မဲခေါင်၊ နိုဝင်ဘာ ၃
ရှမ်းပြည်နယ်မြောက်ပိုင်း နမ့်ခမ်းမြို့နဲ့ မန့်ဝိန်းကြီးကြားက ရွှေလီကြိုးတံတားရှိ စစ်ကောင်စီတပ်စခန်းကို တအာင်းအမျိုးသားတပ်မတော်- TNLAက ဒီကနေ့မနက် ၆ နာရီဝန်းကျင်မှာ ဝင်ရောက်သိမ်းပိုက်နိုင်ခဲ့ပါတယ်။
စစ်ကောင်စီတပ်စခန်း သိမ်းပိုက်ခံရပြီးနောက် နမ့်ခမ်းမြို့ မြို့ပတ်လည်ဘုရားမှာတပ်စွဲထားတဲ့ စစ်ကောင်စီတပ်နဲ့ ပြည်သူ့စစ်ပူးပေါင်းတပ်တွေက သိမ်းခံရတဲ့စခန်းဘက်ကို ဆက်လက်ထိုးစစ်ဆင်ဖို့ သွားရာကနေ အောင်မေတ္တာရပ်ကွက်အနီးမှာ TNLAက ကြားဖြတ်တိုက်ခိုက်လို့ လက်ရှိအချိန်ထိ တိုက်ပွဲပြင်းထန်နေပါတယ်။
“ရွှေလီတံတားဘက်က စခန်းကို TNLA ပိုင်ပိုင်နိုင်နိုင် သိမ်းလိုက်ပြီလေ။ အဲဘက်သွားဖို့ သူတို့အထုပ်အပိုးတွေပြင်ကတည်းက TNLAက တိုက်ဖို့စောင့်နေတာ။ အခုတော့ မြို့ထဲမှာ သေနတ်သံတွေဘဲ” လို့ မြို့ခံအမျိုးသားတစ်ဦးက ပြောပါတယ်။
စစ်ကောင်စီတပ်က နမ့်ခမ်းမြို့ထဲမှာ ဂျက်လေယာဉ်နဲ့ ဗုံးကြဲတိုက်ခိုက်လို့ အောင်မေတ္တာရပ်ကွက်ထဲနဲ့ ကျေးရွာဘက်မှာ နေအိမ်တွေထိခိုက်ပျက်ဆီးတာရှိပေမယ့် ထိခိုက်မှုအသေးစိတ်ကိုတော့ မသိရသေးဘူးလို့ ဆိုပါတယ်။
လူထိခိုက်မှုနဲ့ အိမ်ထိခိုက်ပျက်ဆီးမှုကိုတော့ မဲခေါင်သတင်းဌာနက ဆက်လက် စုံစမ်းနေဆဲပါ။
နမ့်ခမ်းမြို့-မန့်ဝိန်းကြီးကြားက ရွှေလီကြိုးတံတားရှိ စစ်ကောင်စီတပ်စခန်းထဲမှာ လက်နက် (၄)လက်၊ 60MM ဗုံးသီး(၃၀)လုံး၊ RPG အသီး (၈)လုံး၊ လက်ပစ်ဗုံး(၅၀)လုံး၊ ကျည်ဆံအများအပြားနဲ့ စစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ TNLAဘက်က ဒီကနေ့ မနက် တရားဝင်ထုတ်ပြန်ခဲ့ပါတယ်။
CJ-014
#MeKongNews
#နမ့်ခမ်း
#TNLA
#စစ်ကောင်စီ
#သိမ်းပိုက်
#ရှမ်းမြောက်