မဲခေါင်၊ နိုဝင်ဘာ ၂
ရှမ်းပြည်နယ် မြောက်ပိုင်း၊ မူဆယ်ခရိုင်၊ ပန်ဆိုင်းမြို့က စစ်ကောင်စီ တပ်စခန်းကို မနေ့ နိုဝင်ဘာ ၁ ရက်နေ့ ညနေပိုင်းက ကိုးကန့် MNDAA တပ်ဖွဲ့က သိမ်းပိုက်လိုက်တယ်လို့ ဒေသခံတွေက ပြောပါတယ်။
“ မနေ့ ညနေ ၃ နာရီခွဲလောက်က သိမ်းလိုက်တယ်။ သူတို့က အဲမှာ မနေပါဘူး။ ပြန်သွားပြီ။ လက်နက်ခဲယမ်း ပစ္စည်းတွေ သိမ်းယူပြီး ပြန်လှည့်သွားတဲ့ ပုံစံပေါ့” လို့ ဒေသခံ တစ်ဦးက ပြောပါတယ်။
ပန်ဆိုင်းမြို့ အနီးအနားမှာ စစ်ကောင်စီတပ်စခန်း မရှိတော့ဘူးလို့ သူကဆိုပါတယ်။
“ စစ်သားတွေက ထွက်ပြေးကုန်တာ။ တချို့က နယ်စပ်ဘက်ပေါ့။ တရုတ် နယ်စပ်” လို့ ဒေသခံ အမျိုးသား တစ်ဦးက ပြောပါတယ်။
မနေ့ မနက် ၈ နာရီဝန်းကျင်မှာတော့ စစ်ကောင်စီ လေယာဉ်နဲ့ ဗုံးကြဲရာ ပန်ဆိုင်းမြို့ထဲက ရပ်ကွက်တွေမှာ ကျရောက် ပေါက်ကွဲလို့ လူ ၄ ဦးထက်မနည်း ဒဏ်ရာရရှိကာ နေအိမ် အများအပြား ပျက်စီးခဲ့ပါတယ်။
ပြီးခဲ့တဲ့ အောက်တိုဘာ ၃၁ ရက်နေ့၊ ညနေ ၆ နာရီကျော် ဝန်းကျင်ကလည်း ပန်ဆိုင်းမြို့အနီး စစ်ကောင်စီ ဗုံးကြဲ တိုက်ခိုက်ပြီးနောက် ပန်ဆိုင်းမြို့ ရဲစခန်းကို MNDAA က သိမ်းပိုက်ခဲ့တယ်လို့ သိရပါတယ်။
ပန်ဆိုင်းမြို့ အဝင်က စစ်ကောင်စီ စခန်းငယ် ၁ ခုကိုတော့ ၁၀၂၇ စစ်ဆင်ရေး ပထမနေ့မှာ သိမ်းပိုက် မီးရှို့ခဲ့တာ ဖြစ်ပါတယ်။
CJ-008
#MekongNews
#ပန်ဆိုင်းမြို့
#MNDAA
#ဗုံးကြဲ