မဲခေါင်၊ ဒီဇင်ဘာ ၁၀
ဆီးရီးယားမှာ အာဏာရှင် ဘာရှာအယ်လ်အာဆတ် ရုရှားကို ထွက်ပြေးသွားခဲ့ပြီး တော်လှန်သူပုန်အဖွဲ့က သိမ်းပိုက်လိုက်ပြီးနောက် ဒီဇင်ဘာ ၉ ရက်နေ့မှာပဲ ခေတ်အဆက်ဆက် နိုင်ငံအာဏာယူခဲ့တဲ့ အာဆတ်မိသားစုထဲက ဘာရှာရဲ့ ဖခင် သမ္မတဟောင်း ဟာဖက်ဇ်အယ်လ်အာဆတ်ရဲ့ နိုင်ငံအတွင်း အကြီးမားဆုံး ရုပ်တုကြီးကို ဖြိုချ အောင်ပွဲခံခဲ့ကြပါတယ်။
တော်လှန်သူပုန် အစ္စလာမ္မစ်တပ်တွေဟာ ပြီးခဲ့တဲ့ တစ်ပတ်ကလည်း ကွယ်လွန်သွားပြီဖြစ်တဲ့ ဘာရှာရဲ့ အစ်ကို ဘက်ဆယ်အယ်လ်အာဆတ်ရဲ့ အလက်ပိုမြို့က ရုပ်တုကြီးကို ဖြိုချအောင်ပွဲခံခဲ့သေးပြီး အခုလည်း ဒမက်စကက်မြို့က အာဆတ်မိသားစု ရုပ်တုတွေထဲ အကြီးမားဆုံး ရုပ်တုဖြစ်တဲ့ ဖခင် ဟာဖက်ဇ်အယ်လ်အာဆတ် ရုပ်တုကြီးကို အုပ်မြစ်ပါမကျန် တစ်ဆင့်ချင်း ဖြိုချပြီးနောက် AK 47 သေနတ်တွေကို မိုးပေါ် အချက်ပေါင်းများစွာ ပစ်ဖောက်ပြီး ထောင်ချီ အောင်ပွဲခံအခမ်းအနား ကျင်းပခဲ့ကြပါတယ်။
ဒမက်စကက်မြို့တောင်ပိုင်းမှာ ဒီရုပ်တုကြီးဖြိုချမှုကြောင့် ဖုန်လုံးကြီးတွေ၊ သေနတ်သံတွေ ဆူညံနေခဲ့သလို “ခေါင်းကိုမော့ . . . မင်းတို့ဟာ လွတ်လပ်တဲ့ ဆီးရီးယားသားတွေ ဖြစ်ခဲ့ပြီ” ဆိုတဲ့ ကြွေးကြော်သံတွေ ညံနေခဲ့ပါတယ်။
၂၄ နှစ်တာ အာဆတ်ရဲ့ အာဏာရှင်ခေတ် ပျက်သုဉ်းသွားပြီဖြစ်ပေမယ့် ဆီးရီးယားမှာ အောင်နိုင်ခဲ့တဲ့ တော်လှန်သူပုန်တပ်ဟာ အများစုကို မတရားဖမ်းဆီးထားတဲ့ အာဆတ်ရဲ့ လူသတ်ရုံခေါ် ဆက်ဒ်နာရာ စစ်အကျဉ်းထောင်ထဲက အကျဉ်းသား ၁ သိန်းကို ကယ်ထုတ်နိုင်ရေးကတော့ အရေးပေါ် အခြေအနေ ရောက်ရှိနေပါတယ်။
အကျဉ်းခန်းတွေထဲက ထောင်ပေါင်းများစွာသော ကလေး၊ အမျိုးသမီး၊ အမျိုးသားများစွာကို ကယ်ထုတ်နိုင်ခဲ့ပြီဖြစ်ပေမယ့် ဆက်ဒ်နာရာထောင်ကြီးရဲ့ မြေအောက်ခန်းတွေထဲမှာ အီလက်ထရွန်းနစ် စနစ်နဲ့ တံခါးတွေပိတ်ထားတဲ့ အကျဉ်းခန်းပေါင်းများစွာထဲကို ဝင်ရောက်ကယ်တင်နိုင်ဖို့ အရေးပေါ် ကယ်ဆယ်ရေး အဖွဲ့တွေစုရုံးကြိုးစားနေပေမယ့် ဖွင့်မရနိုင်သေးတာကြောင့် အကျဉ်းသားတွေ အသက်ရှူမရဘဲ သေဆုံးမှာကို အထူး စိုးရိမ်နေရကြောင်းလည်း သိရှိရပါတယ်။
အာဆတ်ရဲ့ ထောင် တံခါး ထိန်းချုပ်ခဲ့သူတွေလည်း ထွက်ပြေးသွားခဲ့ပြီဖြစ်လို့ စနစ်တင်းကျပ်စွာနဲ့ ကုဒ်တွေ သတ်မှတ်ပြီး မြေအောက်ထဲ ပိတ်လှောင်ထားတဲ့ အကျဉ်းသားပေါင်း ၁ သိန်းဝန်းကျင်ဟာ အချိန်မီ မကယ်တင် နိုင်ရင် သေဆုံးရဖို့ ရှိနေပါတယ်။
ဒါကြောင့် ဆီးရီးယားပြည်သူ့ကာကွယ်ရေးအဖွဲ့ အရေးပေါ် ကယ်ဆယ်ရေး တပ်ဖွဲ့ဝင်တွေဟာ မြေအောက်အကျဉ်းခန်းတွေကို ပိတ်ထားတဲ့ ကွန်ကရစ်တွေကို တူးဖျက်နေကြသလို အီလက်ထရွန်းနစ်တံခါးတွေကို ဖွင့်ပြီး အကျဉ်းသားတွေကို ကယ်နိုင်စေမယ့် သတင်းအချက်အလက်ပေးသူကို ဒေါ်လာ ၃၀၀၀ ဆုကြေးချီးမြှင့်သွားမယ်လို့ပါ ဒီဇင်ဘာ ၉ ရက်မှာ ထုတ်ပြန်ခဲ့ပါတယ်။
Ref:Thesun
MKF-001
#MeKongNews
#အာဆတ်
#ဖခင်ရုပ်တု
#တော်လှန်သူပုန်
#ဖြိုချ
#ဆီးရီးယား
#အောင်ပွဲခံ
