မဲခေါင်၊ ဇန်န၀ါရီ ၂၆

ယီမင်နိုင်ငံတွင်း ထောက်လှမ်းရေးသတင်းရင်းမြစ်တွေအရ အီရန်စပွန်ဆာပေးထားတဲ့ ဟူသီအကြမ်းဖက်အဖွဲ့ဟာ အယ်လ်ခိုင်းဒါးအဖွဲ့ခေါင်းဆောင်တွေနဲ့ ယီမင်နိုင်ငံထဲ လျှို့ဝှက်တွေ့ဆုံဆွေးနွေးမှုလုပ်ခဲ့ပြီး အနောက်မဟာမိတ် နိုင်ငံတွေကို အသေခံတိုက်ခိုက်မှု တစ်လှိုင်းပြီးတစ်လှိုင်း လုပ်ဆောင်ဖို့ ကြံစည်နေကြောင်း သိရှိရပါတယ်။

ယီမင်နိုင်ငံနေရာအများစုကို ထိန်းချုပ်ထားနိုင်တဲ့ ရှီယာမွတ်ဆလင်လက်နက်ကိုင်အကြမ်းဖက်အဖွဲ့ဟာ ဟားမက်စ်ကို အစ္စရေးက ဝင်တိုက်ခိုက်နေလို့ လက်စားချေမှုအဖြစ် ကမ္ဘာ့ပင်လယ်ရေးကြောင်းကုန်သွယ်မှုရဲ့ ၁၂ ရာခိုင်နှုန်းရှိပြီး ပေါင် ၁ ထရီလီယံကုန်သွယ်တန်ကြေးရှိ ပင်လယ်နီထဲက ကုန်တင်သင်္ဘောတွေကို ဒုံးကျည်တွေ၊ ဒရုန်းတွေနဲ့ ဆက်တိုက် တိုက်ခိုက်နေပါတယ်။

ဒါကြောင့် အမေရိကန်နဲ့ မဟာမိတ်ဗြိတိန်တို့ ပူးပေါင်းပြီး ယီမင် နိုင်ငံထဲက ဟူသီအဖွဲ့ရဲ့ အဓိက ပစ်မှတ်တွေကို ဆက်တိုက် တိုက်ခိုက်မှုတွေ ပြုလုပ်နေပြီး ဗြိတိန်မှာ သူတို့နိုင်ငံရဲ့ တန်ကြေးအကြီးဆုံး ပေါင် ၃ . ၅ ဘီလီယံတန် လေယာဉ်တင်သင်္ဘောကြီးကိုပါ ပင်လယ်နီထဲ ထပ်ပို့ဖို့ လွှတ်တော်မှာ ဆွေးနွေးနေပြီဖြစ်ပါတယ်။

ဒီအချိန်မှာ အရင်က အိုဆမာဘင်လာဒင်ခေါင်းဆောင်ခဲ့တဲ့ အယ်လ်ခိုင်းဒါအဖွဲ့ဟာ ယီမင်နိုင်ငံထဲက ဟူသီသူပုန် အဖွဲ့ရဲ့ အကြမ်းဖက်တိုက်ခိုက်မှုတွေမှာ ပူပေါင်းပါဝင်လာခဲ့ပြီး အနောက်မဟာမိတ်တွေကို အသေခံတိုက်ခိုက်မှု တွေ တစ်လှိုင်းပြီးတစ်လှိုင်း ပြုလုပ်သွားဖို့ ယီမင်မြို့တော် ဆန်ညာနဲ့ ဟိုဒိုင်ဒါ ဆိပ်ကမ်းမြို့တွေမှာ နှစ်ကြိမ် လျှို့ဝှက်စည်းဝေးတိုင်ပင်မှုလုပ်ခဲ့ကြောင်း Sky News Arabia က ဖော်ပြသွားပါတယ်။

၉: ၁၁ တိုက်ခိုက်မှုတရားခံ အယ်လ်ခိုင်းဒါးအဖွဲ့ဟာ အမေရိကန်အစိုးရက ကမ္ဘာ့အန္တရာယ်အများဆုံး အကြမ်းဖက်အဖွဲ့အစည်းအဖြစ် သတ်မှတ်ထားခြင်းခံရပြီး ပင်လယ်နီကနေ မိုင် ၂၀ အကျယ်ရှိတဲ့ ဘပ်အယ်လ်မန်ဒက်ဘ် ရေလက်ကြားကို မဖြစ်မနေ ကုန်တင်သင်္ဘောတွေ ဖြတ်သန်းလာရင် ဟူသီနဲ့ ပူးပေါင်းပြီး တိုက်ခိုက်မှု တိုးမြှင့်သွားဖို့လည်း စီစဉ်နေတာဖြစ်ကြောင်း Sky News Arabia မှာ ဖော်ပြသွားပါတယ်။

Ref: Sky News Arabia
MKF-001

#MeKongNews

#ဟူသီ

#ဆွေးနွေး

#တိုက်ခိုက်

#တစ်လှိုင်း

#အနောက်နိုင်ငံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)