မဲခေါင်၊ အောက်တိုဘာ ၃၁
ရှမ်းပြည်နယ် မြောက်ပိုင်း၊ နမ္မတူမြို့နယ်၊ မုံးမော်ရွာ အနီးက စစ်ကောင်စီ စခန်း တစ်ခုကို မနေ့ အောက်တိုဘာ ၃၀ ရက်နေ့မှာ KIA တပ်မဟာ (၄)၊ တပ်ရင်း (၈) က တိုက်ခိုက် သိမ်းပိုက်ခဲ့ကြောင်း KIA ရှေ့တန်း သတင်းရင်းမြစ်တွေထံက သိရပါတယ်။
“ နမ္မတူက မုံးမော် စစ်ကောင်စီ စခန်းလည်း KIA က မနေ့ ညနေ ၆ နာရီလောက်မှာ သိမ်းတာ။ ဖောင်းဆိုင် စစ်ကောင်စီ ဗျူဟာလည်း မနေ့ည ၆ နာရီလောက်က ကိုးကန့်တွေ သိမ်းလိုက်တာ” လို့ KIA ရှေ့တန်း သတင်းရင်းမြစ်နဲ့ နီးစပ်သူ တစ်ဦးက ပြောပါတယ်။
တိုက်ပွဲ အတွင်း စစ်ကောင်စီဘက်က လေကြောင်းကနေ ဗုံးကြဲ တိုက်ခိုက်တာကြောင့် ဘုရားကျောင်း အဆောင်နဲ့ ခန်းမဆောင် ထိမှန်ပျက်စီး ခဲ့တယ်လို့ သူက ပြောပါတယ်။
တိုက်ပွဲ စတင်ကတည်းက ဒေသခံတွေ ကြိုတင် တိမ်းရှောင်ခဲ့တာကြောင့် လေကြောင်း တိုက်ခိုက်စဥ် ထိခိုက် တာတွေ မရှိဘူးလို့ ဆိုပါတယ်။
“ တိုက်နေတာ ၂ ရက်လောက် ရှိပြီ။ စစ်ကောင်စီဘက်က လေကြောင်း တွေလည်း ဆက်တိုက် ပစ်တယ်” လို့ ရှေ့တန်း သတင်းရင်းမြစ်က ပြောပါတယ်။
စခန်းသိမ်း တိုက်ပွဲ အတွင်း ၂ ဖက်ထိခိုက် ကျဆုံးမှုနဲ့ လက်နက်ခဲယမ်း သိမ်းဆည်းရရှိတဲ့ အခြေအနေတွေကိုတော့ မသိရသေးပါဘူး။
လက်ရှိ ရှမ်းပြည်နယ် မြောက်ပိုင်းမှာ စစ်ကောင်စီတပ်ဟာ ၁၀၂၇ စစ်ဆင်ရေးအဖွဲ့ အပြင် KIA နဲ့လည်း တိုက်ပွဲ ဆက်လက် ပြင်းထန်နေတာ ဖြစ်ပါတယ်။
CJ-008
#MekongNews
#နမ္မတူမြို့နယ်
#မုံးမော်_စစ်ကောင်စီစခန်း
#KIA
