မဲခေါင်၊ ဇွန် ၂၈
ရှမ်းမြောက်၊ နောင်ချိုမြို့က စစ်ကောင်စီတပ် ခမရ-၁၁၅ ကို TNLA နဲ့ MDY-PDF ပူးပေါင်းတပ်ဖွဲ့က တိုက်ခိုက်သိမ်းပိုက်ရာမှာ စစ်ကောင်စီလက်နက် မျိုးစုံ ၃၈၀ ကျော် သိမ်းပိုက်ရှိတယ်လို့ သိရပါတယ်။
TNLA နဲ့ MDY-PDF ပူးပေါင်းတပ်ဖွဲ့က ခမရ-၁၁၅ ကို ပြီးခဲ့တဲ့ ဇွန်လ ၂၆ ရက် ညနေပိုင်းကတည်းက တိုက်ခိုက်သိမ်းပိုက်နိုင်ခဲ့သလို ကံကော်တပ်စခန်းနဲ့ အခြားတပ်စခန်းကလည်း လက်နက်မျိုးစုံ ၅၀ ကျော် ကိုလည်း သိမ်းဆည်းရမိခဲ့တာအပြင် လက်နက်ငယ် ကျည်မျိုးစုံ ၅ သောင်းကျော်၊ အာပီဂျီ အပါအဝင် နောက်ပွင့်ကျည်၊ စိန်ပြောင်းကျည် ၅၀၀ ကျော်နဲ့ ဗုံးသီး၊ မိုင်းနဲ့စကားပြောစက်များ သိမ်းဆည်းရခဲ့တယ်လို့ သိရပါတယ်။
ယနေ့ ဇွန်လ ၂၈ ရက်နေ့ မနက်ပိုင်းအထိ ခမရ-၁၁၄ ကိုလည်း တိုက်ခိုက်သိမ်းပိုက်နိုင်ခဲ့တယ်လို့ သိရပြီး ခမရ-၁၁၅က အင်အားတွေဟာ သွားရောက်ပူးပေါင်းခဲ့ပြီး အင်အား ၁၀၀ ကျော်နဲ့ ကုန်းမြင့်အနေအထား အပေါ်စီးရယူကာ ခံစစ်ပြင်ခဲ့တာဖြစ်ပါတယ်။ စစ်ကောင်စီက Y-12 လေယာဉ်၊ ဂျက်ဖိုက်တာတွေနဲ့ မနေ့ ဇွန် ၂၇ ရက်နေ့ တစ်နေ့လုံး ဗုံးကြဲ တိုက်ခိုက်နေခဲ့တယ်လို့ သိရပါတယ်။
မနေ့ညနေပိုင်းက စစ်ကောင်စီရဲ့ လက်နက်ကြီးကျရောက်ပေါက်ကွဲမှုကြောင့် နောင်ချိုမြို့ ရပ်ကွက်-၄ က ကိုကျော်နန္ဒာ ၂၄ နှစ် ခြေထောက်ထိမှန် ဆုံးရှုံးခဲ့ရသလို ယင်းရပ်ကွက်ကပင် မချယ်ရီထိန်း ၂၃ နှစ်နဲ့ မထက်ရီဝင်း ၁၆ နှစ်တို့ကို စစ်ကောင်စီတပ်က ပစ်သတ်လို့ သေဆုံးခဲ့ရတယ်လို့သိရပါတယ်။
နောင်ချိုရဲစခန်းကို သိမ်းယူပြီးနောက် စခန်းအတွင်းမှ ယာမဆေးပြားများစွာနဲ့ မူးယစ်ဆေးဝါးအမြောက်အများကို ရှာဖွေသိမ်းဆည်းရမိခဲ့တယ်လို့ သိရပါတယ်။
MK-012
