မိုင်းကိုင်မြို့နယ်အနီး လွယ်တွမ်းတောင်ကြော တစ်လျှောက်တွင် RCSS နှင့် တပ်မတော်တို့ တိုက်ပွဲများ ဆက်လက်ဖြစ်ပွားနေပြီး တပ်မတော်ဘက်ကမှ ရဟတ်ယာဉ်ဖြင့် ဗုံးကြဲတိုက်ခိုက်မှုများ ပြုလုပ်ခဲ့ကြောင်း သိရသည်။
ယနေ့ ဖေဖော်ဝါရီလ ၂၉ရက် ညနေ ၃နာရီခွဲခန့်က တပ်မတော်ဘက်မှ ရဟတ်ယာဉ် ၂စီးဖြင့် ဗုံးကြဲတိုက်ခိုက်ခဲ့ကြောင်း RCSS မှ ဒုတိယဗိုလ်မှူးကြီး အုမ်ခမ်းက မဲခေါင်သတင်းဌာနကို အတည်ပြုပြောသည်။
“ဒီနေ့က လေယာဉ်နဲ့ဗုံးကြဲတာက ၃နာရီခွဲလောက်က။ လက်နက်ငယ်နဲ့ ပစ်တာတော့ ဒီနေ့ သိပ်မရှိဘူး။ တပ်မတော်ဘက်က မကြာမကြာ လက်နက်ကြီးနဲ့လှမ်းပစ်တာတော့ ရှိတယ်” ဟု၎င်းက ပြောသည်။
တိုက်ပွဲဖြစ်ပွားသည့် နေရာတဝိုက်တွင် ရဟတ်ယာဉ်ပျံသန်းမှုများကို ကြားရကြောင်း ဟမ်းငိုင်းကျေးရွာအုပ်စုမှ ဒေသခံတစ်ဦးက ပြောသည်။
တိုက်ပွဲကြောင့် အနီးနားရှိကျေးရွာများမှ ဒေသခံ ၂၀၀ခန့်မှာ ဟမ်းငိုင်းကျေးရွာအုပ်စုအတွင်းရှိ လွိုင်စပ် ဘုန်ကြီးကျောင်းတွင် စစ်ဘေးရှောင်အဖြစ် ရောက်ရှိနေကြောင်း အဆိုပါ ဒေသခံက ပြောသည်။
တိုက်ပွဲဖြစ်ပွားသည့် ၃ရက်မြောက်နေ့တွင် RCSS ဆက်ဆံရေးရုံးနှင့် တပ်မတော်ဘက်မှ ရလခတိုင်းရုံးတို့ကြား ဆက်သွယ်ညှိနှိုင်းမှုများ ရှိသော်လည်း တပ်မတော်ဘက်မှ စစ်အင်အား ထပ်မံဖြည့်တင်းလာသည့်အတွက် တိုက်ပွဲ ဆက်ဖြစ်ဦးမည့် အခြေအနေရှိကြောင်း RCSS မှ ဒုတိယဗိုလ်မှူးကြီး အုမ်ခမ်းက မဲခေါင်သတင်းဌာနကို ပြောသည်။
တိုက်ပွဲဖြစ်စဉ်နှင့် ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့သို့ မဲခေါင်သတင်းဌာနမှ ကြိုးစား ဆက်သွယ်သော်လည်း ဖုန်းလက်ခံဖြေကြားခြင်း မရှိပေ။