မဲခေါင်၊ ဇွန် ၁၇
ယူကရိန်းသမ္မတ ဇီလန်းစကီးက ရုရှားတပ်တွေ နိုင်ငံတွင်းက ပြန်ရုပ်သိမ်းသွားရင် နာရီပိုင်းအတွင်း ငြိမ်းချမ်းရေး ဆွေးနွေးမယ်လို့ ထုတ်ပြန်ပြောဆိုသွားပါတယ်။
ဆွစ်ဇာလန်မှာ နိုင်ငံပေါင်း ၈၀ ပါဝင်ဆွေးနွေးခဲ့တဲ့ ငြိမ်းချမ်းရေး ညီလာခံမှာ နိုင်ငံအားလုံးလိုလိုက ယူကရိန်းကို ကျူးကျော်တဲ့ ရုရှားအပေါ် အပြစ်တင်လို့ ယူကရိန်းဟာ သူ့နိုင်ငံပိုင်နက်ကို ကာကွယ်ခွင့်ရှိကြောင်း ထုတ်ပြန်အပြီးမှာပဲ ဇီလန်းစကီးဘက်က ထုတ်ပြန်လာတာဖြစ်ပါတယ်။
ဒါပေမဲ့ ဒီငြိမ်းချမ်းရေးညီလာခံမှာ ရုရှားအပေါ် အပြစ်တင်မှုကို လက်မှတ်မထိုးခဲ့ကြတဲ့ နိုင်ငံတွေရှိပြီး အိန္ဒိယ၊ တောင်အာဖရိက၊ ဆော်ဒီနိုင်ငံတို့ ပါဝင်ပါတယ်။ ဒီပွဲမှာ ရုရှားကို မဖိတ်ခေါ်ဘဲ ရုရှားကို အထူးထောက်ခံတဲ့ တရုတ်လည်း တက်ရောက်လာခြင်းမရှိပါဘူး။
ဒီ ၂ ရက်တာညီလာခံမှာ ဇာပေါ်ရစ်ဇီဟာ နျူကလီးယားစက်ရုံကို ရုရှားတွေ သိမ်းပိုက်ထားမှု ယူကရိန်းထံ ပြန်ပေးဖို့၊ ရုရှားဘက်က ဖမ်းခေါ်သွားတဲ့ ယူကရိန်း ကလေးငယ်တွေအပါ စစ်သုံ့ပန်းတွေအားလုံး အပြန်အလှန် ပြန်ပို့ လဲလှယ်ဖို့၊ မကြာခင် ရုရှားကျူးကျော် သိမ်းပိုက်ထားတဲ့ ယူကရိန်းနယ်မြေတွေကို ပြန်လွှဲပေးဖို့ တောင်းဆိုမှုတွေ ပါဝင်ခဲ့ပါတယ်။
ဒီအစည်းအဝေးအပြီးမှာပဲ ဇီလန်းစကီးက “ကျွန်တော်တို့ ပိုင်နက်တွေထဲက ရုရှားတပ်တွေ ပြန်ထွက်သွားရင် ရုရှားဟာ ငြိမ်းချမ်းရေးဆွေးနွေးမှုကို နာရီပိုင်းအတွင်း စတင်နိုင်မှာပါ။ ဒါပေမယ့် ပူတင်ဟာ ယူကရိန်းနဲ့တင် ရပ်တန့် သွားမယ် မထင်လို့ တားဆီးနိုင်သမျှ ပူးပေါင်း တားဆီးရမှာဖြစ်တယ်” လို့ ထုတ်ပြန် ပြောဆိုသွားပါတယ်။
နယ်သာလန်ဝန်ကြီးချုပ် မာ့ခ်ရတ်တီကလည်း အားလုံးဟာ မျှဝေမှုအမြင်တွေ၊ တန်ဖိုးတွေ၊ ကိုယ်ကျင့်သိက္ခာ တွေအတွက် အလုံးစုံ ညီညွတ်ရမှာဖြစ်ကြောင်း၊ သူတပါးနိုင်ငံကို ကျူးကျော်မရ၊ သူတစ်ပါးနိုင်ငံက ကလေးတွေ ကို ခေါ်သွားခွင့်မရှိ၊ နိုင်ငံရေးကစားခြင်းနဲ့ ကမ္ဘာ့စားနပ်ရိက္ခာလမ်းကြောင်းကို မပိတ်ရ၊ နျူကလီးယားနဲ့ အန္တရာယ်ပေး မခြိမ်းခြောက်ရဘူးလို့လည်း ရုရှားကို ဝေဖန် ပြစ်တင်သွားခဲ့ပါတယ်။
Ref:thesun
MKF-001
