မဲခေါင်၊ မတ် ၁၉
ရှမ်းပြည်တောင်ပိုင်း၊ ပအိုဝ်းဒေသက ပင်လောင်းမြို့နယ်၊ ဆောင်းပြောင်းရွာ အခြေစိုက် စစ်ကောင်စီတပ်စခန်းကို PDF တော်လှန်ရေးတပ်ဖွဲ့တွေက ယမန်နေ့ မတ်လ ၁၈ ရက် မှာ သိမ်းပိုက်လိုက်ပြီလို့ ဒေသသတင်းအရင်းအမြစ်တွေထံက သိရပါတယ်။
ပင်လောင်းတောင်ဘက် ဆောင်းပြောင်းရွာမှာ အခြေပြုထားတဲ့ စစ်ကောင်စီတပ်စခန်းမှာ မတ်လ ၁၇ ရက်ကတည်းက တိုက်ပွဲဖြစ်ပွားခဲ့တာဖြစ်ပြီး တိုက်ပွဲတွေဖြစ်ပွားနေစဉ်မှာ စစ်ကောင်စီဘက်က လေကြောင်နဲ့ လက်နက်ကြီးတွေ ပစ်ကူနေတဲ့ကြားက တပ်စခန်းကို လက်ရသိမ်းပိုက်နိုင်ခဲ့တာလို့ သိရပါတယ်။
တိုက်ပွဲဖြစ်တဲ့နေ့မတိုင်မီကတဲက PDF က ဒေသခံပြည်သူတွေကို နောင်ဝိုး၊ နန်းဖောမူ၊ ဗန်းမောက်၊ ဆောင်းပြောင်းနဲ့ ပီကင်းလမ်းတွေကို ကုန်းလမ်းရေလမ်းတွေနဲ့ မသွားမလာကြဖို့ မတ်လ ၁၆ ရက်က ကြိုတင်ထုတ်ပြန်ခဲ့ပါတယ်။
ဆောင်းပြောင်းရွာဟာ ပင်လောင်းမြို့တောင်ဘက်၊ ဖယ်ခုံမြို့အကြားမှာရှိပြီး ဖယ်ခုံမြို့နဲ့ ၅ မိုင်သာကွာဝေးပါတယ်။ ဒေသခံအများစုက ပင်လောင်း၊ နောင်တရားနဲ့ညောင်ရွှေမြို့ဘက်တွေကို ကြိုတင်စစ်ဘေးရှောင်သွားကြပြီး ရွာခံအနည်းငယ်ပဲကျန်နေတာလို့ သိရပါတယ်။
လက်ရှိမှာတော့ ဆောင်းပြောင်းနဲ့အနီးဆုံး ဖယ်ခုံမြို့မှာ စစ်ကောင်စီ ရှေ့တန်းတပ်မဌာနချုပ် တစ်ခုရှိနေပေမယ့် မြို့နဲ့ဝန်းကျင်ကိုတော့ PDF တွေက ထိန်းချုပ်ထားတယ်လို့ သိရပါတယ်။
ဆောင်းပြောင်းတိုက်ပွဲကို မိုးဗြဲ၊ ဖယ်ခုံ စစ်ဆင်ရေး မဟာမိတ်အင်အားစုတွေက တိုက်ခဲ့တာလို့ သိရပါတယ်။
MK-012
