မဲခေါင်၊ မေ ၁၇
ပြီးခဲ့တဲ့တစ်ပတ် သောကြာနေ့ကတည်းက ပူတင်ရဲ့ ရုရှားတပ်တွေဟာ စစ်သည်အင်အား ၄၀၀၀၀၊ တင့်ကား အစီး ၅၀၀ နဲ့ ယူကရိန်းနိုင်ငံရဲ့ ဒုတိယအကြီးဆုံးမြို့ဖြစ်တဲ့ ခါကိဗ်ဒေသကို အလုံးအရင်း ထိုးစစ်ဆင်နေခဲ့ရာက ရုရှားတပ်တွေ အသာစီးအနေအထားရနေကြောင်း ခါကိဗ်မြို့တော်ဝန် အီဟော်တာရက်ဟော့ဗ်က ထုတ်ပြန် ပြောဆိုလာပါတယ်။
ရုရှားတပ်တွေဟာ အခု ခါကိဗ်ရဲ့ အော့စ်နော့ဗ်ယန်းစကီးဒေသထဲ စစ်ကြောင်း ထိုးဝင်လာနိုင်လို့ ဒေသခံ ၁ . ၅ သန်းဟာ ဒေသတောင်ပိုင်းကို ထွက်ပြေးတိမ်းရှောင်နေရပြီး ရုရှားတပ်တွေဟာ ရွာပေါင်း ၃၀ ကျောက်ကို ဖျက် ဆီးတိုက်ခိုက်လို့ မြို့နား နီးကပ်လာနေကြောင်း အီဟော်တာရက်ဟော့ဗ်က ရှင်းလင်းပြောကြား သွားပါတယ်။
မေ ၁၆ ရက်က ယူကရိန်းသမ္မတ ဇီလန်းစကီးကိုယ်တိုင် ခါကိဗ် စစ်မြေပြင်ကို ရောက်ရှိလာပြီး အားပေးစကား ပြောဆိုပေမယ့် သူတို့တပ်တွေမှာ တာတိုပစ်ဒုံးကျည်ရန်တွေကာကွယ်ဖို့ လေကြောင်းရန်ကာကွယ်ရေးစနစ်တွေ မရှိသလောက် နည်းပါးလာခြင်း၊ ရုရှားရဲ့ ခါကိဗ်ဒေသကို ဒီရက်ထဲ လေကြောင်းတိုက်ခိုက်မှုမှာ စစ်ပွဲကာလ ၂ နှစ် အတွင်း အကြာမြင့်ဆုံးအဖြစ် ၁၆ နာရီခွဲအထိ ဆက်တိုက် ဆင်နွှဲခဲ့လို့ နယ်မြေတွေ ဆုံးရှုံးနေရတာဖြစ်ကြောင်း တာရက်ဟော့ဗ်က ပြောဆိုသွားတာဖြစ်ပါတယ်။
ဒါပေမဲ့ ပြီးခဲ့တဲ့ တနင်္ဂနွေ တစ်ရက်တည်း ရုရှားတပ် ၁၇၄၀ စံချိန်တင် သေဆုံးမှုကိုကြည့်ရင် ဒီလောက် ရက်တိုတို အတွင်း ခါကိဗ်ကို ရုရှားတပ်တွေ သိမ်းပိုက်နိုင်ဖို့ မလုံလောက်ကြောင်း နေတိုးထိပ်တန်းတပ်မှူး ခရစ္စတိုဗာ ကာဗိုလ်လီက သုံးသပ်ပါတယ်။
“သူတို့မှာ ဒီလောက် စွမ်းရည်ပြည့်၀တဲ့ စစ်သည်အင်အားရှိမယ်လို့မထင်ဘူး” လို့ သုံးသပ်ခဲ့တယ်။
ယူကရိန်းအတွက် စစ်ရေးအကူအညီ လက်နက်တွေဟာလည်း ရှေ့တန်းရောက်ဖို့ လမ်းမှာ အမြန်ပို့ဆောင်နေတယ်လို့လည်း ပြောသွားပါတယ်။
မေ ၁၇ ရက်မှာ ရုရှားသမ္မတပူတင်ဟာ တရုတ်နိုင်ငံကို အလည်အပတ်ရောက်ရှိနေပြီး တရုတ်သမ္မတ ရှီကျင်းဖျင်နဲ့ တွေ့ဆုံဆွေးနွေးမှုတွေလုပ်ရာမှာ သူတို့ ၂ ယောက်စလုံးဟာ ငြိမ်းချမ်းရေး ကိုယ်စားလှယ်တွေသာဖြစ်တယ်လို့ ဂုဏ်ရည်သွေး ပြောဆိုခဲ့ကြပါတယ်။
Ref:Thesun
MKF-001
