မဲခေါင်၊ နိုဝင်ဘာ ၆

စစ်ကိုင်းတိုင်း၊ ကောလင်းခရိုင်၊ ကောလင်းမြို့ကို အမျိုးသား ညီညွတ်ရေး အစိုးရ၊ ပြည်သူ့ကာကွယ်ရေး တပ်မတော်နဲ့ ပြည်သူ့ကာကွယ်ရေးအဖွဲ့ အပါအဝင် မဟာမိတ်တပ်တွေ သိမ်းပိုက်ရရှိပြီးနောက် ပြည်သူ့ တော်လှန်ရေး အလံတော် လွှင့်ထူထားပြီလို့ NUG ကာကွယ်ရေးဝန်ကြီးဌာနက ဒီကနေ့ ထုတ်ပြန်ပါတယ်။

ဒီနေ့ နိုဝင်ဘာ (၆) ရက် နေ့မှာ ကောလင်းမြို့ကို သိမ်းပိုက်ရရှိကြောင်း NUG က အတည်ပြု ထုတ်ပြန်ခဲ့ပြီးနောက် အခုလို မြို့ပေါ်မှာ ပြည်သူ့တော်လှန်ရေးအလံတော် လွှင့်ထူထားတယ်လို့ ဆက်လက် ထုတ်ပြန်ခဲ့တာပါ။

ကောလင်းမြို့သိမ်း တိုက်ပွဲကို ပြီးခဲ့တဲ့ နိုဝင်ဘာ ၃ ရက်နေ့၊ မနက်ပိုင်းက စတင်ပြီး KIA၊ AA နဲ့ PDF မဟာမိတ် ပူးပေါင်းတပ်ဖွဲ့တွေ ဆင်နွှဲခဲ့တာဖြစ်ပြီး မနေ့က ညနေပိုင်းမှာ တစ်မြို့လုံး သိမ်းပိုက် ထိန်းချုပ်နိုင်ခဲ့တာလို့ သိရပါတယ်။

ကောလင်းမြို့မှာ စစ်ကောင်စီ တပ်စွဲထားတဲ့ ကောလင်းရဲစခန်း၊ အထွေထွေအုပ်ချုပ်ရေးရုံး၊ အထက်တန်းကျောင်း၊ မြေစာရင်းရုံး၊ မြန်မာ့စီးပွားရေးဘဏ်တို့ကို တိုက်ခိုက်သိမ်းပိုက်ပြီးနောက် စစ်ကောင်စီရဲ့ အုပ်ချုပ်ရေး ယန္တရား ရပ်တန့်သွားပြီး အောင်မြင်စွာ သိမ်းပိုက်နိုင်ခဲ့တာလို့ NUG လက်အောက် ကာကွယ်ရေးဝန်ကြီးဌာနက ထုတ်ပြန်ထားပါတယ်။

MK-009

#MekongNews

#ကောလင်းမြို့

#NUG

#ပြည်သူ့တော်လှန်ရေး_အလံတော်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)