မဲခေါင်၊ မတ် ၁၀
ထိုင်းနိုင်ငံ အကျဉ်းထောင်တွေထဲမှာ ဗီအိုင်ပီခန်းတွေ ဝယ်နေလို့ရတယ်လို့ ကျယ်ကျယ်ပြန့်ပြန့် ဝေဖန်မှုတွေ ထွက်ပေါ်နေတာကို ထိုင်းအကျဉ်းဦးစီးဌာနက ငြင်းဆိုသွားခဲ့ပါတယ်။
နိုင်ငံတကာ လူ့အခွင့်အရေးအဖွဲ့ဟာ ၂၀၂၂ ဇန်နဝါရီ ၁ ရက်နေ့ကနေ ဒီဇင်ဘာ ၃၁ ရက်အတွင်း ထိုင်းနိုင်ငံ တစ်ဝန်း အကျဉ်းထောင်တွေက စံချိန်စံညွှန်းတွေနဲ့ ပတ်သက်လို့ လိုအပ်ချက်တွေ၊ လူ့အခွင့်အရေးချိုးဖောက်မှုတွေ အပေါ် ၆၅ စာမျက်နှာပါ တစ်နှစ်တာ အစီရင်ခံစာ ထုတ်ပြန်ခဲ့ပြီး ထောင်ကထွက်လာသူတချို့ရဲ့ ပြောဆိုမှုအရ ငွေကြေးပေးပြီး ဝယ်နိုင်ရင် ထောင်တွေထဲမှာ ဆေးလိပ်သောက်ခန်း၊ လေအေးပေးစက်ပါတဲ့ အခန်း၊ တီဗီ စိတ်ကြိုက်ကြည့်နိုင်တဲ့အခန်းတွေမှာ နေလို့ရတယ်လို့ သိရပါတယ်။
ဒါတွေနဲ့ပတ်သက်လို့ ထိုင်းအကျဉ်းဦးစီးဌာန ဒုတိယညွှန်ကြားရေးမှူးချုပ် ဆစ်သီဆူတီးဝေါင်က မဟုတ်မမှန် သတင်းများသာဖြစ်တယ်လို့ ငြင်းဆိုသွားခဲ့ပါတယ်။
၂၀၁၈ ခုနှစ်မတိုင်ခင်က ထိုင်းအကျဉ်းထောင်တွေမှာ သီးခြား သတ်မှတ်ပေးထားတဲ့ အဆောင်ပြင်ပ နေရာမှာ ဆေးလိပ်သောက်ခွင့်အတိုင်းအတာတစ်ရပ်ပေးခဲ့ပေမယ့် ကျန်းမာရေးဝန်ကြီးဌာနရဲ့ လမ်းညွှန်မှုကြောင့် ၂၀၁၉ ခုနှစ်ကနေစလို့ ထောင်တိုင်းဟာ ဆေးလိပ်ကင်းစင်နယ်မြေအဖြစ် ပြောင်းလဲသတ်မှတ်ခဲ့ပြီး ဆေးရွက်ကြီး ရောင်းချသူတွေကိုပါ နှိမ်နင်း အပြစ်ပေးတယ်လို့ ဆူတီးဝေါင်က ရှင်းပြ ပါတယ်။
လေအေးပေးစက် တပ်ထားတဲ့ အကျဉ်းခန်း တစ်နိုင်ငံလုံးမှာမရှိဘဲ အခန်းတိုင်း ပန်ကာသာ သုံးခွင့်ပေးကြောင်း၊ ရုပ်မြင်သံကြားကြည့်ရှုခွင့်ကို အထူးသတ်မှတ်အချိန်၊ သတ်မှတ် အစီအစဉ်တွေမှာသာ ဉာဏ်ပညာ မြင့်မားတိုး တက်စေရေး၊ တရားနာနိုင်ရေးတွေအတွက် ပြသပြီး ကိုယ့်စိတ်ကြိုက် လိုင်းပြောင်းကြည့်ခွင့်မျိုး မရှိဘူးလို့ ဆက် လက်ရှင်းလင်းပြောကြားပါတယ်။
နိုင်ငံတကာ လူ့အခွင့်အရေးအဖွဲ့ တစ်နှစ်တာအစီရင်ခံစာမှာ ၂၀၂၂ ခုနှစ်အတွင်း ထိုင်းနိုင်ငံထောင်းသားစာရင်း ၆ ရာခိုင်နှုန်းလျော့ကျသွားကြောင်း၊ ဆေးခြောက်မှုနဲ့ကျခံနေရသူ ၃၀၀၀ ကို လွှတ်ပေးလိုက်လို့လည်း ထောင်သားနှုန်း ကျဆင်းသွားရတာဖြစ်ကြောင်း၊ နိုင်ငံတစ်ဝန်း ထောင်ပေါင်း ၁၄၃ ခုမှာ ၁၀၆ ခုက နိုင်ငံတကာ အကျဉ်းထောင်စံချိန်စံညွှန်းတွေနဲ့ မညီဘဲ အခန်းကျဉ်းထဲ ထောင်သားများစွာ ပြည့်ကျပ်နေထိုင်ရတာမျိုး၊ ငါးဖမ်း ပိုက်ထုတ်လုပ်မှုမှာ ထောင်သားတွေလုပ်အားကို အနိုင်ကျင့်အသုံးပြုနေဆဲဖြစ်ကြောင်း ဖော်ပြပါရှိခဲ့ပါတယ်။
၂၀၂၂ ခုနှစ် ဒီဇင်ဘာလ မှတ်တမ်းအရ ထိုင်းမှာ နိုင်ငံခြားသားအကျဉ်းသား ၇၂၈၈ ယောက်ရှိနေပြီး ထောင်သားအားလုံးရဲ့ ၂.၈ ရာခိုင်နှုန်း ရှိကြောင်း၊ ပြည်ပအကျဉ်းသားတွေထဲမှာ မြန်မာအကျဉ်းသားအများဆုံး အဖြစ် ၄၆ ရာခိုင်နှုန်းအထိရှိနေပြီး မြန်မာပြီးရင် လာအို၊ ကမ္ဘောဒီးယား၊ တရုတ်၊ နိုင်ဂျီးရီးယား၊ မလေးရှား၊ ဗီယက်နမ်၊ ထိုင်ဝမ်၊ အိန္ဒိယ၊ ပါကစ္စတန် အကျဉ်းသားတွေ အစဉ်အလိုက် များပြားတည်ရှိတယ်လို့ ဆိုပါတယ်။
Ref: thethaiger
MKF-001
