မတ် ၁၄၊ ၂၀၂၄
ကချင်ပြည်နယ်၊ မိုးညင်းခရိုင်၊ ဖားကန့် နမ့်မှော် အနီးက တန် – ၃၀၀၀ စစ်ကောင်စီစခန်းကို မတ်လ ၁၃ ရက်နေ့ မနက် ၁၁ နာရီ ခွဲဝန်းကျင်ခန့်က KIA နဲ့ ပူးပေါင်း မဟာမိတ် တပ်ဖွဲ့က သိမ်းပိုက်လိုက်ကြောင်း KIA ရှေ့တန်းနဲ့ နီးစပ်သူတွေဆီက သိရပါတယ်။
“ တန် – ၃၀၀၀ စခန်းကို သိမ်းလိုက်တာဟုတ်တယ်။ မနေ့က မနက်ပိုင်း ၁၁ နာရီခွဲ လောက်က” လို့ KIA ရှေ့တန်းနဲ့ နီးစပ်သူ တစိဦးက ပြောပါတယ်။
သိမ်းဆည်းရရှိထားတဲ့ ပစ္စည်းတွေနဲ့ ဖမ်းဆီးဆီးထားတဲ့ သုံ့ပန်းတွေ ဘယ်လောက်လဲ ဆိုတာတော့ မသိရသေးဘူးလို့ သူက ပြောပါတယ်။
“ ညကတည်းက သူတို့ ပြေးသွားတာထင်တယ်။ အဲဒီ နားက တာဝါတိုင်ကုန်းမှာလည်း စစ်ကောင်စီ ၁၀ ယောက်လောက်ဖမ်းမိထားတယ်ပြောတယ်။ မနေ့က KIA နဲ့ ပူးပေါင်း တပ်ဖွဲ့က ရှင်းလင်းရေး လုပ်နေကြတယ်။ ရွာက လူတွေကိုတော့ ပြန်လာလို့ ရပြီပြောတယ်။ ဒါပေမယ့် တချို့တော့ ပြန်မလာကြသေးဘူး” လို့ သူက ရှင်းပြပါတယ်။
အဲဒီ စစ်ကောင်စီတပ်စခန်းကို KIA နဲ့ ပူးပေါင်း အဖွဲ့တွေက မတ်လ ၁၀ ရက်နေ့ ညနေပိုင်းက သွားရောက်တိုက်ခိုက်ခဲ့ပြီး ပိတ်ဆို့ထားခဲ့တာလို့ ဆိုပါတယ်။
တိုက်ပွဲ ပြင်းထန်ခဲ့တဲ့ မတ်လ ၁၀ ရက်နေ့ညက ဖားကန့် စစ်ကောင်စီဘက်က လက်နက်ကြီး ပစ်လိုက်တဲ့ လက်နက်ကြီးကျည် ၂ လုံး ကျောက်စိမ်းကုမ္ပဏီဝင်း တခုမှ ကျရောက်ပေါက်ကွဲကာ လူ ၄ ဦး သေဆုံးပြီး ၁ ဦး ထိခိုက်ဒဏ်ရရှိခဲ့တယ်လို့ ဆိုပါတယ်။
ဖားကန့် လမ်းကြောက ဝှေခါ၊ နန့်တိန်၊ တာမခန်၊ ကသိုဏ်းတောင် စစ်ကောင်စီ စခန်းတွေကို ပြီးခဲ့တဲ့ လပိုင်းနဲ့ ရက်ပိုင်းတွေက KIA နဲ့ ပူးပေါင်း မဟာမိတ်တပ်ဖွဲ့ တွေက သိမ်းပိုက်ရရှိထားပြီ ဖြစ်ပါတယ်။
CJ-008
