မဲခေါင်၊ ဒီဇင်ဘာ ၉
ပဲခူးတိုင်း၊ ကျောက်ကြီးမြို့နယ်၊ မုန်းမြို့ရှိ စစ်ကောင်စီ ခမရ ၅၉၀ တပ်ကို KNLA နဲ့ PDF ပူးပေါင်းသိမ်းပိုက်မှုမှာ စစ်တပ်ကလေကြောင်းက ပစ်ခဲ့တာကြောင့် တပ်မိသားစုဝင် မိခင်တစ်ဦးသေဆုံးပြီး လသားအရွယ် ကလေးငယ်ကို PDF တွေက ကယ်တင်ခဲ့ရတယ်လို့ သိရပါတယ်။
စစ်တပ်လေကြောင်းက ပစ်လို့ သေဆုံးသွားတဲ့ မိခင်ဖြစ်သူဘေးမှာ လသားအရွယ်ကလေးငယ်ကို PDF တပ်ဖွဲ့ဝင်တွေက ကယ်တင်ပေးနေတဲ့ ရုပ်သံမှတ်တမ်းကို တောင်ပိုင်းတိုင်း၊ အထူးကွန်မန်ဒိုတပ်ရင်း ရိုးမစစ်ကြောင်းက ဒီနေ့ ဒီဇင်ဘာ ၉ ရက်မှာ ထုတ်ပြန်ထားပါတယ်။
“ကိုယ့်ရဲဘော်တွေကိုလည်း မကာကွယ်နိုင်ဘူး၊ ရဲဘော်တွေရဲ့ မိသားစုကိုလည်း မကာကွယ်နိုင်ဘူး၊ ဒီခလေးငယ်ရဲ့ မိခင်ကတော့ ဆုံးပါးသွားရှာပြီ၊ ဒါကျနော်တို့ ကယ်လာတဲ့ ခလေးပါ” လို့ PDF စစ်ယူနီဖောင်းနဲ့ ကလေးငယ်ကယ်တင်နေတဲ့ တဲ့ရုပ်သံမှာ ပြောနေသံကိုလည်း ကြားပါတယ်။
မုန်းမြို့မှာရှိတဲ့ စစ်ကောင်စီတပ်စခန်း ခမရ-၅၉၀ နဲ့ ၅၉၉ တိုကို ကရင်အမျိုးသားလွတ်မြောက်ရေးတပ်မတော် (KNLA) နဲ့ PDF ပူးပေါင်းအဖွဲ့တွေက ဒီဇင်ဘာ ၅ ရက်မှာ တိုက်ခိုက်သိမ်းပိုက်ခဲ့ပါတယ်။
အဲ့ဒီလိုတိုက်ခိုက်ပြီးနောက် ဒုတပ်ရင်းမှူးအပါ စစ်ကောင်စီတပ်သား ၁၉ ယောက်လက်နက်ချအညံ့ခံခဲ့ပြီး တပ်မိသားစုဝင် ၄၂ ယောက်ကို စစ်သုံ့ပန်းတွေအဖြစ် ဖမ်းမိခဲ့ပါတယ်။
မုန်းမြို့ပေါ်က စစ်ကောင်စီစခန်းနဲ့ ရဲစခန်းတွေကို တော်လှန်အဖွဲ့ပူးပေါင်းအဖွဲ့တွေက သိမ်းပိုက်လိုက်ချိန်မှာ စစ်ကောင်စီက မုန်းမြို့ပေါ်ရပ်ကွက် စစ်ရေးပစ်မှတ်မဟုတ်တဲ့ လူနေရပ်ကွက်တွေပေါ် လေကြောင်းက ဗုံးကြဲတိုက်ခိုက်ခဲ့ပါတယ်။
စစ်တပ်က မြို့ပေါ်ရပ်ကွက်တွေကို ဗုံးကြဲတိုက်ခိုက်နေတာကြောင့် မြို့နေပြည်သူအပါအဝင် အနီးနားကျေးရွာတွေက ပြည်သူ ၆ သောင်းကျော် စစ်ဘေးရှောင်နေရတယ်လို့ KNU က ထုတ်ပြန်ထားပါတယ်။
#MeKongNews
#မုန်းမြို့
#စစ်ကောင်စီ
#ဗုံးကြဲ
#ကလေးငယ်
#လသား
