ် တအောင်းအမျိုးသား လွတ်မြောက်ရေးတပ်မတော် (TNLA) ရဲ့ ဦးဆောင်မှုနဲ့အတူ နောင်ချို၊ မိုးကုတ်၊ ကျောက်မဲနဲ့ မတ္တရာမြို့တွေမှာ စစ်ဆင်ရေးဖော်ဆောင်နေပြီး စခန်းသိမ်းတိုက်ပွဲတွေဆင်နွှဲနေတယ်လို့ သိရပါတယ်။
MK-015
