မဲခေါင်၊ ဇန်နဝါရီ ၁၀
အစိုးရဆန့်ကျင် ဆန္ဒပြနေသူများသည် အမေရိကန်သမ္မတ အားရကျေနပ်အောင် ကြိုးစားနေသည့် ပြဿနာကောင်များ ဖြစ်သည်ဟု အီရန် ထိပ်သီးခေါင်းဆောင် အယာတိုလာအလီခါမီနီက ပြောဆိုလိုက်သည်။
ဆန္ဒပြပွဲများအား အကြမ်းဖက် အာဏာဖီဆန်သော လုပ်ရပ်များနှင့် ဖျက်လိုဖျက်ဆီး လုပ်ရပ်များဟု အာဏာပိုင်များက စွပ်စွဲသော အကြမ်းဖက်မှုများ အဖြစ်သို့ ပြောင်းလဲသွားခြင်းအတွက် အမေရိကန်ကို အပြစ်တင်ထားသော စာတစ်စောင်ကိုလည်း အီရန်က ကုလသမဂ္ဂ လုံခြုံရေးကောင်စီထံသို့ ပေးပို့ခဲ့သည်။
ယမန်နေ့ကပင် ပြောကြားသည့် ရုပ်သံမိန့်ခွန်းတွင် အလျှော့ပေးမည် မဟုတ်ကြောင်း အီရန် ထိပ်သီး ခေါင်းဆောင်က အတိအလင်း ပြောထားသည်။
“အစ္စလာမ္မစ်နိုင်ငံတော်ဟာ ထောင်သောင်းချီတဲ့ ဂုဏ်သရေရှိလူတွေရဲ့ သွေးတွေနဲ့ရင်းပြီး အာဏာ ရလာခဲ့တာဖြစ်တယ် ဆိုတာနဲ့ ဒါကို လက်မခံတဲ့သူတွေနဲ့ ရင်ဆိုင်ရချိန်မှာလည်း နောက်ဆုတ်သွားမှာ မဟုတ်ဘူး ဆိုတာကို လူတိုင်းကို အသိပေးလိုက်ပါ”ဟု အသက် ၈၆ နှစ် အရွယ် ခါမီနီက ပြောသည်။
ထို့ပြင် ဖျက်လိုဖျက်ဆီး လုပ်ဆောင်သူများအား ကိုင်တွယ်ရာတွင် အီရန်က တွန့် ့ဆုတ်နေမည် မဟုတ်ကြောင်းလည်း နောက်ပိုင်းတွင် ထောက်ခံသူများအား ပြောကြားသည့် မိန့်ခွန်းတွင် ၎င်းက ထည့်သွင်း ပြောကြားခဲ့သည်။
ခြိမ်းခြောက်မှုများ၊ သွေးထိုးလှုံ့ဆော်မှုများ၊ မတည်ငြိမ်မှုနှင့် အကြမ်းဖက်မှုများကို ရည်ရွယ်ချက်ရှိရှိ အားပေးအားမြှောက် လုပ်ခြင်းဖြင့် အမေရိကန်က အီရန်၏ ပြည်တွင်းရေး၌ ပါဝင်စွက်ဖက် နေသည်ဟု ကုလ လုံခြုံရေးကောင်စီသို့ ရေးသားပေးပို့ခဲ့သည့် စာတွင် အီရန်က စွပ်စွဲထားသည်။
ထိုအတောအတွင်းမှာပင် အီရန်က အကြီးအကျယ် ဒုက္ခရောက်နေပြီဟု အမေရိကန်သမ္မတ ဒေါ်နယ်ထရမ့်က ဆိုသည်။
စီးပွားရေး ကျပ်တည်းမှုကို အကြောင်းပြု ဖြစ်ပေါ်လာခဲ့သော အီရန်ဆန္ဒပြပွဲများသည် ၁၃ ရက် မြောက် လာခဲ့ပြီ ဖြစ်ကာ နှစ်ပေါင်းများစွာအတွင်း အကြီးမားဆုံး ဖြစ်လာခဲ့သည်။
အချို့ကလည်း အစ္စလာမ္မစ်နိုင်ငံတော်အား အဆုံးသတ်၍ ဘုရင်စနစ် ပြန်လည် ကျင့်သုံးရေးကို တောင်းဆိုကြသည်ဟု ဘီဘီစီသတင်းက ဆိုသည်။
ဒီဇင်ဘာ ၂၈ ရက်တွင် ဆန္ဒပြပွဲများ စတင်ခဲ့ပြီး နောက်ပိုင်း ဆန္ဒပြသူ ၄၈ ဦးသေဆုံးခဲ့ကာ ၂၂၇၇ ဦးလည်း ဖမ်းဆီး ထိန်းသိမ်းခံခဲ့ရသည်ဟု အမေရိကန် အခြေစိုက် လူ့အခွင့်အရေး တက်ကြွလှုပ်ရှား သတင်းဌာန – HRANA က ဆိုသည်။
ထို့ပြင် အီရန် တစ်နိုင်ငံလုံးတွင်လည်း အင်တာနက် အမှောင်ချထားသည်။
“ကျနော်တို့က အနာဆုံးနေရာကို ထိုးနှက်သွားပါမယ်ဟု ထရမ့်က အိမ်ဖြူတော်၌ သောကြာနေ့တွင် ပြောသည်။
၎င်းတို့အစိုးရက အီရန်အခြေအနေကို စောင့်ကြည့်နေကြောင်းနှင့် အမေရိကန်၏ ပါဝင်ပတ်သက်မှု ဆိုသည်မှာ မြေပြင်သို့ စစ်သားများ စေလွှတ်ခြင်းဟု မဆိုလိုကြောင်း ၎င်းက ဆက်ပြောသည်။
အေးကျော်
Ref: BBC
#MeKongNews
#ထရမ့်
#အဖျက်သမား
#ဆန္ဒပြ
#ခါမီနီ
#ပုတ်ခတ်
