မဲခေါင်၊ ဖေဖော်ဝါရီ ၂၃
အင်္ဂလိပ် ဆက်တာမျိုးနွယ်ခွေးကလေး ဘစ္စဘီဟာ ကမ္ဘာ့သက်ရှိထင်ရှား လျှာအရှည်ဆုံးခွေးအဖြစ် ဂင်းနစ် စံချိန်သစ်တင်နိုင်ခဲ့ပါတယ်။
၃နှစ်သားအရွယ် ခွေးကလေး ဘစ္စဘီရဲ့ လျှာဟာ ပါးစပ်အပြင်ဘက်ကို ရေခဲချောင်း တစ်ချောင်းထက်ပိုရှည်အောင်ထွက်နေပြီး ၃ ဒဿမ ၇၄ လက်မ (၉ ဒဿမ ၄၉ စင်တီမီတာ) အထိရှည်ထွက်နေပါတယ်။
ခွေးပိုင်ရှင်တွေဖြစ်တဲ့ ဂျေနဲ့အီရီကာဂျွန်ဆင်တို့က “ ပထမ ခွေးလေး လေ့ကျင့်ခန်းလုပ်အပြီး မောနေချိန် ရှည်ထွက်လာတဲ့ လျှာကိုကြည့်ပြီး မိသားစုဝင်တွေက တော်တော်ရှည်တဲ့ လျှာလို့ သတိပြုမိကြတယ်။ တချို့က စံချိန်တင်လောက်မယ်လို့ အကြံပေးတာနဲ့ ရယ်မောကြရသေးတယ်။ နောက်မှ လျှာရှည်ထွက်နေတဲ့ ဓာတ်ပုံနဲ့ အတိုင်းအတာတွေကို ဓာတ်ပုံရိုက်ပို့ပေးလိုက်တာ’ လို့ ပြောပြသွားပါတယ်။
ခွေးလေး ဘစ္စဘီယာ တင်ပါးဆုံရိုးပုံမှန်မဟုတ်တဲ့အနေအထားရှိပေမယ့် နေ့စဉ် ရေကူး၊ လမ်းလျှောက်လေ့ကျင့် ခန်းတွေ မပျက်တမ်းလုပ်ပြီး ကလေးထိန်းတတ်သလို အဝါရောင်ဂျာကင်ဝတ်သူနောက် လိုက်ရှာတတ်တဲ့ ဉာဏ်ကောင်းပြီးချစ်စရာကောင်းတဲ့ ခွေးလေးဖြစ်တယ်လို့လည်း ပိုင်ရှင် အီရီကာက ညွှန်းဆိုပါတယ်။
မကြာသေးခင်က ဘော်ဘီဆိုတဲ့ခွေးလေးတစ်ကောင်ဟာ အသက် ၃၀ နဲ့ ၂၆၆ ရက်သားရှိတဲ့အတွက် ခွေးသမိုင်း မှာ အသက်အရှည်ဆုံးခွေးအဖြစ် ဂင်းနစ်စံချိန်တင်ခဲ့ပါသေးတယ်။
အရင်က အသက်အကြီးဆုံးခွေးအဖြစ် ၁၉၁၀ ပြည့်နှစ်ကနေ ၁၉၃၉ ခုနှစ်အထိ သက်တမ်း ၂၉ နှစ် ၅ လကြာ ရှင်သန်နေထိုင်သွားတဲ့ ဩစတြေးလျ ခွေးလေး ဘလူးရေးက စံချိန်တင်ထားတာဖြစ်ပြီး ဒါကို ဘော်ဘီက စံချိန်ချိုးဖျက်ခဲ့တာလည်းဖြစ်ပါတယ်။
MKF – 001