မဲခေါင်၊ ဇူလိုင် ၃
ရုရှားသမ္မတပူတင်ဟာ ယူကရိန်းရဲ့ ကာမီကာဇီဒရုန်းတွေကြောင့် ဆုံးရှုံးနစ်နာမှုများနေလို့ ဒီဒရုန်းတွေကို ပိုက်ကွန်နဲ့ဖမ်းစေမယ့် ပထမကမ္ဘာစစ်ဟန် လေသင်္ဘောစုတွေ တည်ဆောက်ဖို့ စီစဉ်နေပြီဖြစ်ပါတယ်။
ပူတင်ဟာ မြေပြင်ကနေ ရေဒါစနစ်နဲ့ ထိန်းချုပ်ဖမ်းယူတဲ့ မောင်းသူမဲ့ မီနီလေသင်္ဘောငယ်တွေကို တည်ဆောက်ပြီး လေသင်္ဘောတစ်စီးဟာ အနည်းဆုံး ၃၀ ကီလိုဂရမ် ဝန် တင်ဆောင်နိုင်မှာဖြစ်ကြောင်းနဲ့ အမြင့် ပေ ၁၀၀၀ ဝန်းကျင်ကနေ ဝင်လာမယ့် ဒရုန်းတွေကို ရေဒါမှာ ဖမ်းယူကာ ပိုက်ကွန်နဲ့ ကြားဖြတ်ဖမ်းဆီးပြီး မြေပြင်ကို ချပေးတဲ့ စနစ်သုံးဖို့ First Airship JSC ကုမ္ပဏီထံ တီထွင်ဖို့ အပ်ထားကြောင်း သိရပါတယ်။
ဒီကုမ္ပဏီရဲ့ အထွေထွေညွှန်ကြားရေးမှူး ပိုလီနာအယ်လ်ဘိခ်က ကနဦးလုပ်ငန်းစဉ်ဟာ ကုန်တင်လေသင်္ဘော အသွင်ကိုဆောင်မှာဖြစ်ကြောင်း၊ ရှေးခေတ် ရုရှားပညာရှင်တွေ တီထွင်ခဲ့တဲ့ လေသင်္ဘောနည်းပညာတွေကို အတွေ့အကြုံယူရင်း ဒရုန်းရန်ကာကွယ်ရေးအတားအဆီး ပိုက်ကွန်နည်းပညာကို ထည့်သွင်းမှာဖြစ်တယ်လို့ ရှင်းလင်းပြောကြားခဲ့ပါတယ်။
UAV တန်ပြန်တိုက်ခိုက်ရေးနည်းပညာ ညီလာခံကို စိန့်ပီတာစဘာ့ဂ်မြို့မှာ ကျင်းပစဉ် နည်းပညာဗီဒီယို မိတ်ဆက်မှုကို First Airship JSC က တင်ပြသွားတာဖြစ်ပြီး လက်ရှိဒီရက်ပိုင်းထဲမှာပဲ ခရိုင်းမီးယားက ရုရှားရေယာဉ်စုကို ယူကရိန်းဘက်က Sea Drone နဲ့ ပစ်ခတ်ဖောက်ခွဲ တိုက်ခိုက်မှုတွေ အောင်မြင်နေခဲ့တာကိုလည်း ယူကရိန်းဘက်က ရုပ်သံမှတ်တမ်း ထုတ်ပြန်ခဲ့ပါတယ်။
Ref:Thesun
MKF-001
