မဲခေါင်၊ ဇန်နဝါရီ ၃၀

ရှမ်းပြည်နယ် တောင်ပိုင်း၊ ကျောက်တစ်လုံးကြီးမြို့မှာ စစ်ကောင်စီလက်အောက်ခံ ပအိုဝ်းပြည်သူ့စစ် (PNA) က တပ်သားသစ် အဓမ္မစုဆောင်းနေတယ်လို့ ဒေသခံတွေက ပြောပါတယ်။

ဇန်နဝါရီလ ၂၆ ရက်ကစပြီး ကျောက်တစ်လုံးကြီးမြို့က အသက် ၁၈ က‌နေ ၄၀ ကြား အမျိုးသားတွေဟာ တစ်အိမ်တစ်ယောက်နှုန်းနဲ့ မဖြစ်မနေ ပါဝင်ရမှာ ဖြစ်တဲ့အပြင် ငွေကျပ်တစ်သိန်းလည်း ထည့်ဝင်ရတယ်လို့ ဆိုပါတယ်။

မြို့ခံ တစ်ဦးက “တစ်အိမ် တစ်ယောက် မထွက်မနေရ။ ဒီနေ့ကစပြီး စစ်ရေးလေ့ကျင့်နေပြီတဲ့။ အခုမှ ထွက်ပြေးလို့လည်း အချိန်မမီတော့ မပါချင်လည်း ပါကြရတယ်” လို့ ပြောပါတယ်။

မပါဝင်နိုင်တဲ့ အိမ်တွေဟာ သိန်း ၂၀ ပေးရပြီး ကျေးရွာအများစုက ဒေသခံတွေဟာ လက်လုပ်လက်စား အခြေခံလူတန်းစားတွေ ဖြစ်တာကြောင့် ငွေကြေးမထည့်နိုင်တဲ့အတွက် မငြင်းဆန်နိုင်ကြဘူးလို့ ဆိုပါတယ်။

ဒါ့အပြင် ကျောက်တစ်လုံးကြီးမြို့နယ်အတွင်းက ဖက်ကွန်ရွာမှာလည်း စစ်အသုံးစရိတ်အဖြစ် တစ်အိမ်ကို ငွေကျပ် ၂ သိန်း ကောက်ခံနေတာကြောင့် ရွာခံတွေဟာ ငွေတိုးယူပြီး ထည့်ဝင်နေရတယ်လို့ သိရပါတယ်။

PNA ဘက်က အခုလို လူသစ်စုဆောင်းပြီး ဆက်ကြေးကောက်ခံတဲ့ အဖွဲ့ဟာ ပအိုဝ်းအမျိုးသား လွတ်မြောက်ရေး တပ်မတော် (PNLA) ရဲ့ ဗိုလ်မှူးကြီး ခွန်သူရိန်က လုပ်ဆောင်တယ်ဆိုပြီး ဝါဒဖြန့်ထားတယ်လို့ နီးစပ်သူတွေက ပြောပါတယ်။

ဆီဆိုင်မြို့တိုက်ပွဲစတင်တဲ့ ရက်ကစပြီး စစ်ကောင်စီနဲ့ PNA ဘက်က ပအိုဝ်းကိုယ်ပိုင် အုပ်ချုပ်ခွင့်ရဒေသတွေနဲ့ သူတို့ အာဏာစိုးမိုးထားတဲ့ဒေသတွေမှာ အဓမ္မတပ်သားသစ် စုဆောင်းနေတဲ့အပြင် ဆက်ကြေးတွေလည်း မတန်တဆ ကောက်ခံနေတယ်လို့ စုံစမ်းသိရပါတယ်။

CJ-007

#MeKongNews

#ကျောက်လုံးကြီး

#ပြည်သူ့စစ်

#စုဆောင်း

#ပြည်သူ့စစ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)