မဲခေါင်၊ မတ် ၂၀
ရှမ်းပြည်မြောက်ပိုင်း၊ ကျောက်မဲမြို့နယ်အတွင်း စစ်ကောင်စီတပ်က အင်အားအများအပြား တပ်ဖြန့်နေတယ်လို့ သတင်းအရင်းအမြစ်တွေထံမှ သိရပါတယ်။
ကျောက်မဲမြို့အခြေစိုက် စကခ-၁ ၊ ခလ၇-၅၀၁၊ ၅၀၂ ၊ အမြောက်တပ်-၃၅၂ ၊ ဒုံးတပ်ခွဲနဲ့ ဆေးတပ်တွေမှာ အင်အားအများအပြားရောက်ရှိတာတာကို မတ်လ ၁၉ ရက် မှာတွေ့ရသလို ပတ်ဝန်းကျင်ရွာတွေဖြစ်တဲ့ နောင်ပိန်၊ နားခေါ်၊ ပန်ဟက်၊ ကျာက်မဲကြီး၊ နဲ့ နောင်ချို၊ ခိုမုန်းဘက်တွေကို တပ်ဖြန့်ပို့နေတယ်လို့ ဒေသခံတစ်ဦးထံက သိရပါတယ်။
“သူတို့က တပ်ကားတွေကို မသုံးဘူး၊ အရပ်ကားတွေကို ချောဆွဲပြီး သုံးတာ၊ စဆွဲတာကတော့ တမြန်နေ့ နေ့လည်လောက်က စတာ၊ အရပ်ကားတွေလဲ ကြောက်ပေမယ့် မလိုက်လို့လဲမရတော့ လိုက်နေကြရတယ်၊ လောက်ကိုင်ကဖျက်တဲ့ တပ်တွေကျောက်မဲမှာ တပ်တည်မယ်လို့လဲ ပြောသံကြားတယ်” လို့ မဲခေါင်ကို ပြောပါတယ်။
ယင်းကဲ့သို့ အရပ်ကားတွေနဲ့ တပ်ဖြန့်နေသလို စစ်ချီတက်တဲ့ပုံစံနဲ့လဲ စစ်အင်အားဖြန့်ကျက်နေတာတွေ ရှိနေတယ်လို့ သိရပြီး SSPP နဲ့ TNLA တပ်တွေလဲ တပ်အင်အားတွေ တိုးချဲ့လာနေတယ်လို့ သိရပါတယ်။
TNLA က သံဘိုနဲ့ နောင်ချိုဘက်တွေမှာ တပ်စွဲထားသလို ဂုတ်တွင်းထဲမှာတော့ စစ်ကောင်စီတပ်တွေ အများအပြားတွေ့ရတယ်လို့ သိရကာ SSPP ကတော့ အရင်က ကျောက်မြို့ထဲအထိ နေရာယူထားပေမယ့် အခု စစ်ကောင်စီတပ်တွေ ဖြန့်ကျက်လာတာမှာ မြို့ပြင် ဘက်တွေ ပြန်နေရာယူနေတာ တွေ့ရတယ်လို့ ဆိုပါတယ်။
စစ်ကောင်စီတပ်တွေ အင်အားတိုးဖြန့်ကျက်တာ၊ TNLA နဲ့ SSPP တပ်တွေ စစ်ပြင်နေတာတွေကြောင့် ကျောက်မဲဒေသခံတွေအပြင် သီပေါ၊ နောင်ချိုဘက်က လူထုပါ တစ်ကျော့ပြန် တိုက်ပွဲတွေ ဖြစ်လာမှာကို အထူးစိုးရိမ်နေကြတယ်လို့ သိရပါတယ်။
MK-012