မဲခေါင်၊ နိုဝင်ဘာ ၁၂
ဗြိတိန်ဝန်ကြီးချုပ် ကိုင်ရာစတာမာနဲ့ ပြင်သစ်သမ္မတ မက်ခရွန်တို့ဟာ ယူကရိန်းကို အနောက်မဟာမိတ်အဖြစ် ထောက်ပံ့ပေးပို့ထားတဲ့ Storm Shadow တာဝေးပစ်ဒုံးကျည်တွေကို ရုရှားနိုင်ငံထဲ ယူကရိန်းဘက်က ပစ်ခတ် ခွင့်အတွက် အမေရိကန်သမ္မတ ဂျိုးဘိုင်ဒန် ခွင့်ပြုချက်ပေးရေး နိုဝင်ဘာ ၁၁ ရက်နေ့က ဆွေးနွေးခဲ့အပြီး ဂျိုးဘိုင်ဒန်ဘက်က ခွင့်ပြုပေးဖွယ်ရှိနေတယ်လို့ Telegraph သတင်းက ဖော်ပြသွားပါတယ်။
စစ်မီးပိုမိုကျယ်ပြန့်လာမှာ စိုးရိမ်လို့ ဂျိုးဘိုင်ဒန်ဟာ ယူကရိန်းကို ထောက်ပံ့ထားတဲ့ တာဝေးပစ်ဒုံးကျည်တွေကို မပစ်ခတ်ဖို့ တားမြစ်ထားဆဲဖြစ်ပြီး ပစ်ခွင့်ပေးထားတယ် ဆိုတဲ့သတင်းတွေကလည်း အတည်မပြုနိင်တဲ့ ကောလာဟလသတင်းတွေသာ ဖြစ်ခဲ့ပါတယ်။
ရုရှားဘက်က ယူကရိန်းနယ်မြေတွေကို သိမ်းပိုက်နိုင်မှု အရှိန် မြင့်တက်လာသလို မကြာသေးခင်က Yars နျူကလီးယားဒုံးကျည်ပါ စမ်းသပ်ပစ်ဖောက်မှုလုပ်ခဲ့ပြီး ဒုံးကျည်၊ လက်နက်ကြီးကျည်များစွာကို စစ်ရေးအောင်နိုင်ဖို့ အစုလိုက်အပြုံလိုက် ရှေ့တန်းကို ပို့ဆောင်သိုလှောင်ထား ပြီးဖြစ်ပါတယ်။
ဒါကြောင့် ယူကရိန်းသမ္မတ ဇီလန်းစကီးက ရုရှားထိုးစစ်ကို ဟန့်တားနိုင်ရေး ရုရှားနိုင်ငံ ကက်ရှ်ဒေသထဲ ဝင်ရောက် သိမ်းပိုက်ထားတဲ့အထိ ထိုးစစ်ပြန်ဆင်နိုင်ခဲ့ပေမယ့် လပေါင်းများစွာ ရုရှားနိုင်ငံအတွင်းပိုင်းထဲ အထိ တာဝေးပစ်ဒုံးကျည်တွေ ပစ်ခွင့်ကို အမေရိကန်က ခွင့်မပြုသေးပါဘူး။
ဇန်နဝါရီ ၂၀ ရက်နေ့မှာ အမေရိကန်သမ္မတအဖြစ် ဒုတိယအကြိမ်တက်ရောက်လာမယ့် ဒေါ်နယ်ထရမ့်ဟာ ရုရှား – ယူကရိန်းစစ်ပြေငြိမ်းရေး အဆိုကို ခုကတည်းက အကြောင်းကြားတင်ပြမှုမှာ ယူကရိန်းအနေနဲ့ သိမ်းပိုက်ခံ ခရိုင်းမီးယားကို ပြန်ရဖို့ လက်လျှော့လိုက်ဖို့၊ နေတိုးအဖွဲ့ဝင်နိုင်ငံအဖြစ် နောက် နှစ် ၂၀ အတွင်း ဝင်ရောက်မှာ မဟုတ်ဘူးလို့ လက်ခံသဘောတူမှုတွေ လိုက်လျှောပေးရင် လက်ရှိစစ်မှာ စစ်မဲ့ဇုန်သတ်မှတ်ပြီး စစ်ပွဲရပ်တန့် ရေး တင်ပြထားကြောင်း Wall Street Journal က ဖော်ပြခဲ့ပါတယ်။
ဒီအခြေအနေမှာ ဂျိုးဘိုင်ဒန်အနေနဲ့ သမ္မတအဖြစ် နောက်ဆုံးတာဝန်ယူတဲ့ ရက်စွဲတွေအတွင်း ယူကရိန်းကို ရုရှား နိုင်ငံအတွင်းထဲ ပစ်ခတ်နိုင်မယ့် တာဝေးပစ်ဒုံးကျည်တွေ အသုံးပြုခွင့်ပေးမယ်လို့ ဗြိတိန်နဲ့ ပြင်သစ်ခေါင်းဆောင် နှစ်ယောက်က မျှော်လင့်ထားကြောင်း Telegraph က ဖော်ပြသွားတာဖြစ်ပါတယ်။
Storm Shadow ဒုံးကျည် တွေဟာ ဗြိတိန်နဲ့ ပြင်သစ်ထုတ်လုပ်တာမှန်ပေမယ့် အမေရိကန်နည်းပညာ အသုံးပြုထုတ်လုပ်ထားလို့ ဂျိုးဘိုင်ဒန်ရဲ့ ခွင့်ပြုချက်ရမှ ယူကရိန်းက ပစ်ခွင့်ရနိုင်မှာလည်း ဖြစ်ပါတယ်။
Ref:Thesun
MKF-001
#MeKongNews
#ရုရှား
#ယူကရိန်း
#ဘိုင်ဒန်
#ပစ်ခွင့်
#တာဝေးပစ်
