မဲခေါင်၊ စက်တင်ဘာ ၆
နုပျိုစေတဲ့ Botox ထိုးရခြင်းကို စွဲလမ်းနေသူ ၇၁ နှစ်အရွယ် ရုရှားသမ္မတပူတင်ဟာ အာဏာကို ထပ်ပြီး ကြာရှည် စွဲကိုင်ထားချင်တာကြောင့် သူနဲ့သူ့အပေါင်းအပါ သက်ကြီးခရိုနီတွေအတွက် မအိုဆေး တစ်နည်းအားဖြင့် အသက်အိုမင်းခြင်းကို တားဆီးကာကွယ်တဲ့ဆေး အရည်အသွေးတိုးမြှင့် ထုတ်လုပ်ဖို့ သိပ္ပံပညာရှင်တွေကို အမိန့်ပေး စေခိုင်းထားကြောင်း သိရှိရပါတယ်။
Meduza သတင်းမှာ ဖော်ပြပါရှိလာမှုထဲမှာတော့ ရုရှားကျန်းမာရေးဝန်ကြီးဌာနဟာ ဆေးသိပ္ပံပညာရှင်တွေဆီ ပူတင်ထံက နုပျိုဆေးအတွက် လေ့လာတွေ့ရှိချက် အသေးစိတ်ကို တင်ပြဖို့ တောင်းဆိုလာတဲ့စာကို သက်သေ အဖြစ်ဖော်ပြခဲ့ပြီး လွန်ဆန်မရတဲ့ အိုမင်းခြင်းကို အတင်းအကြပ် မအိုဆေးဖော်ခိုင်းမှုအတွက် ဆေးသိပ္ပံပညာရှင်တွေ ရှော့ခ်ဖြစ်နေခဲ့ကြတယ်လို့ ဆိုပါတယ်။
ရုရှားအမျိုးသား ဆေးဘက်ဆိုင်ရာ သုတေသနအဖွဲ့ထဲက တစ်ယောက်က “ ကျွန်တော်တို့ကို နုပျိုဆေး လေ့လာ တွေ့ရှိထားမှုနဲ့ ထပ်ပြီး အရည်အသွေးမြှင့်တင်ဖို့ လေ့လာတွေ့ရှိမှုတွေကို တစ်ရက်အတွင်း အသေးစိတ်ပေးဖို့ အမိန့်ပေးလာတာပါ။ Big Boss ပူတင်ဆီက တိုက်ရိုက်လာတဲ့အမိန့်မို့ ကျန်းမာရေးသုတေသီတွေလည်း ဖြေရှင်းနိုင်ဖို့ တက်သုတ်ရိုက်နေကြရပါပြီ။ ခန္ဓကိုယ်ထဲက ဆဲလ်တွေ ယိုယွင်းခြင်းကို လျှော့ချပေးတဲ့နည်းနဲ့ အဆင့်မြှင့်တင်မှု အဆိုပြုချက်တွေကို မြန်နိုင်သမျှ အမြန်ဆုံး တင်ပြနေကြရတာပါ” လို့ ပြောသွားခဲ့ပါတယ်။
ဆေးဘက်ဆိုင်ရာ ကျွမ်းကျင်သူတွေကတော့ မအိုဆေးအဆင့်မြှင့်တင်ခြင်းမှာ မှတ်ဉာဏ်နဲ့ အာရုံချို့ယွင်းမှု လျှော့ချရေးနည်းစနစ်သစ်တွေ၊ ခုခံအားစနစ်တွေ၊ ဇီ၀ပုံနှိပ်ခြင်းနည်းစနစ်တွေကို အခြေခံပြီး တီထွင်ထုတ် လုပ်မှာကို ဆိုလိုတာလို့ သုံးသပ်ပြောဆိုနေကြပါတယ်။
ပူတင်ဟာ သူ့ဆေးသိပ္ပံပညာရှင်တွေရဲ့ Russian genome ခေါ် မအိုဆေးစီမံချက်အရ လူတိုင်း ၁၁၀ ကနေ ၁၂၀ အထိ နေထိုင်ရှင်သန် သွားနိုင်ဖို့ရှိကြောင်းနဲ့ ဒီဆေးတွေဖော်ထုတ်နိုင်ရင် ၂၀၃၀ ပြည့်နှစ်မှာ သူအပါအဝင် လူသား ၁၇၅၀၀၀ ကို ကယ်တင်နိုင်မယ်လို့ ၂၀၂၄ နှစ်ဆန်းပိုင်းမှာ ကြွေးကြော်ပြောဆို ထားသူဖြစ်ပါတယ်။
Ref:Thesun
MKF-001
