မဲခေါင်၊ ဒီဇင်ဘာ ၁၁

နိုင်ငံတကာက ပါလက်စတိုင်းအရပ်သားပြည်သူများစွာ သေဆုံးနေရတဲ့ အစ္စရေးရဲ့ ထိုးစစ်ကို ဝေဖန်အပြစ်တင် နေကြပေမယ့် အစ္စရေးဘက်က ဂါဇာကမ်းမြောင်ဒေသမှာရှိတဲ့ ဟားမက်စ်တွေကို အပြုတ်တိုက်ဖို့ လနဲ့ချီကြာမယ့် စစ်ပွဲကြီးအတွက် ပြင်ဆင်နေပြီဖြစ်ကြောင်း သိရှိရပါတယ်။

ကုလသမဂ္ဂအထွေထွေအတွင်းရေးမှူးချုပ် ဂူတာရက်စ်က ဂါဇာမှာ ချက်ချင်းအပစ်အခတ်ရပ်စဲရေး သဘောတူညီ ချက်အဆိုသစ်ကို တင်သွင်းရာမှာ ၁၅ နိုင်ငံအနက် ၁၃ နိုင်ငံက ထောက်ခံပေမယ့် အမေရီကန်က ဗီတိုအာနာနဲ့ ပယ်ချခဲ့သလို ဗြိတိန်ကလည်း ကြားနေအဖြစ် မဲပေးဖို့ ပျက်ကွက်ခဲ့လို့ အထမမြောက်ခဲ့ပါဘူး။

နောက်ဆုံးရသတင်းတွေအရ လူဦးရေ ၂ . ၃ သန်းရှိတဲ့ ဂါဇာမှာ ၉၀ ရာခိုင်နှုန်းက နေအိမ်စွန့်ခွာထွက်ပြေးနေရပြီး ကုလသမဂ္ဂက ဂါဇာထဲမှာ အန္တရာယ်ကင်းတဲ့ ပြေးစရာမြေ မရှိဘူးလို့ ထုတ်ပြန်ခဲ့ပါတယ်။

အစ္စရေးရဲ့ မြေပြင်၊ ဝေဟင်၊ လက်နက်ကြီးပစ်ခတ်တိုက်ခိုက်မှုတွေကြောင့် ပါလက်စတိုင်းဘက်က သေဆုံးသူပေါင်း ၁၈၀၀၀ နီးပါး ရှိလာခဲ့ပြီဖြစ်ပြီး ၃ ပုံ ၂ ပုံက အမျိုးသမီးနဲ့ ကလေးငယ်တွေဖြစ်တယ်လို့ ပါလက်စတိုင်းကျန်းမာရေးဝန်ကြီးက ထုတ်ပြန်ခဲ့ပါတယ်။

ဒါကြောင့် ကုလသမဂ္ဂဟာ ဒီဇင်ဘာ ၁၂ ရက်နေ့ အထွေထွေညီလာခံမှာ ဂါဇာအရေး ထပ်မံ ဆွေးနွေးပြီး တားမြစ် နိုင်ဖို့ စီစဉ်နေပေမယ့် အစ္စရေးဘက်က အပစ်အခတ်ရပ်စဲမှာ မဟုတ်ဘဲ ဟားမက်စ်ကို အပြီးတိုင် သုတ်သင်ဖို့ လနဲ့ချီကြာမယ့် စစ်ပွဲဆင်နွှဲနိုင်ရေး ပြင်ဆင်နေတယ်လို့ AP သတင်းဌာနက ဖော်ပြသွားတယ်။

အစ္စရေးဟာ ဒီစစ်ပြင်မှုအနေနဲ့ အမေရိကန်ဆီက တင့်ကားကျည် ဒေါ်လာ သန်း ၁၀၀ ဖိုး ရောင်းချပေးသွားဖို့ သဘောတူထား ကြောင်း သိရှိရပါတယ်။

Ref:AP
MKF-001

#MeKongNews

#အစ္စရေး

#ဂါဇာ

#ဟားမက်စ်

#အပြုတ်တိုက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)