မဲခေါင်၊ ဇန်နဝါရီ ၁၇
ဇန်နဝါရီ ၁၅ ရက်က ပြည်သူလွှတ်တော်ချုပ်အစည်းအဝေး (SPA) မှာ မြောက်ကိုရီးယားခေါင်းဆောင် ကင်ဂျုံအန် က ဘိုးဘွားတွေ ချမှတ်ခဲ့တဲ့ တောင်နဲ့မြောက်ကိုရီးယားပြန်လည်ပေါင်းစည်းရေး မူဝါဒတွေကို ပယ်ဖျက်ကြောင်း နဲ့ ပြုံယမ်းမြို့မှာ ဖခင်တည်ဆောက်ခဲ့တဲ့ တောင်မြောက်ပြန်လည်ပေါင်းစည်းနိုင်ရေး မုဒ်ဦးကို ဖြိုချပြီး တောင်ကိုရီးယားဟာ အဓိက ရန်သူတော်ဖြစ်တယ်လို့ ပြောကြားသွားပါတယ်။
မြောက်ကိုရီးယားနိုင်ငံကို ၁၉၄၈ ခုနှစ်ဒုတိယကမ္ဘာစစ်အပြီးကတည်းက ကင်အီဆန်ကစလို့ ကင်မိသားစု အစဉ်အဆက် အုပ်ချုပ်ခဲ့ရာမှာ ၁၉၇၀ ပြည့်လွန်နှစ်တွေကစလို့ တောင်နဲ့မြောက်ကိုရီးယားဟာ တစ်မိသားစု တည်းက ပေါက်ဖွားခဲ့ကြတာဖြစ်လို့ တစ်ချိန်မှာ ပြန်လည်ပေါင်းစည်းရေး မူဝါဒ ၃ ရပ်ကို ကင်အီဆန်က ချမှတ် ပေးခဲ့တာဖြစ်ပါတယ်။
ကင်ဂျုံအန်ရဲ့ ဖခင် ကင်ဂျောင်အီဟာ သူအုပ်ချုပ်တဲ့လက်ထက်မှာ ပြုံယမ်းမြို့မှာ နှစ်နိုင်ငံပြန်လည်ပေါင်းစည်းရေးအထိမ်းအမှတ် ၉ ထပ်မုဒ်ဦးကြီးကို ၂ နှစ်ကြာတည်ဆောက်ခဲ့ပြီး ၂၀၀၁ ခုနှစ် မှာ ဖွင့်လှစ်ခဲ့တာဖြစ်ပါတယ်။
ကင်ဂျုံအန်ဟာ ပြီးခဲ့တဲ့ နှစ်ပိုင်းအတွင်း တောင်ကိုရီးယားကို ခြိမ်းခြောက်ပြီး တိုက်ချင်းပစ်ဒုံးကျည်တွေ၊ အမြောက်တွေ၊ ရေငုပ်သင်္ဘောပစ် နျူကလီးယားတင်ဆောင်ဒုံးတွေ အကြိမ်ကြိမ်စမ်းသပ်ပစ်ခတ်နေပြီး အမေရိကန်နဲ့ ကိုရီးယားကျွန်းဆွယ်မှာ တောင်ကိုရီးယားက ပူးပေါင်းစစ်ရေးလေ့ကျင့်တာဟာ အဆိုးရွားဆုံး ခြိမ်းခြောက်မှုဖြစ်လို့ စစ်ရေးအသင့်ပြင်ဆင်ခိုင်းထားပါတယ်။
နှစ်သစ်ကူးမိန့်ခွန်းမှာလည်း တောင်ကိုရီးယား သည်သာ အဓိက ရန်သူဖြစ်ကြောင်းဖွင့်ပြောခဲ့သလို အခုလည်း တောင်-မြောက် ပြန်လည်ပေါင်းစည်းရေး ကြိုးပမ်းမှုအဖွဲ့တွေအားလုံးကို လွှတ်တော်ကနေ ဖျက်သိမ်းခိုင်းပြီး ပေါင်းစည်းရေးမုဒ်ဦးကိုပါ ဖျက်ချပစ်မယ်လို့ ပြောဆိုသွားကြောင်း မြောက်ကိုရီးယား နိုင်ငံပိုင်မီဒီယာ KCNA ကနေ ထုတ်ပြန်သွားပါတယ်။
ဒီထုတ်ပြန်ချက်အရ ကင်ဂျုံအန်ဟာ နှစ်နိုင်ငံပြန်လည်ပေါင်းစည်းရေးကို ဘိုဘွားတွေ ချမှတ်ခဲ့တဲ့ ငြိမ်းချမ်းစွာ ပေါင်းစည်းရေးမူဝါဒတွေကိုပါ လျစ်လျူရှုလိုက်ပြီး စစ်အင်အားသုံးတဲ့ ပေါင်းစည်းရေးအိပ်မက်ကို မက်နေတာ ဖြစ်မယ်လို့ တောင်-မြောက် ကိုရီးယားပြန်လည်ပေါင်းစည်းရေး အင်စတီကျုက ဂျောင်အန်းမီက သုံးသပ်သွား ပါတယ်။
Ref: cnn
MKF-001
#MeKongNews
#တောင်မြောက်
#ကိုရီးယား
#ဖြိုချ
#ရန်သူ
