မဲခေါင်၊ မတ် ၁၈
ပြီးခဲ့တဲ့ ရက်ပိုင်းက နိုင်ငံတကာ လေပိုင်နက်ဖြစ်တဲ့ ပင်လယ်နက်ပေါ်မှာ ပျံသန်းနေတဲ့ အမေရိကန် မောင်းသူမဲ့ ထောက်လှမ်းရေး ဒရုန်း MQ-9 Reaper ကို ပျက်ကျသွားအောင် စွမ်းဆောင်ခဲ့တဲ့ ရုရှား Su-27 ဖိုက်တာ ဂျက်လေယာဉ်မှူး ၂ ယောက်ကို နိုင်ငံတော်အဆင့် ဂုဏ်ပြုဆုများ ပေးအပ်ခဲ့ကြောင်း သိရပါတယ်။
မတ် ၁၆ ရက်နေ့က အမေရိကန် လေတပ်ဟာ သူတို့ဒရုန်းကို ရုရှား တိုက်လေယာဉ် ၂ စီး ကျော်တက်ပြီး အမြင်စနစ်နဲ့ တခြား နည်းပညာ စက်ပစ္စည်းတွေ အလုပ်မလုပ်နိုင်အောင် ဆီတွေ ဖြန်းထုတ် ကျော်တက်တဲ့ ၄၂ စက္ကန့်ကြာ ဗီဒီယို မှတ်တမ်းကို ကမ္ဘာသိ ထုတ်ပြန်ခဲ့ပြီး ဂျက်လေယာဉ် တစ်စီးက ဒရုန်းပန်ကာကို ပျက်စီးအောင် ဝင်တိုက်လို့ ပျက်ကျခဲ့တာ ဖြစ်တယ်လို့ ဝေဖန် သတိပေးချက် ထုတ်ပြန်ခဲ့ပါတယ်။
ဒါကို ရုရှားဘက်က ဒရုန်းနဲ့ တိုက်မိခြင်း လုံး၀ မရှိကြောင်း၊ ကပ်ရှောင်လိုက်ခြင်း ကနေ ဒရုန်း ပျက်ကျသွားတာသာ ဖြစ်ကြောင်း၊ အထူးစစ်ဆင်ရေး ကိစ္စရှိမှာ သုံးရမယ့် နိုင်ငံတကာ လေပိုင်နက်ထဲ အမေရိကန် ဒရုန်းဟာ ရေဒီယို အချက်ပြစနစ်ကို မဖွင့်ထားလို့ စည်းကမ်းဖောက်ဖျက်ရင်း မတော်တဆ ဖြစ်သွားတာလို့ တုံ့ပြန်ခဲ့ပါတယ်။
တကယ်တမ်းက ယူကရိန်းထံကနေ သိမ်းထားတဲ့ ခရိုင်းမီးယားဒေသ လေပိုင်နက်ထဲကို ရုရှားက တခြား လေယာဉ်တွေ ပေးမဝင်လို့ ယူကရိန်း အတွက် ထောက်လှမ်းရေး လုပ်ပေးတဲ့ အမေရိကန် ဒရုန်းကို ပျက်ကျအောင် လုပ်ခဲ့တာလို့ သုံးသပ်နေကြပါတယ်။
ဒါကြောင့် မတ် ၁၇ ရက်နေ့မှာပဲ ဒီဖိုက်တာဂျက် လေယာဉ်မှူး ၂ ယောက်ကို နိုင်ငံတော် အဆင့် ဂုဏ်ပြုဆု ပေးအပ်ခဲ့တာ ဖြစ်တယ်လို့ ရုရှားကာကွယ်ရေးဝန်ကြီး ဆာဂျီရှိုအီဂူက ထုတ်ပြန်ခဲ့ကြောင်း မော်စကိုတိုင်းမ် သတင်းမှာ ဖော်ပြပါရှိခဲ့ပါတယ်။
အမေရိကန်ဟာ မတ် ၁၇ ရက်နေ့မှာကတည်းက ပျက်သွားတဲ့ MQ-9 Reaper ကို ပြန်ရှာဖွေဖို့ ကြိုးစားမယ်လို့ ပြောခဲ့ပြီး နောက်ထပ် RQ-4 Global Hawk ဒရုန်း တစ်စင်းကို အစားထိုးလို့ ကင်းထောက်လုပ်ငန်းတွေ ဆက်လက် လုပ်ဆောင်စေခဲ့ပါတယ်။
ရုရှားဘက်ကတော့ ပင်လယ်နက်ဟာ ရေနက်လွန်းလို့ MQ-9 Reaper ကို ပြန်ရှာဖွေဖို့ မဖြစ်နိုင်ဘူးလို့ တုံ့ပြန် ပြောဆိုခဲ့ ပေမယ့် ရုရှား အစိုးရ မီဒီယာ သတင်းတစ်ရပ်မှာတော့ ရုရှားရေတပ်ဟာ ခရိုင်းမီးယားဆိပ်ကမ်းမြို့ ဆီဗက်စ်တိုပိုနဲ့ ၃၇ မိုင်အကွာ ပင်လယ်နက်ထဲက ရေအောက် ပေ ၂၇၈၈ နဲ့ ၂၉၅၂ ပေအကြားက ဒီဒရုန်း အပျက်အစီးတွေကို တွေ့ရှိခဲ့တယ်လို့ ဖော်ပြခဲ့ပါတယ်။
Ref: aljazeera
MKF-001