မဲခေါင်၊ ဇန်နဝါရီ ၂၈

ရှမ်းပြည်တောင်ပိုင်း၊ ဆီဆိုင်မြို့ကို ပအိုဝ်းအမျိုးသား လွတ်မြောက်ရေးတပ်မတော် – PNLA က သိမ်းပိုက်ထားပြီးနောက် သိမ်းဆည်းရမိတဲ့ လက်နက်ခဲယမ်းပုံတွေကို PNLA က ဒီနေ့ ဇန်န်ဝါရီ ၂၈ရက်မှာ ထပ်မံထုတ်ပြန်ပါတယ်။

ပအိုဝ်းစော်ဘွားတွေ ခေတ်အဆက်ဆက်အုပ်ချုပ်ခဲ့ပြီး စော်ဘွားခွန်ကြည် နောက်ဆုံး အုပ်ချုပ်ခဲ့တဲ့ ဆီဆိုင်မြို့ကို PNLA က နယ်မြေတည်ငြိမ်ရေးအတွက် ဝင်ရောက်ထိန်းချုပ်လိုက်ပြီးနောက် ပအိုဝ်းအမျိုးသားအလံတော်ကိုလည်း စတင်လွင့်ထူနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ပအိုဝ်းဒေသအတွင်းမှာ ပြည်သူတွေလွတ်လပ်လုံခြုံစွာ သွားလာနေထိုင်နိုင်ရေး PNLAက လုံခြုံရေးဆိုင်ရာ လှုပ်ရှားမှုတွေ ဆောင်ရွက်နေပြီး စစ်ကောင်စီနဲ့ သူရဲ့လက်အောက်ခံ ပအိုဝ်းပြည်သူ့စစ် – PNO က ဆီဆိုင်မြို့နယ်နဲ့ ပအိုဝ်းကျေးရွာတွေကို လေယာဉ်နဲ့ ဗုံးကြဲတာ၊ အဝေးကနေ လက်နက်ကြီးပစ်တာတွေ မနေ့က တစ်နေလုံး လုပ်ဆောင်နေတယ်လို့ PNLA က ဆိုပါတယ်။

အဲဒီလို ပစ်ခတ်တိုက်ခိုက်မှုတွေကြောင့် ပအိုဝ်းတို့ အထွဋ်အမြတ်ထားရာဖြစ်တဲ့ ကောင်းဗွာဘုန်းတော်ကြီးကျောင်း၊ ဆီဆိုင်မြို့လယ် အရိယာမဂ္ဂင်ဓမ္မာရုံ၊ ဟိုခဲဘုန်းတော်ကြီးကျောင်းအတွင်းရှိ အဆောက်အဦးအချို့နဲ့ ဒေသခံပြည်သူလူထုရဲ့ နေအိမ် အများအပြားပျက်စီးခဲ့ရတယ်လို့ သိရပါတယ်။

စကစက ပအိုဝ်းမြို့၊ ပအိုဝ်းကျေးရွာတွေကို အကာအကွယ်ယူပြီး ပအိုဝ်းမြို့၊ ပအိုဝ်းကျေးရွာတွေကို ပြန်လည်ပစ်ခတ်ဖျက်စီးခြင်းဟာစစ်ရာဇဝတ်မှုကျူးလွန်တာဖြစ်ပြီး PNO – ပအိုဝ်းပြည်သူ့စစ်တပ်ဖွဲ့ဝင်​တွေ အနေနဲ့ စစ်အာဏာရှင်ယန္တရားကို လည်ပတ်စေတဲ့ အသုံးချခံဘဝက​နေ အမျိုးသားလွတ်မြောက်ရေးလမ်းကြောင်းပေါ်ကို အမြန်ဆုံး ကူးပြောင်းရပ်တည်ကြရန်လည်း ထပ်မံပြီး အထူးတိုက်တွန်းပါတယ်လို့ ဆိုထားပါတယ်။

ဆီဆိုင်မြို့မှာ ဟိုခဲရပ်ကွက်၊ မင်္ဂလာရပ်ကွက်၊ မြကန်သာရပ်ကွက်၊ သီရိရပ်ကွက်၊ အောင်သပြေရပ်ကွက်နဲ့ အောင်ချမ်းသာရပ်ကွက်ဆိုပြီး ရပ်ကွက် ၆ ခု ရှိကာ လူဦးရေ ၁၅၀၀၀ ကျော်နေထိုင်တယ်လို့ သိရှိရပါတယ်။ လက်ရှိမှာတော့ မြို့မှာ ဖုန်းလိုင်း၊ မီးလိုင်းတွေ အဖြတ်ခံထားရပြီး စစ်ဘေးမပြေးနိုင်သူတွေနဲ့ အိမ်စောင့်အနည်းငယ်လောက်ပဲ မြို့တွင်းမှာ ရှိနေတယ်လို့သိရပါတယ်။

MK – 012

#MeKongNews

#ဆီဆိုင်မြို့

#PNLA

#ကောင်းဗွာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)