မဲခေါင်၊ မတ် ၁၁
တရုတ် ပြည်သူ့လွှတ်တော်က မတ် ၁၀ ရက်နေ့မှာ ဆန္ဒမဲ ကောက်ခံပြီး လီချန်းကို နိုင်ငံဝန်ကြီးချုပ်အဖြစ် ခန့်အပ်ကြောင်း အတည်ပြုခဲ့ပါတယ်။
ဆန္ဒမဲပေါင်း ၂,၉၃၆ မဲက ထောက်ခံမဲ ဖြစ်ပြီး ၃ မဲက ကန့်ကွက်မဲ၊ ၈ မဲက ပျက်ကွက်မဲတွေ ဖြစ်လို့ ၆၃ နှစ်ရှိပြီဖြစ်တဲ့ လီချန်းဟာ နိုင်ငံ့ ဒုတိယ အကြီးဆုံး ခေါင်းဆောင် ရာထူးကို ရရှိသွားနိုင်ခဲ့တာ ဖြစ်ပါတယ်။
တရုတ်နိုင်ငံ ပေါ်လစီအရ ဝန်ကြီးချုပ်ဟာ နိုင်ငံ စီးပွားရေး တိုးတက်မှု အတွက် အဓိက တာဝန်ပိုယူရတာ ဖြစ်လို့ ကိုဗစ် ကပ်ဆိုး ၃ နှစ်အလွန် နိုင်ငံ စီးပွားရေး တိုးတက်ဖို့ ကြီးမားတဲ့ တာဝန်ယူရတော့မှာ ဖြစ်ပါတယ်။
ဒါပေမဲ့ ပြီးခဲ့တဲ့ ဆယ်စုနှစ်တစ်ခု အတွင်း နိုင်ငံ သမ္မတရာထူး ရယူခဲ့တဲ့ ရှီကျင်းဖျင် လက်ထက်မှာတော့ နိုင်ငံစီးပွားရေး တာဝန်ကိုပါ သမ္မတကပဲ အဓိက တာဝန်ယူ ဆုံးဖြတ်မှုတွေ လုပ်လာခဲ့လို့ ၂၀၁၃ ခုနှစ်က စပြီး ဝန်ကြီးချုပ်လုပ်ခဲ့တဲ့ လီကျားရှင်း အတွက် အခန်းကဏ္ဍက မှေးမှိန်လာခဲ့ပါတယ်။
ရှန်ဟိုင်း ကွန်မြူနစ်ပါတီ ခေါင်းဆောင်ဟောင်းဖြစ်တဲ့ လီချန်း ကတော့ ရှီကျင်းဖျင်အ အတွက် နှစ်ပေါင်းများစွာ အနီးကပ် နေထိုင်ခဲ့သူဖြစ်လို့ ဝန်ကြီးချုပ် ဖြစ်လာရာမှာ နိုင်ငံ စီးပွားရေး တိုးတက်ရေး အတွက် တာဝန်တွေ ခွဲယူရမယ့်သဘော ရှိနေပါတယ်။
တရုတ်နိုင်ငံရဲ့ ၂၀၂၂ GDP ဟာ ၅ ရာခိုင်နှုန်းသာ မြင့်တက်ခဲ့ပြီး ဒီနှုန်းဟာ ဆယ်စုနှစ်တစ်ခု အတွင်း အနိမ့်ကျဆုံး ဖြစ်ခဲ့လို့ စီးပွားရေး ပြန်ဦးမော့လာဖို့ လီချန်းကို တာဝန်ပေးအပ်တာ ဖြစ်ပါတယ်။
နိုင်ငံစီးပွားရေးရဲ့ အရေးပါတဲ့ အိမ်ယာမြေ ဈေးကွက်၊ စားသုံးသူ ဈေးကွက် ကျဆင်းလာခြင်း၊ လူငယ်တွေ အကြား အလုပ်လက်မဲ့နှုန်း မြင့်မားလာခြင်း၊ ဒေသတွင်း အစိုးရအဖွဲ့တွေမှာ ကြွေးမြှီတွေ တင်ရှိနေခြင်း၊ နည်းပညာ ရင်းနှီးမြှုပ်နှံခြင်းနဲ့ နိုင်ငံခြား ရင်းနှီးမြှုပ်နှံခြင်းတွေမှာ တင်းမာမှုတွေနဲ့ အဆင်မပြေမှုတွေ ရှိနေခြင်းတွေဟာ ဝန်ကြီးချုပ်သစ် လီချင်း ဖြေရှင်းရမယ့် ပြဿနာတွေဖြစ်ပါတယ်။
Ref: cnn
MKF-001