မဲခေါင်၊ ဇန်န၀ါရီ ၂၉
ကရင်အမျိုးသားအစည်းအရုံး (KNU) ရဲ့ တပ်မဟာ ၂ နယ်နယ်မြေဖြစ်တဲ့ တောင်ငူခရိုင်အတွင်းမှာ ၂၈ နှစ်ကြာတပ်စွဲထားတဲ့ စစ်ကောင်စီစခန်းတွေ ဇန်န၀ါရီ ၁၃၊ ၁၄၊ ၁၅ ရက်တွေမှာ ဆုတ်ခွာသွားကြတယ်လို့ KNU က ဒီနေ့ ဇန်န၀ါရီ ၂၇ မှာ ထုတ်ပြန်ပါတယ်။
စစ်ဆင်ရေးကွပ်ကဲမှုဌာနချုပ် (စကခ-၂၀) လက်အောက်မှာရှိတဲ့ ခမရ-၅၂၈ နဲ့ ခမရ-၅၃၉ တပ်စခန်းတွေဟာ ထီးတော်ပယ်၊ ဘူဆာခီးနဲ့ သီးမူပေါ်စိုးစခန်းတွေကို စစ်ကောင်စီတပ်ဟာ စွန့်ခွာသွားကြပြီး နောက်တန်းစခန်းတွေမှာ အင်အားပြန်လည်စုစည်းနေတယ်လို့ KNU ထုတ်ပြန်ချက်က ဆိုပါတယ်။
“ရိက္ခာဖြတ်တောက်ခံရလို့ ပြန်ဆင်းတာကတကြောင်းပေါ့။ “၁၀၂၇” “၁၁၁၁” စစ်ဆင်ရေးတွေရဲ့ နောက် ဆက်တွဲနဲ့ တောင်ငူမြို့နားအထိ မိမိတို့ရဲ့တော်လှန်ရေးတပ်ဖွဲ့တွေက တိုက်ပွဲများပိုမိုဖော်ဆောင်လာနိုင်တဲ့ အတွက် မြို့တွင်းနောက်တန်းစခန်းများမှာ အင်းအားပြန်လည်စည်းရုံးတာလည်း ပါနိုင်တယ်” လို့ KNU ရဲ့ တောင်ငူခရိုင်ပြောရေးဆိုခွင့်ရှိသူက ပြောပါတယ်။
စစ်ကောင်စီစွန့်သွားတဲ့ အဲ့ဒီ့စခန်းတွေကို ကရင်အမျိုးသားကာကွယ်ရေးတပ် (KNDO) တပ်ရင်း (၄)နဲ့ တပ်မဟာအထူးတပ်ဖွဲ့တို့က ဇန်န၀ါရီ ၂၀ ရက်နေ့မှာ သွားရောက်ရှင်းလင်းခဲ့တယ်လို့ ဆိုပါတယ်။
အဲ့ဒီ့စခန်းတွေကို KNLA နဲ့ KNDO တို့က လနှင့်ချီ ရိက္ခာဖြတ်တောက်ခဲ့ပြီးနောက် စစ်ကောင်စီအဖွဲ့ဟာ စွန့်ခွာသွားကြတာပါ။
ဘူဆာခီးစခန်းကို ရိက္ခာလာပို့တဲ့အဖွဲ့ကို ၂၀၂၃ ခုနှစ်၊ မေလမှာ KNU တပ်မဟာ ၂ က ကြားဖြတ်တိုက်ခိုက်ခဲ့တာကြောင့် မြေပြင်က ရိက္ခာပို့မရတော့ဘဲ လေကြောင်းကနေသာ ရိက္ခာပို့ရတဲ့ စခန်းဖြစ်ပါတယ်။
အဲ့ဒီ့စခန်းတွေဟာ ၁၉၉၅ ခုနှစ်၊ နို၀င်ဘာလ ၁၅ ရက်နေ့မှာ စစ်ကောင်စီက ၀င်ရောက်တပ်စွဲခဲ့တဲ့ တပ်စခန်းတွေဖြစ်တယ်လို့ သိရပါတယ်။ စွန့်ခွာသွားတဲ့ စစ်ကောင်စီတပ်ဟာ ဘောဂလိကြီးရွာဘက်ကို ထွက်ပြေးသွားပြီး အင်အားဖြည့်တင်းနေတယ်လို့ သိရပါတယ်။
#MeKongNews
#စစ်ကောင်စီ
#စွန့်ခွာ
#ခံစစ်
#နောက်တန်း