မဲခေါင်၊ ဇန်နဝါရီ ၁၉
ရုရှားကိုတွန်းလှန်စစ်ဆင်နွှဲမှုမှာ စစ်သုံးယာဉ်လုံလောက်ရေးအတွက် ယူကရိန်းရဲ့ တောင်းဆိုချက်ကို လိုက်လျှောပြီး စစ်သည်တင် သံချပ်ကာကျည်ကာကားအစီး ၂၀၀ ပေးလှူသွားမယ်လို့ ကနေဒါ ကာကွယ်ရေးဝန်ကြီးက ဇန်နဝါရီ ၁၈ ရက် ကိဗ်မြို့ခရီးစဉ်မှာ အတည်ပြုပြောကြားသွားပါတယ်။
ကနေဒါထုတ် သံချပ်ကာကားတွေဟာ ခေတ်မီ၊ အဆင့်မြင့် အကောင်းဆုံးနည်းပညာတွေနဲ့ ထုတ်လုပ်ထားပြီး နောက်ဆုံးပေါ်လက်နက်တွေကို အလွယ်တကူတပ်ဆင်အသုံးပြုနိုင်တယ်လို့ ကိဗ်ခရီးစဉ်မှာ ယူကရိန်းကာကွယ် ရေးဝန်ကြီးနဲ့ တွေ့ဆုံစဉ် ကနေဒါ ကာကွယ်ရေးဝန်ကြီး အနီတာအန်နန့်ဒ်က ပြောကြားသွားတာဖြစ်ပါတယ်။
ပြီးခဲ့တဲ့နိုဝင်ဘာလက ကနေဒါဝန်ကြီးချုပ် ဂျက်စတင်ထရူဒီယိုက ယူကရိန်းကို ကနေဒါဒေါ်လာ သန်း ၅၀၀ (ကန်ဒေါ်လာ ၃၇၃ သန်း)ကို စစ်ရေးအထောက်အကူအတွက် ပံ့ပိုးလှူဒါန်းမယ်လို့ ကြေညာခဲ့တဲ့ အစီအစဉ်ထဲက တစ်ခုအဖြစ် သံချပ်ကာတင့်ကား အစင်း ၂၀၀ ကို လှူဒါန်းသွားဖို့ အတည်ပြုခဲ့တာလည်းဖြစ်ပါတယ်။
ကနေဒါဟာ ယူကရိန်းကို စစ်ရေးအကူအညီအဖြစ် ဒေါ်လာ ၁ ဘီလီယံကျော် ထောက်ပံ့ပေးခဲ့ပြီးဖြစ်ကာ သံချပ်ကာ ကား၊ ဟောင်ဝစ်ဇာ အမြောက်၊ ဆောင်းဝတ်စုံ၊ ဒရုန်းကင်မရာနဲ့ လက်နက်ခဲယမ်းတွေ ပေးလှူခဲ့ပြီး ဖြစ်ကာ ပြီးခဲ့တဲ့တစ်ပတ်ကပဲ ယူကရိန်းအတွက် နောက်ဆုံးပေါ် လေကြောင်းရန်ကာကွယ်ရေးစနစ်ကို အမေရိကန်ထံက ဝယ်ပြီးလှူမယ်လို့လည်း ထုတ်ပြန်ခဲ့ပါတယ်။
အခုပေးလှူမယ့် သံချပ်ကာကျည်ကာကားတွေဟာ ကနေဒါထုတ် ဒီဇယ်သုံးယာဉ်ဖြစ်ပြီး အွန်တာရီယိုအခြေစိုက် Roshel ကုမ္ပဏီက ထုတ်လုပ်ပေးထားတာဖြစ်ပြီး လက်နက်ငယ်ကျဉ်တွေကို မထိခိုက်အောင် ကာကွယ်ပေးနိုင် သလို ပေါ့ပါးလျှင်မြန်စွာ သွားလာနိုင်ပါတယ်။
MKF – 001
Ref: thedefensepost
