မဲခေါင်၊ အောက်တိုဘာ ၂၈
ကိုးကန့်ဒေသရှိ စစ်ကောင်စီတပ်ဖွဲ့ဝင်တွေ၊ စစ်ကောင်စီ လက်အောက်ခံ ကိုးကန့်ရုပ်သေး ပြည်သူ့စစ်အဖွဲ့တွေနဲ့ ဌာနဆိုင်ရာ ဝန်ထမ်းတွေ အနေနဲ့ လက်နက်ချ အလင်းဝင်ရမယ်လို့ ကိုးကန့်တပ် MNDAA က ဒီကနေ့ ပြင်းပြင်းထန်ထန် သတိပေး ထုတ်ပြန်လိုက်ပါတယ်။
သတိပေးတဲ့ အတိုင်း လက်နက်ချ အလင်းဝင်ရောက်သူတွေရဲ့ အသက်အိုးအိမ် စည်းစိမ်တွေကို ကာကွယ် စောင့်ရှောက်မှာ ဖြစ်ပေမယ့် ဆက်လက် ဆန့်ကျင်တဲ့ သူတွေကိုတော့ ပြင်းထန်စွာ အရေးယူမယ်လို့ MNDAA က ပြောပါတယ်။
“စစ်သုံ့ပန်းအား ဂရုတစိုက် စောင့်ရှောက်ရေး” ဆိုတဲ့ မူဝါဒဟာ စစ်ကောင်စီတပ်ဖွဲ့ဝင်များ အတွက်ပါ အကျုံးဝင်တဲ့ အတွက် လက်နက်ချပြီး အလင်းဝင်ရောက်လာရင် စစ်သုံ့ပန်း မူဝါဒကို အပြည့်အဝ ခံစားရမှာဖြစ်ပြီး ဒဏ်ရာရသူများကို ကောင်းမွန်စွာ ကုသပေးမယ်လို့ MNDAA ကပြောပါတယ်။
ဒါကြောင့် MNDAA ထံ ကိုယ့်အသိစိတ်နဲ့ကိုယ် အပြစ်ဝန်ခံဖို့ လာရောက်တဲ့ စစ်ကောင်စီတပ်ဖွဲ့ဝင်များ၊ စစ်ကောင်စီ လက်အောက်ခံ ကိုးကန့် ပြည်သူ့စစ်အဖွဲ့များ၊ စစ်သား ရဲနဲ့ အုပ်ချုပ်ရေး ဝန်ထမ်းများကို လှိုက်လှဲစွာ ကြိုဆိုတယ်လို့ MNDAA ကဆိုပါတယ်။
စစ်ကောင်စီ လက်အောက်ခံ ကိုးကန့်ရုပ်သေးအဖွဲ့ရဲ့ အဆင့်ဆင့်သော အုပ်ချုပ်ရေးနဲ့ ဌာနဆိုင်ရာ ဝန်ထမ်းတွေ အနေနဲ့ လုပ်ငန်းတာဝန်နဲ့ သက်ဆိုင်တဲ့ စာရွက်စာတမ်း၊ ဓာတ်ပုံ၊ စာရင်းဇယား၊ ဘောက်ချာနဲ့ ငွေကြေးတွေကို ကောင်းမွန်စွာ ထိန်းသိမ်းထားရမှာဖြစ်ပြီး အဲ့ဒီ သက်သေခံ ပစ္စည်းတွေကို ရည်ရွယ်ချက်ရှိရှိ ဖျက်ဆီးရင် ပြင်းထန်စွာ အရေးယူမယ်လို့ MNDAA ရဲ့ သတိပေးစာမှာ ဖော်ပြထားပါတယ်။
ဒါ့အပြင် ဝရမ်းထုတ်ထားတဲ့ ရာဇဝတ်မှု ကျူးလွန်သူတွေကို ကာကွယ်ပေးတာ၊ ဝှက်ထားပေးတာ၊ ထွက်ပြေး လွတ်မြောက်အောင် ကူညီပေးတာ လုပ်ရင် ပြင်းပြင်းထန်ထန် အရေးယူမယ်လို့လည်း MNDAA ကပြောပါတယ်။
အခု ထုတ်ပြန်လိုက်တဲ့ သတိပေးစာဟာ ဒီကနေ့မှစပြီး စစ်ရေးအုပ်ချုပ်မှု ကာလ ပြီးဆုံးတဲ့အထိ အာဏာတည် အကျုံးဝင်တယ်လို့ MNDAA က ထုတ်ပြန် ပြောဆိုထားပါတယ်။
CJ-002
#MekongNews
#ကိုးကန့်
#ပြည်သူ့စစ်
#MNDAA