မဲခေါင်၊ ဇွန် ၁၇
ဂါဇာကမ်းမြောင်ဒေသ တောင်ပိုင်းမြို့တော် ရာဖာကို အစ္စရေးစစ်ကြောင်း ဆက်တိုးဝင်ခဲ့ရာက ဟားမက်စ်တွေရဲ့ ခြုံခို တိုက်ခိုက်မှုကြောင့် ပေါက်ကွဲမှုတွေ ဖြစ်ပွားပြီး အစ္စရေးစစ်သား ၈ ယောက် ကျဆုံးခဲ့ကြောင်း ဇွန် ၁၆ ရက်မှာ အစ္စရေးဘက်က ကြေညာပါတယ်။
ဟားမက်စ်နဲ့ စစ်ပွဲကာလအတွင်း ဇန်နဝါရီလအတွင်းက အစ္စရေးစစ်သား ၂၁ ယောက် သေဆုံးမှုဖြစ်စဉ် နောက်ပိုင်း အစ္စရေးဘက်က သေဆုံးမှုအများဆုံး တိုက်ပွဲဖြစ်ခဲ့ပြီး သံချပ်ကာကားအတွင်း လိုက်ပါသွားတဲ့ စစ်သား ၈ ဦးလုံး ပေါက်ကွဲမှုကြောင့် သေဆုံးခဲ့ရတာ ဖြစ်ပါတယ်။
အစ္စရေး စစ်ကြောင်းဟာ ရာဖာမြို့အတွင်း ဝင်ရောက်စီးနင်း တိုက်ခိုက်မှုမှာ လက်နက်ကိုင် အယောက် ၅၀ ကျော်ကို သုတ်သင်နိုင်ခဲ့ပြီး ဟားမက်စ်အုပ်စုဘက်က တန်ပြန် ခြုံခိုတိုက်ခိုက် သွားတာဖြစ်ပါတယ်။
Times Of Israel သတင်းက တင့်ကားပေါက်ကွဲသွားရတဲ့ ဗုံးဟာ တင့်ကားအောက်မှာ ကြိုတင်တပ်ဆင်ခဲ့တာ ဟုတ်မဟုတ်၊ လမ်းမှာ ပိတ်ထောင်ထားတာဟုတ်မဟုတ် သဲသဲကွဲကွဲမသိရသေးဘူးလို့ ဆိုပါတယ်။
ပေါက်ကွဲမှုဖြစ်ပွားချိန်မှာ သေနတ်သံတွေလည်း မကြားရခဲ့လို့ အစ္စရေးဘက်က စုံစမ်းမှုတွေ ဆက်လက်လုပ်ဆောင် သွားမှာဖြစ်ကြောင်းနဲ့ ကျဆုံး စစ်သည်တွေနဲ့ မိသားစုဝင်တွေအတွက် ဝမ်းနည်းကြောင်း သမ္မတ နက်တန်ယာဟုက ထုတ်ပြန်သွားပါတယ်။
နက်တန်ယာဟုက စစ်ပွဲမှာ တန်ဖိုးကြီးလှတဲ့ ပေးဆပ်မှုတွေ ရှိခဲ့ပြီးဖြစ်တာကြောင့် နောက်ဆုံးရည်မှန်းချက် ပန်းတိုင်အရောက် လျှောက်ရမှာဖြစ်ကြောင်း၊ ရာဖာမြို့အဆုံး ကမ်းခြေဒေသနား ရောက်ခါနီးပြီမို့ တစ်မြို့လုံး အတိုင်းအတာနဲ့ စီးနင်းပြီး ဟားမက်စ်ကို အမြစ်ဖြတ်သွားမယ်လို့ ဆက်လက် ပြောကြားသွားပါတယ်။
Ref:Thesun
MKF-001
