မဲခေါင်၊ ဖေဖော်ဝါရီ ၈
အမေရိကန် လေပိုင်နက်ထဲ တရုတ်စပိုင် မိုးပျံဘောလုံး တွေ့ရှိပြီးနောက် တရုတ်အနေနဲ့ အချုပ်အခြာအာဏာကို ထိပါးလာရင် တုံ့ပြန်အရေးယူသွားမယ်လို့ အမေရိကန်သမ္မတ ဂျိုးဘိုင်ဒန်က ဖေဖော်ဝါရီ ၇ ရက်မှာ ထုတ်ပြန်ပြောကြားသွားပါတယ်။
ဂျိုးဘိုင်ဒန်က လက်ရှိအမျိုးသားအကျိုးစီးပွားအတွက် တရုတ်နဲ့ပြိုင်ဆိုင်မှုဟာ ဆယ်စုနှစ်ပေါင်းများစွာအတွင်း အမြင့်ဆုံးအဆင့်ရောက်နေတဲ့အတွက် အမေရိကန်အကျိုးစီးပွား၊ ကမ္ဘာ့အကျိုးစီးပွားအတွက် တရုတ်နဲ့ ကောင်းမွန်တဲ့ ဆက်ဆံရေးတည်ဆောက်မယ့်အချိန် စပိုင်မိုးပျံဘောလုံး ကျူးကျော်လာမှုဟာ လက်မခံနိုင်စရာ လို့ မိန့်ခွန်းမှာ ထည့်သွင်းပြောကြားခဲ့ပါတယ်။
ဒါ့အပြင် အတင်းမာဆုံးဆက်ဆံရေးဖြစ်သွားချိန် ပစ္စိဖိတ်နဲ့အတ္တလန္တိတ်ဒေသတွေမှာ အမေရိကန်ရဲ့ မဟာမိတ်တံတားတွေ သွယ်တန်းနေပါတယ်။ အမေရိကန်ကို ဆန့်ကျင်တဲ့ဘက်က အလောင်းအစားလုပ်သူတွေဟာ သူတို့ လုပ်ရပ်ဘယ်လောက်မှားသလဲ သင်ခန်းစာယူသွားရလိမ့်မယ်။ အမေရိကနဲ့ ဆန့်ကျင်လာရင်ဘယ်တော့မှ ကောင်းတဲ့ အလောင်းအစားဖြစ်လာမှာမဟုတ်ဘူးလို့လည်း အမေရိကန်သမ္မတက ဆိုပါတယ်။
ဝါရှင်တန်ပို့စ်က ဖော်ပြတဲ့သတင်းမှာ တရုတ်ဟာ ပြီးခဲ့တဲ့ နှစ်တွေအတွင်း အမေရိကန်တစ်နိုင်ငံတည်းကိုသာ လျှို့ဝှက်ထောက်လှမ်းရေးမိုးပျံဘောလုံးတွေနဲ့ ပစ်မှတ်ထား စပိုင်လုပ်နေတာမဟုတ်ဘဲ ဟိုင်နန်ကျွန်းမှာအခြေ စိုက်လို့ အိန္ဒိယ၊ ဂျပန်၊ ထိုင်ဝမ်၊ ဗီယက်နမ်၊ ဖိလစ်ပိုင် နိုင်ငံတွေကိုပါ ဒီနည်းအတိုင်း ထောက်လှမ်းအချက်အလက် ယူနေခဲ့တာဖြစ်တယ်။
ပြီးခဲ့တဲ့တစ်ပတ်အတွင်း ဟာဝါယီ၊ တက္ကဆက်၊ ဖလော်ရီဒါ၊ ဂူအမ်နိုင်ငံတွေမှာ ဒီလိုမိုးပျံဘောလုံး အနည်းဆုံး လေးလုံးအထိ တွေ့ရှိခဲ့ကြောင်း၊ ဒီသတင်းထုတ်ပြန်မှုမှာ များစွာသော စစ်ထောက်လှမ်းရေးအကြီးအကဲတွေနဲ့ အင်တာဗျူးထားမှု တွေကနေ ခိုင်မာတဲ့သတင်းရင်းမြစ်တွေရထားတာဖြစ်ကြောင်း ရေးသားဖော်ပြခဲ့တယ်။
တရုတ်အစိုးရက အမေရိကန်တို့ ပစ်ချလိုက်တဲ့သူတို့တရုတ်မိုးပျံဘောလုံးဟာ အရပ်ဘက်သုံး မိုးလေဝသ လေ့လာရေးလို သုတေသနလုပ်ငန်းတွေအတွက် လွှတ်တင်ခဲ့ရာက လေကြောင်းပြောင်းပြီး ပိုင်နက်ပြောင်း ရောက်ရှိသွားတာဖြစ်ကြောင်း ပြင်သစ်နိုင်ငံဆိုင်ရာ တရုတ်သံအမတ် လူရှာယီက ဆိုပါတယ်။
အမေရိကန်က စစ်ဆေးအဖြေရှာဖို့လုပ်နေတဲ့ မိုးပျံဘောလုံးအပျက်အစီးအပိုင်းအစ တွေကို မိမိတို့နိုင်ငံကို ပြန်လွှဲပေးသင့်ကြောင်း သူက ပြောထားပါတယ်။
MKF-001
#Mekongnews
Ref:NewYork Times
