မဲခေါင်၊ ဖေဖော်ဝါရီ ၂၅
ထိုင်းနိုင်ငံမှာ ချစ်သူဟောင်း ဖြစ်သူဟာ အကြွေးမဆပ်နိုင်လို့ စိတ်ဓာတ်ကျပြီး သူ့အိမ်၊ သူ့ရှေ့တင် သေနတ်နဲ့ ခေါင်းကို ပစ်သတ်ပြီး အဆုံးစီရင်ကြောင်း အကြွေးရှင် အမျိုးသားက ထွက်ဆိုခဲ့ပါတယ်။
ဖေဖော်ဝါရီ ၂၁ ရက်နေ့က ထိုင်းနိုင်ငံ အလယ်ပိုင်း ဖစ်စနူလော့ခရိုင်၊ ပီချိုင်းဆောက်ကရမ် လမ်းပေါ်က ကြွေးရှင် ဆွမ်ကီယတ်အိမ်မှာ ဒေသစံတော်ချိန် ည ၈ နာရီခွဲမှာ ဖြစ်ပွားခဲ့တာလို့ ဆိုတယ်။
ဆွမ်ကီယတ် ၅၈ နှစ်က သူ့ချစ်သူဟောင်း ကေဆွန်း ၄၇ နှစ်ဟာ အကြွေးတွေနဲ့ စိတ်ဖိစီးမှုများနေပြီး သေနတ်နဲ့ သူ့အိမ်မှာ သူ့ရှေ့တင် ခေါင်းကို သေနတ်နဲ့ ပစ်သတ်သေသွားတာလို့ ရဲတပ်ဖွဲ့ကို အကြောင်းကြားခဲ့ပါတယ်။
အကြောင်းကြားချင်းမှာပဲ ရဲတွေနဲ့ ဗုဒ္ဓချင်နာရာဆေးရုံက ဆရာဝန်တွေ အခင်းဖြစ်ရာကို သွားတော့ သွေးအိုင်ထဲ မှာ သေဆုံးနေတဲ့ ကေဆွန်းကို တွေ့ရကြောင်း၊ ၂၂ မမ ခြောက်လုံးပြူးက ဘယ်ဘက်ပေါင်ပေါ် တင်လျှက် အနေအထားနဲ့ ခေါင်းကို သေနတ်မှန်ထားတဲ့ အနေအထားအ လဲကျ သေဆုံးနေခဲ့တာ ဖြစ်တယ်လို့ ဆိုပါတယ်။
ဆွမ်ကီယတ်က ကေဆွန်းဟာ သူ့ဆီက ဘတ် ၅၀,၀၀၀ ချေးထားပြီး အကြွေးဆပ်ဖို့ အိမ်ကို လာတော့ တကယ် တမ်း သူမပေးနိုင်တော့ကြောင်း ဖွင့်ပြောလာကြောင်း၊ ကေဆွန်းအဖြစ်ကို နားလည်ခွင့်လွှတ်နိုင်ကြောင်း သူ့ဘက်က ပြန်ပြောပေမယ့် ရုတ်တရက် သေနတ်ထုတ်ပြီး ကိုယ့်ကိုယ်ကိုယ် အဆုံးစီရင်သွားတာလို့ ထွက်ဆိုထားပါတယ်။
သူတို့ ချစ်သူတွေ အဖြစ်က ပြတ်စဲခဲ့တာလည်း လပေါင်း အတော်ကြာခဲ့ပြီလို့ ဆွမ်ကီယတ် က ထွက်ဆိုခဲ့တယ်။
ဒီဖြစ်စဉ်မှာ ကေဆွန်းနဲ့အတူ လိုက်ပါလာပြီး အိမ်ပြင်မှာ နေရစ်ခဲ့တဲ့ သူငယ်ချင်း ချန်တီမာဟာ သေနတ်သံ ကြားလို့ အိမ်ထဲ ပြေးဝင်လာတော့ သေဆုံးနေတာကို တွေ့ရကြောင်း၊ ရဲတပ်ဖွဲ့က ချန်တီမာရဲ့ ထွက်ဆိုချက်ကို လူသိမခံသေးဘဲ ထားရှိပြီး သေနတ်ဟာ ကေဆွန်းနဲ့အတူ ပါလာခြင်း ရှိမရှိဆိုတဲ့ ထွက်ဆိုချက်ကိုလည်း သိုသိပ်ထားဆဲ ဖြစ်ပါတယ်။
ကေဆွန်းရဲ့ ညီမ ပရာပါကတော့ အကြွေးကြောင့် စိတ်ဖိစီးမှုများနေရင် ကြွေးရှင် ဆွမ်ကီယတ် အိမ်ကိုတောင် သွားဖို့မလိုဘဲ ကိုယ့်အိမ်မှာကိုယ် အဆုံးစီရင်လိုက်တာ ပိုဖြစ်နိုင်ကြောင်း၊ ကေဆွန်းမှာ သေနတ်ရှိတယ်လို့ တစ်ခါမှ မကြားသိရကြောင်း မီဒီယာမှာ ဖွင့်ဟထားပါတယ်။
လက်ရှိမှာ ရဲတပ်ဖွဲ့က ဒီအမှုဟာ သတ်သေမှုလား၊ လူသတ်မှုလား ဆိုတာကို စုံစမ်းနေဆဲ ဖြစ်ပါတယ်။ မနှစ် အောက်တိုဘာလ တုန်းကလည်း ထိုင်းတောင်ပိုင်း ဆောင်ခလာခရိုင်မှာ ကြွေးရှင်က ငွေချေးပြီး သတ်မှတ်ချိန် ပြန်မပေးတဲ့ သူရဲ့ ခေါင်းကို သေနတ်နဲ့ ၈ ချက်အထိ ပစ်သတ်မှု ဖြစ်ပွားခဲ့ပါသေးတယ်။
Ref: thethaiger
MKD-001