မဲခေါင်၊ ဖေဖော်ဝါရီ ၂၅
အိန္ဒိယနိုင်ငံ၊ နယူးဒေလီ အနောက်တောင်ပိုင်း ဂူရူဂရမ်မှာ အသက် ၃၃ နှစ်အရွယ် မိခင် တစ်ယောက်ဟာ ခင်ပွန်းကိုပါ အိမ်ထဲအဝင်မခံဘဲ ကိုဗစ် ကြောက်လို့ အိမ်သော့ ပိတ်နေခဲ့တာ ၃ နှစ်ရှိသွားပြီ ဖြစ်လို့ ကယ်ဆယ်ရေးအဖွဲ့တွေ ခေါ်ပြီး အိမ်တံခါးဖျက်ကာ ဝင်ကယ်ခဲ့ရမှု ဖြစ်ပွားခဲ့ပါတယ်။
၂၀၂၀ ပြည့်နှစ် ကတည်းက လော့ဒေါင်း ပယ်ဖျက်လိုက်ပြီးနောက် ခင်ပွန်းသည် အင်ဂျင်နီယာ ဆူဂျန်မာဟီ ဆိုသူဟာ မနက် အလုပ်သွားပြီး ညနေ ပြန်လာတော့ အိမ်တံခါးသော့ အသေပိတ်ထားတာကို အံ့အားသင့်ဖွယ် တွေ့ခဲ့ရတာ ဖြစ်ပါတယ်။
ဇနီးနဲ့ သားငယ်ကို ဖြောင်းဖျပြီး တံခါးဖွင့်ပေးဖို့ ပြောတာ မရလို့ တခြားမှာ အိမ်ငှားနေပြီး ဗီဒီယိုကောကနေ နေ့တိုင်း ကြိမ်ဖန်များစွာ ဖြောင်းဖျပေမယ့် မရခဲ့သလို ဆွေမျိုး မိဘ အိမ်နီးနားချင်းတွေကို ဖြောင်းဖျခိုင်းလည်း မရတဲ့အတွက် သားအမိ စားသောက်ဖို့ လိုအပ်တာတွေကို နေ့စဉ် အိမ်တံခါးဝမှာသာ ထားပေးခဲ့ရပါတယ်။
ကျောင်းမတတ်တဲ့ သူ့ရဲ့ သားလေး အတွက် ကျောင်းလခတွေကို မပြတ်တမ်း ပေးခဲ့ပြီး နောက်ဆုံး ရဲတပ်ဖွဲ့နဲ့ ကယ်ဆယ်ရေးတပ်ဖွဲ့တွေကို အကူအညီတောင်းပြီး ဖေဖော်ဝါရီ ၁၇ ရက်နေ့ကမှ အိမ်တံခါးဖျက်ကာ ဝင်ရောက် ကယ်တင်ခဲ့တာ ဖြစ်ပါတယ်။
ကလေးအမေ မာဟီဟာ သားနဲ့အတူ နေရောင်တောင် အထိမခံဘဲ အိမ်ထဲမှာ ၃ နှစ်လုံး မပစ်ဘဲထားတဲ့ အမှိုက်တွေ၊ အဝတ်ပုံတွေနဲ့ ရှုပ်ယှက်ခတ် ညစ်ပတ်နေတာကို ကယ်ဆယ်ရေးလုပ်စဉ်မှာThe Indian Express မီဒီယာက ရိုက်ကူး ဖော်ပြခဲ့ပါတယ်။
သူတို့ကို ကယ်ထုတ်ပြီးနောက် မိခင်မာဟီနဲ့ သားဖြစ်သူကို ဆေးရုံတင်ထားပြီး စိတ်ပိုင်းဆိုင်ရာ ကောင်းမွန်လာတဲ့အထိ စောင့်ရှောက်နေကြောင်း သိရပါတယ်။
Ref: The Indian Express
MKF-001