မဲခေါင်၊ ဒီဇင်ဘာ ၂၁
မော်လ်ဒိုဗာနယ်စပ်သို့ အရေးပါသော လမ်းတစ်ခုနှင့် အိုဒက်ဆာဒေသမှ စွမ်းအင် အဆောက်အဦးများနှင့် ဆိပ် ကမ်းများကို ရုရှားက လေကြောင်းမှ ရက်ပေါင်းများစွာ တိုးမြှင့် တိုက်ခိုက်ခဲ့ပြီးနောက် ယူကရိန်း၏ ပင်လယ်နက် ထွက်ပေါက်ကို ဖြတ်တောက်ပစ်ရန် ရုရှားက ကြိုးစားနေကြောင်း ယူကရိန်းသမ္မတ ဗိုလိုဒီမာဇီလန်စကီးက ပြောသည်။
ယူကရိန်းကို ပင်လယ်နှင့် အဆက်ဖြတ်ပစ်မည်ဟု မော်စကိုက ခြိမ်းခြောက်ခဲ့ပြီးနောက် ယူကရိန်း၏ နိုင်ငံခြားကုန်သွယ်မှုနှင့် လောင်စာ ထောက်ပံ့မှုများရှိရာ အိုဒက်ဆာဒေသ အပေါ် ရုရှားက ဒရုန်းများ၊ ဒုံးကျည်များဖြင့် ဆက်တိုက်နီးပါး တိုက်ခိုက်ခဲ့သည်။
“ ဆိပ်ကမ်း အခြေခံအဆောက်အအုံနဲ့ ထောက်ပံ့ပို့ဆောင်မှု လုပ်ငန်းတွေအပေါ် ရုရှားရဲ့ တိုက်ခိုက်မှုတွေကြောင့် အိုဒက်ဆာ အခြေအနေက ခက်ခဲကြမ်းတမ်းပါတယ်။ ယူကရိန်းရဲ့ ပင်လယ် ချိတ်ဆက်မှုကို ကန့်သတ်ဖို့နဲ့ ကမ်းရိုးတန်းဒေသတွေကို ပိတ်ဆို့သွားဖို့ ရုရှားက ထပ်ပြီး ကြိုးစားနေပါတယ်” ဟု ဇီလန်စကီးက ကိဗ်မြို့တွင် သတင်းထောက်များအား ပြောသည်။
ပစ်ဒင်ညီ ဆိပ်ကမ်းအား ရုရှား၏ တိုက်ခိုက်မှုများကြောင့် ဆိပ်ကမ်းမှ သိုလှောင်ကန် အများအပြား ပျက်စီးသွားခဲ့ကြောင်း ယူကရိန်း ဒုတိယဝန်ကြီးချုပ် အိုလက်ဆီကူလီဘာက တယ်လီဂရမ်တွင် ပြောကြားသည်။
ပစ်ဒင်ညီ ဆိပ်ကမ်းဒေသမှ အနောက်တောင်ဘက်ရှိ ဒီနိုင်စကာမြစ်ကို ဖြတ်ကျော် တည်ဆောက်ထားပြီး မော်လ်ဒိုဗာနိုင်ငံ နယ်စပ်သို့ သွားရောက်ရာ လမ်းပေါ်ရှိ တံတားတစ်စင်းကိုလည်း ရုရှားတပ်ဖွဲ့များက အနည်းဆုံး ၅ ကြိမ် တိုက်ခိုက်ခဲ့ပြီး ယခုအခါ ယင်းတံတားကို အသုံးပြု၍ မရကြောင်းလည်း ကူလီဘာက ဆက်ပြောသည်။
ယူကရိန်း၏ လောင်စာဆီ ၄၀ ရာခိုင်နှုန်းကို ထောက်ပံ့ပေးနေသော ယင်းလမ်းကြောင်းပေါ်တွင် ယာယီ တံတားတစ်စင်း တည်ဆောက်ထားပြီး ထောက်ပံ့ ပို့ဆောင်မှုများအား အခြားဒေသများ မှတစ်ဆင့် လမ်းကြောင်း ပြောင်းထားသည်ဟု ကူလီဘာက ဆက်ပြောသည်။
နိုင်ငံတကာ တားဆီး ပိတ်ဆို့မှုများကို ရှောင်ကွင်းသွားနေသည့် ရုရှား၏ မှောင်ခို ရေနံတင်သင်္ဘောများကို ယူကရိန်းက မကြာသေးမီတွင် ဒရုန်းများဖြင့် စတင် တိုက်ခိုက်လာခဲ့ခြင်းကို လက်စားချေသည့် အနေဖြင့် ယူကရိန်း၏ ပင်လယ်နက်သို့ ထွက်ပေါက်ကို ဖြတ်တောက်ပစ်မည်ဟု ရုရှားသမ္မတ ပူတင်က သန္နိဌာန်ပြုခဲ့သည်။
စစ်ပွဲ အဆုံးသတ်ရေး နားချရန်ခက်ခဲသော သံတမန်ရေး တွန်းအားပေးမှုကို အမေရိကန်က လုပ်ဆောင်နေချိန်မှာပင် တိုက်ခိုက်မှုများ မြင့်တက်လာခြင်း ဖြစ်သည်။
အမေရိကန်အဖွဲ့က သောကြာနေ့တွင် ယူကရိန်းနှင့် ဆွေးနွေးခဲ့ပြီး ယနေ့တွင် ဖလော်ရီဒါပြည်နယ်၌ ရုရှား ကိုယ်စားလှယ်များနှင့် တွေ့ဆုံရန်ရှိကြောင်း သိရသည်။
အေးကျော်
Ref: Reuters
#MeKongNews
#ယူကရိန်း
#ပင်လယ်ထွက်ပေါက်
#ရုရှား
#ဇီလန်စကီး
#အိုဒက်ဆာ
