မဲခေါင်၊ မတ် ၇
ယူကရိန်းကို ရုရှား စတင်ကျူးကျော်စဉ် ကတည်းက ယူကရိန်းရေတပ်ကို ဗြိတိန်စစ်တပ်က လျှို့ဝှက်စွာနဲ့ စစ်သင်တန်းတွေ ပေးနေတဲ့ ကျွန်းကို ပစ်ခတ်ဖျက်ဆီး လိုက်ပြီလို့ ရုရှားဘက်က ထုတ်ပြန်ခဲ့ပါတယ်။
ပူတင် ထောက်ခံတဲ့ သတင်းမီဒီယာ Moskovskij Komsomolets မှာ စစ်ရေးကျွမ်းကျင်သူ ဗာဆီလီဒန်ဒီကင်က ဒီသတင်းကို ထုတ်ဖော်ပြောဆိုသွားခဲ့တာဖြစ်ပြီး ယူကရိန်းနဲ့ ရုရှားစစ်သားတွေ အများအပြား သေဆုံးခဲ့တယ်လို့လည်း ဖော်ပြပါရှိခဲ့ပါတယ်။
ခံတပ်ကျွန်းဖြစ်တဲ့ ပရီဗိုမိုင်းစကီးကျွန်း (တစ်ခြားအမည် – မိုင်းစကီးကျွန်း) ဟာ အရင်က ရုရှားပိုင်ဖြစ်ပြီး စစ်စခန်း တစ်ခု အခြေချဖို့ လုံလောက်တဲ့ အကျယ်အဝန်းရှိတဲ့ ကျွန်းငယ်လေးဖြစ်ပါတယ်။
၁၉၈၅ ခုနှစ်မှာ ရုရှား တည်ဆောက်တပ်စွဲခဲ့တဲ့ ဒီကျွန်းကို ၁၉၄၁ ခုနှစ်မှာ ဂျာမနီရဲ့ Lutfwaffe လေယာဉ်နဲ့ ဗုံးကြဲ ဖျက်ဆီးပစ်ခဲ့ပြီး ဆိုဗိယက် ပြိုကွဲပြီးနောက် ယူကရိန်းကို ရုရှားဘက်က လွှဲပေးခဲ့တဲ့ ကျွန်းလည်း ဖြစ်ပါတယ်။
ဒန်ဒီကင်ရဲ့အဆိုအရ ဒီကျွန်းဟာ အနောက်အင်အားစုတွေက ယူကရိန်းကို ကူညီဖို့သင်တန်းပေးနေကြောင်း၊ အဲဒီကျွန်းမှာ ရေအောက်ဒရုန်းများစွာကို တပ်ဆင်ထားပြီး ပင်လယ်နက်အနီး ဆီဗက်စတိုပိုက ရုရှားသင်္ဘောတွေကို တိုက်ခိုက်ဖို့ပြင်ဆင်ထားကြောင်း၊ ဖေဖော်ဝါရီလထဲမှာ ရုရှားတပ်တွေက ကျွန်းတစ်ခုလုံး ရှိသမျှအားလုံးနီးပါး သေဆုံးနိုင်တဲ့ တိုက်ခိုက်ဖျက်ဆီးမှု လုပ်ခဲ့တာဖြစ်ပြီး သေဆုံးမှု ဘယ်လောက်ရှိသလဲ ဆိုတာကိုတော့ မသိနိုင်ဘူးလို့ ဆိုပါတယ်။
ဒီသတင်းနဲ့ ပတ်သက်ပြီး ယူကရိန်းနဲ့ ဗြိတိန်ဘက်က တစ်စုံတစ်ရာထုတ်ပြန်မှုမပြုသေးပါဘူး။
နောက်ဆုံးရသတင်းတွေအရ ယူကရိန်းစစ်ပွဲမှာ ရုရှားစစ်သား ၆ သိန်းဆုံးရှုံးခဲ့ရပြီး ၇၀ ရာခိုင်နှုန်းက စစ်ပြန်မတိုက်နိုင်တဲ့ ဒဏ်ရာတွေရခဲ့သလို ကျန် ၃၀ ရာခိုင်နှုန်းက သေဆုံးခဲ့တာ ဖြစ်တယ်လို့ သိရပါတယ်။
Ref: dailystar
MKF-001
