မဲခေါင်၊ ဇွန် ၁၄
ဗိုလ်ချုပ်ဂျော့ချ်ကော့ဗ် အမည်ရ တိုက်သင်္ဘော၊ နျူကလီးယားစွမ်းအင်သုံး ကာဇန်ငုပ်သင်္ဘောအပါ အရန်စစ်သင်္ဘော ၂ စီးနဲ့အတူ ဇွန် ၁၂ ရက်မှာ ကျူးဘားနိုင်ငံ ဟာဗားနားကျွန်းကို ဆိုက်ကပ်လာတဲ့ ရုရှားရေယာဉ်စုကို ကွန်မြူနစ်နိုင်ငံ ကျူးဘားက သူရဲကောင်းတွေ ကြိုဆိုမှုအဖြစ် သေနတ် ၂၁ ချက်ပစ်ဖောက်ပြီး ကြိုဆိုခဲ့ကြပါတယ်။
ယူကရိန်းကို ပေးထားတဲ့ လက်နက်တွေနဲ့ ရုရှားနိုင်ငံအတွင်းပိုင်းအထိ ပစ်ခတ်တိုက်ခိုက်ခွင့်ကို အမေရိကန်သမ္မတ ဂျိုးဘိုင်ဒန်က ခွင့်ပြုပေးပြီးနောက် ရုရှားဟာ သိသာတဲ့တုံ့ပြန်မှုအဖြစ် သူတို့မဟာမိတ်နိုင်ငံလည်းဖြစ် အမေရိကန်နဲ့ ရန်သူလည်းဖြစ်တဲ့ ကျူးဘားနိုင်ငံကို စစ်ရေးပူတွဲလေ့ကျင့်ဖို့ဆိုပြီး ဒီရေယာဉ်စုကို စေလွှတ်လိုက်တာဖြစ်ပါတယ်။
ကျူးဘားနဲ့အမေရိကန် ကမ်းရိုးတန်းဟာ ၂၅ မိုင်သာကွာရေးပြီး ဗိုလ်ချုပ်ဂျော့ခ် ကော့ဗ်တိုက်သင်္ဘောနဲ့ ကာဇန်ရေငုပ်သင်္ဘောတွေမှာ နျူကလီးယားတင်ဆောင်နိုင်တဲ့ အသံထက်မြန်တဲ့ ဇစ်ခရွန် ဒုံးကျည်တွေ၊ ကာလီဘာနဲ့ အွန်နစ်ချ်ဒုံးကျည်တွေလည်း တင်ဆောင်လာတာဖြစ်လို့ ဒီလက်နက်တွေဟာ ရန်သူသင်္ဘောတွေကို သာမက ကုန်းမြေပစ်မှတ်တွေကိုပါ တိုက်ခိုက်နိုင်စွမ်းရှိပါတယ်။
အမေရိကန်ဘက်ကတော့ အခြေအနေဟာ နျူကလီးယားလက်နက်နဲ့ ပစ်ခတ် တိုက်ခိုက်နိုင်တာမျိုး အရိပ်အယောင် မမြင်ရပေမယ့် အနီးကပ်စောင့်ကြည့်အကဲခတ်နေကြောင်း၊ ကာရစ်ဘီယံပင်လယ်မှာ ရုရှားနဲ့ ကျူးဘား ရေတပ်တွေ ဒီတစ်နွေလုံး ပူးပေါင်းစစ်ရေးလေ့ကျင့်ပြီး စစ်သင်္ဘောတွေ ဆက်ရှိနေသွားနိုင်ကြောင်း ထုတ်ပြန်ခဲ့ပါတယ်။
ရုရှားဟာ ကျူးဘားနဲ့ ဟိုရှေးခေတ်ကတည်းက ရင်းနှီးတဲ့ဆက်ဆံရေးရှိခဲ့ပြီး ကျူးဘားသမ္မတ ဖီဒယ်ကက်စ်ထရို သေဆုံးချိန်ကစလို့ အမေရိကန်နဲ့ စစ်အေးတိုက်ပွဲကာလကို ရောက်ရှိသွားခဲ့တာဖြစ်ပါတယ်။
ကက်စ်ထရိုဟာ ကမ္ဘာ့နျူကလီးယားစစ်ပွဲကြီး ဖြစ်ပွားလုနီးနီး အခြေအနေရောက်အောင် တင်သွင်းခဲ့သူဖြစ်ပြီး ၁၉၆၂ ခုနှစ်က အမေရိကန် နဲ့ ရန်သူတော်ဖြစ်မှုမှာ ရုရှားရဲ့ နျူကလီးယားဒုံးလက်နက်တွေ ကျူးဘားမှာ လာအခြေစိုက်ဖို့ ဖိတ်ခေါ်ခဲ့သူလည်း ဖြစ်ပါတယ်။ ပူတင်ကလည်း မိန့်ခွန်းတစ်ခုမှာ ကက်စ်ထရိုဟာ ရုရှားပြည်သူတွေ အသဲနှလုံးထဲ အမြဲစွဲမြဲအမှတ်ရ နေသူလို့လည်း ဂုဏ်ဖော်ပြောဆိုခဲ့ဖူးပါတယ်။
Ref:Thesun
MKF-001
