မဲခေါင်၊ ဒီဇင်ဘာ ၂၄
အာဏာရှင် အာဆတ် ကျရှုံးပြီး ရုရှားကို ထွက်ပြေးခိုလှုံသွားပြီးနောက်ပိုင်း ၁၅ ရက်အတွင်း ဆီးရီးယားက ကိုယ့်နေအိမ်ကိုယ်ပြန်ကြတဲ့ ဒုက္ခသည်ပေါင်း ၂၅၀၀၀ ကျော်သွားခဲ့ပြီလို့ တူရကီ ပြည်ထဲရေးဝန်ကြီး ယာလီကာယာ က ဒီဇင်ဘာ ၂၄ ရက်နေ့မှာပဲ AFP သတင်းဌာနကို အသိပေးပြောကြားသွားခဲ့ပါတယ်။
၂၀၁၁ ခုနှစ်ကတည်းက ဆီးရီးယားမှာ ပြည်တွင်းစစ်ပွဲစတင်ဖြစ်ပွားခဲ့လို့ ဒုက္ခသည် ၃ သန်းနီးပါးဟာ အိမ်နီးချင်း တူရကီနိုင်ငံကို ထွက်ပြေးခိုလှုံခဲ့ကြရပြီး တူရကီသမ္မတ အာဒိုဂန် ဦးဆောင်တဲ့ အစိုးရအဖွဲ့အတွက် ခေါင်းခဲစရာ ပြဿနာဖြစ်နေခဲ့ပါတယ်။
ဆီးရီးယားပြည်တွင်းစစ် စတင်ကတည်းက အာဆတ် အစိုးရနဲ့ မပြေလည်ခဲ့တဲ့ တူရကီဟာ ဆီးရီးယားက သံရုံးကို ပိတ်သိမ်းခဲ့ပေမယ့် အာဆတ် အာဏာကျရှုံးသွားပြီး ၅ ရက်အတွင်း ဆီးရီး ယားအစိုးရသစ်ဖြစ်လာစေတဲ့ အစ္စလာမ္မစ် ဦးဆောင်တပ်နဲ့ ဆက်ဆံရေး ကောင်းမွန်စွာနဲ့ သံရုံးကို ဒမက်စကက် မြို့မှာ ပြန်လည်ဖွင့်လှစ်ကာ ဒုက္ခသည်တွေ ဆီးရီးယားက နေအိမ်ပြန်နိုင်ရေး ပူးပေါင်းဆောင်ရွက်နေခဲ့တာပဲ ဖြစ်ပါတယ်။
တူရကီဟာ ဒမက်စကက်နဲ့ အလက်ပိုမြို့မှာ သံရုံးနဲ့ ကောင်စစ်ဝန်ရုံးတွေ ပြန်လည်ဖွင့်လှစ်ခဲ့ပြီး တူရကီကနေ နေအိမ်ပြန်ကြမယ့် ဒုက္ခသည်တွေကို တစ်မိသားစုမှာ တစ်ယောက်ဟာ ဇန်နဝါရီ ၁ ရက်ကနေ ဇူလိုင်လအထိ ဆီးရီးယားက နေအိမ်ကို ပြန်သွားကြည့်ပြီး တူရကီနိုင်ငံထဲ ၃ ကြိမ် ဝင်ထွက်ခွင့်ပြုကြောင်း၊ အိမ်ပြန်ကြမယ် ဆိုရင် ကားအပါအဝင် ပိုင်ဆိုင်ပစ္စည်းတွေကိုပါ တစ်ပါတည်း သယ်ဆောင်ပြန်ခွင့်ပြုကြောင်း ထုတ်ပြန်ခဲ့ပါတယ်။
Ref: turkishminute
MKF-001
#MeKongNews
#ဆီးရီးယား
#အာဆတ်
#သောင်းချီ
#ဌာနေ
#ထွက်ပြေး
#ရုရှား
