မဲခေါင်၊ သြဂုတ် ၁၁
မြောက်ကိုရီးယားက နျူကလီးယားပရိုဂရမ်တွေမှာ အစောင့်လုပ်ပေးရတဲ့ စစ်သားတိုင်း အသက် ၄၀ ကျော်အထိ မနေရဘဲ သေဆုံးနေရကြောင်း တောင်ကိုရီးယားဘက် ဘက်ပြောင်းခိုလှုံလာသူ ကင်ဂျောင်အေးဆိုတဲ့ အမျိုးသမီး က ထုတ်ဖော်ပြောဆိုခဲ့ပါတယ်။
ကင်ဂျောင်အေးရဲ့ အစ်ကိုဖြစ်သူ ကင်ဂျုံချူဟာ ယန်ဗျောင်နျူကလီးယားသိပ္ပံသုတေသနစင်တာမှာ ဆယ်ကျော် သက်အရွယ်ကတည်းကစလို့ ၁၃ နှစ်ကြာ စစ်မှုထမ်းအစောင့်အဖြစ် တာဝန်ယူခဲ့ရပြီး အနုမြူဓာတ်သတ္တု ရေဒီယို သတိ္တကြွမှုတွေကို နိစ္စဓူ၀ ခံရရင်း ၃၉ နှစ်အရွယ်မှာ ဆုံးပါးသွားခဲ့ကြောင်းနဲ့ နောက်ကွယ်က ကြောက်စရာ ဖြစ်ရပ် မှန်တွေကို ဖွင့်ချသွားတာဖြစ်ပါတယ်။
သူတို့မိသားစုဟာ ကင်ဂျုံချူ စစ်မှုထမ်းနေတုန်း နေထိုင်ရာ မြို့တော်ပြုံယမ်းအနီးက ဒုံးကျည်ထုတ်စက်ရုံမှာသာ တာဝန်ကျနေခဲ့တယ်လို့လိမ်ညာ စာပို့ခံရပြီး ၁၃ နှစ်လုံး တစ်ကြိမ်မှ အိမ်ပြန်ခွင့်မရဘဲ နောက်ဆုံးမှ စစ်သားတစ်ယောက် အသိပေးလို့ လူတိုင်း အသက် ၄၀ ပြည့်အောင် မနေရစေတဲ့ ယန်ဗျောင်နျူကလီးယား စင်တာမှာ တာဝန်ကျနေခဲ့တာကို သိခဲ့ရကြောင်းနဲ့ သွားတွေ့တော့ မေးရိုးတွေ မဲနေပြီး မျက်နှာက ပန်းရောင်သန်းနေတယ်လို့ ဆိုပါတယ်။
၃ လ တစ်ခါ မိသားစုနဲ့ ပုံမှန်စာ ပို့မှုမှာလည်း တစ်ခါလာလည်း သာကြောင်း၊ မာကြောင်း၊ အလုပ်ထဲမှာ သက်သာအဆင် ပြေကြောင်း၊ နိုင်ငံခေါင်းဆောင် ကင်ဂျုံအန်အရိပ်အောက်မှာ ဂုဏ်ယူစွာ တာဝန်ထမ်းဆောင်နေကြောင်းဆိုတဲ့ ပုံစံ တူစာတွေချည်းပဲ ရခဲ့တယ်လို့ ဆိုပါတယ်။
နောက်မှ သိရတာက စာတွေကို ဒိုင်ခံရေးပေးရတဲ့ စစ်သားက နျူကလီးယားစက်ရုံ တွေစောင့်ရတဲ့ စစ်သားတိုင်းအတွက် သူပဲ အမြဲရေးပေးတာဖြစ်တယ်လို့ ပြောပြသွားကြောင်း ညီမဖြစ်သူ ကင် ဂျောင်အေးက ဖွင့်ချသွားတာဖြစ်ပါတယ်။
နောက်ဆုံး အသက် ၃၀ အရွယ်ရောက်ချိန် နေထိုင်မကောင်းမှ အိမ်ပြန်ရောက်လာတော့ ပိန်လှီးနေပြီး ခြေထောက်နှစ်ဖက်မှာ တစ်ဖက်က ချွေးနဲ့ သွေးရည်ကြည်တွေ စိမ့်ထွက်နေကာ တင်ပါးမှာ အနာကူးစက်မှုတွေ ကုမရသလို ကိုယ်တွင်း ကလီစာ ဆဲလ်တွေ သေပြီး ၃၉ နှစ်အရွယ်မှာ အစ်ကိုဖြစ်သူ ကင်ဂျုံချူ သေဆုံးသွားရတယ်လို့ ကင်ဂျောင်အေးက ထပ်မံဖွင့်ဟပါတယ်။
ဒီ ယန်ဖျောင်းနျူကလီးယားဓာတ်ပေါင်းဖို စက်ရုံနားနေထိုင်ကြသူတွေမှာတောင် အဏုမြူရောင်ခြည် သင့်လို့ ကလေးတွေ မွေးဖွားမှုမှာ စအိုမပါ၊ တူညီတဲ့ ရောဂါလက္ခဏာပေါင်းများစွာနဲ့ သေဆုံးသူတွေဟာ ပြိုယမ်းတောင်ပိုင်းဆေးရုံမှာ အများအပြား အဆက်မပြတ် ရှိနေခဲ့ပါတယ်။
ဒါကြောင့် မိခင်ဖြစ်သူဟာ နောက်သားသမီးတွေ ဒီလိုထပ်ခံစားရမှာစိုးလို့ ၂၀၀၃ ခုနှစ်မှာ အရင်ဆုံး တရုတ်ပြည်ကို ထွက်ပြေးပြီးမှ တောင်ကိုရီးယားကို ဘက်ပြောင်းခိုလှုံခဲ့တာဖြစ်တယ်လို့ ကင်ဂျူအေး က ဖွင့်ချသွားခဲ့ပါတယ်။
Ref:Thesun
MKF-001
