မဲခေါင်၊ ဇန်နဝါရီ ၁၅
ရှမ်းပြည်နယ်မြောက်ပိုင်း၊ မိုးမိတ်မြို့မှာ မနေ့ ဇန်နဝါရီ ၁၄ ရက် နေ့လယ်နဲ့ ညပိုင်းတွေမှာ စစ်ကောင်စီတပ်ဖွဲ့က လက်နက်ကြီး ၇ ချက်ထက်မနည်း ရမ်းသမ်းပစ်ခတ်တယ်လို့ မိုးမိတ်မြို့ခံ တစ်ဦးက ပြောပါတယ်။
“မနေ့ညဆို လက်နက်ကြီးတွေကို စစ်ကောင်စီက ၅ မိနစ် ၁၀ မိနစ်တစ်ခါခြား ပစ်နေတယ်။ တစ်ဖက်သတ်ပစ်နေတယ်။ ကျနော်တို့ကြောက်လို့ ညက ကတုတ်ကျင်းထဲ အိပ်ခဲ့ရတယ်” လို့ပြောပါတယ်။
မိုးမိတ်မြို့ အုန်းကြောကျေးရွာမှာ ဇန်နဝါရီ ၁၂ရက်နေ့က တိုက်ပွဲဖြစ်ပွားခြင်းမရှိဘဲ စစ်ကောင်စီတပ်ဖွဲ့ဟာ လက်နက်ကြီးပစ်ခတ်တာကြောင့် လင်မယား ၂ဦးသေဆုံး အမျိုးသမီး ၃ ဦးဒဏ်ရာရှိရခဲ့ပါတယ်။
ဇန်နဝါရီ ၁၁ ရက်နေ့မှာလည်း အုန်းကြောရွာဟောင်းမှာ လက်နက်ကြီးကျလို့ ၉ နှစ်အရွယ်အမျိုးသားတစ်ဦးနဲ့ အမျိုးသမီးတစ်ဦး ဒဏ်ရာရရှိပါတယ်။
ထိုအလာတူး မနေ့ ဇန်နဝါရီ ၁၄ ရက်နေ့မှာ လားရှိုးမြို့နယ်နဲ့ မိုးကုတ်မြို့နယ်မှာ တိုက်ပွဲဖြစ်ပွားခြင်းမရှိပဲ စစ်ကောင်စီက လက်နက်ကြီး တစ်ဖက်သတ် ပစ်ခတ်နေတယ်လို့ တအာင်းအမျိုးသာရေးတပ်မတော် TNLA က မနေ့ည ၇ နာရီခွဲအချိန်မှာ ထုန်ပြန်ထားပါတယ်။
မိုးမိတ်မြို့နယ်အတွင်းမှာ စစ်ကောင်စီရဲ့ ခြေလျင်တပ်ရင်းတွေဖြစ်တဲ့ ခလရ-၂၂၃၊ ခလရ-၂၇၆ နဲ့ ခမရ-၃၄၈ တပ်တွေ အခြေစိုက်ကြပါတယ်။
NUG လက်အောက်မှာရှိတဲ့ KPDF တပ်ရင်းအမှတ် ၁၂၂၂ တပ်တွေလည်း မိုးမိတ်မြို့နယ်အတွင်းမှာ လှုပ်ရှားနေပါတယ်။ ပြီးခဲ့တဲ့ ၂၀၂၃ ခုနှစ်၊ ဖေဖော်ဝါရီ လကုန်ပိုင်းတုန်းက အဲ့ဒီစစ်ကောင်စီတပ်ရင်း ၃ ခုကို လက်နက်ကြီးတွေနဲ့ ပစ်ခတ်တိုက်ခိုက်ခဲ့ပါသေးတယ်။
မိုးမိတ်မြို့နယ်အတွင်း တအာင်း(ပလောင်) လွတ်မြောက်ရေးတပ်မတော် (TNLA) လည်း စစ်ရေးလှုပ်ရှားမှုရှိပြီး စစ်ကောင်စီရဲ့ ရှေ့တန်းစခန်းတွေကို တိုက်ခိုက်သိမ်းပိုက်မှုတွေရှိပါတယ်။
စစ်တပ်အာဏာမသိမ်းမီ မိုးမိတ်မြို့နယ်အတွင်းမှာ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နဲ့ စစ်ကောင်စီတို့ တိုက်ပွဲတွေဖြစ်ပွားခဲ့ဖူးသော်လည်း စစ်တပ်အာဏာသိမ်းပြီးနောက်ပိုင်းမှာ တိုက်ပွဲဖြစ်ပွားခြင်း မရှိတော့ပါ။
MK-011
#MeKongNews
#စစ်ကောင်စီ
#လက်နက်ကြီး
#မိုးမိတ်
#သေဆုံး
